Read Biatah Bidayuh EZEKIEL 43 Bible Online

EZEKIEL 43 - Biatah Bidayuh bible

EZEKIEL 43

¹Daya anŭ taban aku ka tiban-bās adi nura timor,

² ka diginŭ aku kiris mandŭg so timor jawa bragah Tapa Israel. Sirŭŭn Tapa sak jawŭn girumbang di rawŭt, ka tana nyirinyak ngga jawa bragah Tapa.

³Kayuh adi aku kiris anŭ inŭh mun kayuh adi aku kiris di tika Tapa mandŭg di pirabur Jerusalem, ka mun anŭ adi aku kiris di Yang Chebar. Jadi aku sidikang ka mŭŭb di tana.

⁴Jawa bragah anŭ mŭrŭt so tiban-bās timor ka mŭrŭt Ramin TUHAN.

⁵Roh Tapa tunduk aku ka taban aku ka badag tura ka darŭm, di yŭn aku kiris Ramin TUHAN brisi ngga bragah TUHAN.

⁶Daya anŭ mijog diginŭ sindŭk aku, ka aku dingah TUHAN minyu ngga aku di sapa Ramin-I:

⁷“Manusia, ati inŭh takta Ku. Aku re rŭŭ digiti di ruang daya Ku Israel ka mritah ngara ndŭg situi tui. Daya Ku Israel bait tadŭ tadŭ raja ngara re dŭh tia nyembar adŭn kudus Ku ngga urah ngara adi nyambah tapa tapa bŭkŭn bait kubur tadang tadang[100] raja ngara di tarun ati.

⁸Raja raja pijog pinutug ngga uros uros tiban istana ngara ngapid pinutug ngga uros uros tiban Ramin Ku, batur ndi sindung adŭ juan-i. Ngara nyembar adŭn kudus Ku ngga barang masam pingandai ngara. Anŭ sabab Aku pirabur ngara.

⁹Madin ngara dŭh siŭn dŭh pirŭŭ urah ngara adi nyambah tapa tapa bŭkŭn ka kadi tadang tadang[101] raja ngara. Ripas anŭ, Aku re rŭŭ di ruang ngara ndŭg situi tui.”

¹⁰Ka TUHAN nang dinge, “Manusia, kidaan di daya Israel pasar Ramin Ku, ka bada ngara tunda suto-i. Bada ngara mangŭh ngarun urah ngara adi bidosa.

¹¹Komŭnŭ kambŭi ngara mbŭh mangŭh ngarun kayuh adi ngara mbŭh ndai, kidaan rati suto Ramin Ku di ngara, tiban mŭrŭt ngga tiban ruah, gaya-i, pinipan sopŭrŭg kayuh, ka sopŭrŭg atur ngga atur adat-i. Nuris sopŭrŭg-i isa ngara dapŭd kiris munki kayuh mbŭh dog ngatur ka dapŭd pijadi-i nanyam sopŭrŭg susud atur-i.

¹²Ati inŭh ukum-adat Ramin TUHAN: sopŭrŭg tarun tana adi maning-i di tibung darŭd anŭ inŭh kudus.”

¹³ Ati inŭh kŭd mija-sambah, tunda pingŭkŭd adi dog pakai ngga ngŭkŭd Ramin TUHAN. Maning sigŭn mija-sambah anŭ agi parit adi rimŭh puru sentimita tŭrŭp-i ngga rimŭh puru sentimita buka-i, ngga atŭp-i di bŭngŭn tura ka sapa duwŭh puru-rimŭh sentimita bigatung.

¹⁴Takah mija-sambah adi siabo sagān, ngitong so tunduh bangan-i, inŭh ndi mita bigatung. Takah anŭ ndi mŭrŭt rimŭh puru sentimita ka darŭm so bŭngŭn-i di sopŭrŭg parad, ka bigatung-i duwŭh mita. Takah adi ripas anŭ mŭrŭt rimŭh puru sentimita gŭh ka darŭm so bŭngŭn-i di sopŭrŭg parad.

¹⁵Takah adi tunduh anŭ, di yŭn sadis dog badang, inŭh duwŭh mita bigatung gŭh. Junggir adi di pat sikuh-i bigatung dŭ so tunduh mija-sambah anŭ.

¹⁶Tunduh mija-sambah anŭ misagi, nŭm mita di barang parad.

¹⁷Takah adi di yun misagi gŭh, ju mita di barang parad, ngga ndi atŭp-i di bŭngŭn tura ka sapa adi duwŭh puru-rimŭh sentimita bigatung. (Parit anŭ rimŭh puru sentimita buka-i.) Tungoh mija-sambah agi di parad tura ka timor.

¹⁸TUHAN Raja nang di aku, “Manusia, dingah kayuh adi aku kidaan di kuu. Kan mija-sambah anŭ dog ndai, kuu an badang sadis di tunduh-i ka masik deya dāng adi dog nyadis di tunduh-i, ngga nitah-i yŭn Ku.

¹⁹Bara imam adi so tibaran-asar Levi adi sesang Zadok inŭh kaŭs daya adi siŭn mŭrŭt ka sirung jawin Ku ka bituan di Aku. Aku, adi TUHAN Raja, pesan kayuh anŭ. Kuu re nggen di ngara dari sapi adi gi-mara bada jugan ndu sadis taran dosa.

²⁰Kuu an tambit kada deya-i ka susen-i di tunduh junggir adi di sikuh mija-sambah, ka di sikuh takah adi rapŭt mija-sambah, ka di pingŭnggŭng di barang parad. Simŭnŭ kuu re pibisig mija-sambah ka nyikudus-i.

²¹Kuu an tambit dari sapi adi dog jugan ndu sadis taran dosa ka badang-i di tarun yŭn adi mbŭh dog miratak di sapa tarun tana Ramin TUHAN.

²²Ngga andu jawa ndi, kuu an taban dari kambing adi pidanah ka jugan-i ndu sadis taran dosa. Pibisig mija-sambah ngga deya-i nimun kuu pibisig-i ngga deya dari sapi mara anŭ.

²³Kan kuu muko ndai simŭnŭ, tambit ndi dari sapi adi mara ngga dari biri adi mara, ka soduwŭh-i an adi pidanah,

²⁴ka taban-i ka yŭn Ku. Imam imam re nabur garo dieh ka badang-i ndu sadis ka Aku.

²⁵Barang andu sitŭkŭd ju andu kuu an jugan kambing, dari sapi, ka ndi dari biri ndu sadis taran dosa. Sopŭrŭg-i dŭh siŭn dŭh adi pidanah.

²⁶Sitŭkŭd ju andu imam imam an nyikudus mija-sambah ka sidia-i yŭn pakai.

²⁷ Kan minggu anŭ mbŭh ripuan, imam imam anŭ an piguru jugan di tunduh mija-sambah, sadis badang ngga sadis bidingan yŭn daya bagŭ. Komŭnŭ Aku re munos asŭng di sopŭrŭg ngan. Aku, adi TUHAN Raja, mbŭh minyu.”