Read Biatah Bidayuh EZEKIEL 41 Bible Online

EZEKIEL 41 - Biatah Bidayuh bible

EZEKIEL 41

¹Ripas anŭ, daya anŭ taban aku mŭrŭt birit adi dog kadŭn Yŭn Kudus. Ayŭh ngŭkŭd tiburong-aran adi nuju kamanŭ: ambu-i 3 mita[92]

²ka buka-i 5 mita, ngga sindung di parad ka bait ngga di parad ka tauh 2.5 mita tabar. Ayŭh ngŭkŭd adŭp birit anŭ: ambu-i 20 mita, ka buka-i 10 mita.

³Komŭnŭ ayŭh di ka birit adi di siabo darŭm. Ayŭh ngŭkŭd tiburong-aran adi nuju kamanŭ: ambu-i 1 mita ka buka-i 3 mita, ngga sindung di parad ka bait ngga di parad ka tauh agi 3.5 mita tabar-i.

⁴Ayŭh ngŭkŭd gŭh adŭp birit anŭ: ka-i agi simŭng mita misagi. Birit anŭ mbŭh di punok birit adi dog kadŭn Yŭn Kudus. Komŭnŭ ayŭh nang di aku, “Ati inŭh Yŭn adi Siabo Kudus.”

⁵Daya anŭ ngŭkŭd tabar sindung adi tura ka darŭm Ramin TUHAN; tabar-i agi 3 mita. Di sindung adi maning Ramin TUHAN agi birit birit adi siit adi 2 mita buka-i.

⁶Birit birit anŭ bitakah taruh, ka di barang takah agi taruh puru birit. Sindung sapa Ramin TUHAN di barang takah inŭh ride so anŭ adi di takah ribo-i, isa birit birit anŭ bisa bisangan di sindung ka dŭhsah dog ngabŭt dieh.

⁷So sapa, sindung Ramin TUHAN mun adi samah tabar-i so sagān ndŭg sambu. Di sindung sapa Ramin TUHAN, tura ka sapa birit birit anŭ, agi duwŭh tungoh adi bayah dog ndai adi so daya bisa maad so takah sagān di ka takah duwŭh ngga takah taruh.[93]

⁸Sindung sapa birit birit anŭ 2.5 mita tabar-i; birit birit adi tura ka utara biyŭn ndi tiban so daya mŭrŭt, ka birit birit adi tura ka siratan biyŭn gŭh ndi tiban so daya mŭrŭt. Aku kiris gŭh ndi betang-birit adi 2.5 mita bayah-i maning Ramin TUHAN, ka 3 mita bigatung so tana, ka birŭkŭd ngga pimŭnŭs birit birit di sindung Ramin TUHAN. Di asah betang-birit anŭ ngga ramin ramin bara imam agi atong tarun 10 mita bayah-i di tura ka bait ngga tura ka tauh tigang Ramin TUHAN.

¹²Di tŭbŭn atong tarun anŭ tura ka barat Ramin TUHAN agi ndi ramin adi ambu-i 45 mita, ka buka-i 35 mita. Sindung sindung ramin anŭ agi 2.5 mita tabar-i.

¹³Daya anŭ ngŭkŭd sapa Ramin TUHAN, ka-i 50 mita ambu. So punok Ramin TUHAN, mutas atong tarun anŭ ndŭg bŭngŭn Ramin TUHAN tura ka barat, juan-i agi 50 mita gŭh.

¹⁴Juan-i mutas jawin Ramin TUHAN, samŭn atong tarun anŭ di parad ka bait ngga tauh, inŭh 50 mita gŭh.

¹⁵Ayŭh ngŭkŭd anjong ramin anŭ adi tura ka barat, samŭn soduwŭh parad sindung-i, ka-i agi 50 mita gŭh. Birit-mŭrŭt Ramin TUHAN, Yŭn Kudus, ngga Yŭn adi Siabo Kudus

¹⁶inŭh dog nurap ngga kayuh sindung-i so yŭn bidigang ndŭg pinjan-i. Pinjan pinjan anŭ bisa dog tŭŭp.[94]

¹⁷Sopŭrŭg sindung Ramin TUHAN tura ka darŭm dog ngabuh, ndŭg ka bigatung so tiban, ngga gambar[95]

¹⁸tŭngŭn kurma adi dog mŭŭt ngga gambar cherubim; ndi tŭngŭn kurma di asah duwŭh cherubim, bitunda dog nyusud ndi tarun tarun sindung. Barang cherubim anŭ biyŭn duwŭh jawin:

¹⁹jawin manusia adi nura tŭngŭn kurma di parad ndi, ka jawin singah adi nura tŭngŭn kurma di parad mandi. Simŭnŭ inŭh gaya-i di sopŭrŭg sindung,

²⁰so yŭn bidigang ndŭg sambu tiban.

²¹Uros uros tiban Yŭn Kudus inŭh misagi. Di rawa tiban Yŭn adi Siabo Kudus agi kayuh adi mun

²²mija-sambah kayuh. Bigatung-i inŭh 1.5 mita, ka buka-i inŭh 1 mita. Uros uros sikuh-i, bangan-i,[96] ka tigang tigang-i, sopŭrŭg dog ndai so kayuh. Daya anŭ nang di aku, “Ati inŭh mija adi dog na di sirung jawin TUHAN.”

²³Di tŭbŭn tiburong-aran nuju Yŭn Kudus agi ndi tiban, ka ndi gŭh di tŭbŭn tiburong-aran adi nuju Yŭn adi Siabo Kudus.

²⁴Soduwŭh tiban anŭ inŭh tiban brembang adi tikuka di yun-i.

²⁵Diginŭ agi tŭngŭn kurma ngga cherubim dog mŭŭt di rubek rubek tiban Yŭn Kudus, ka simŭnŭ gŭh di dudu sindung. Ka agi tutu adi dog ndai so kayuh di tura ka sapa tiban birit-mŭrŭt Ramin TUHAN.

²⁶Di tigang birit anŭ agi pinjan pinjan, ka sindung sindung dog ngabuh ngga gambar tŭngŭn kurma adi dog mŭŭt.[97]