Read Biatah Bidayuh EZEKIEL 44 Bible Online

EZEKIEL 44 - Biatah Bidayuh bible

EZEKIEL 44

¹Daya anŭ taban aku ka tiban-bās sapa di parad ka timor tarun yŭn Ramin TUHAN. Tiban-bās anŭ dog tŭŭp,

²ka TUHAN nang di aku, “Tiban-bās ati re adu adu bitŭŭp ka dŭh siŭn dog kuka. Mating daya dog nyibandar mŭrŭt tiban-bās ati, sabab Aku, adi TUHAN Tapa Israel, mbŭh mŭrŭt so dieh. Tiban-bās anŭ an adu adu bitŭŭp.

³Adŭ-i pinguasa adi mritah, bisa di kamati ka man dagin kudus di sirung jawin Ku. Ayŭh siŭn mŭrŭt ka ruah so tiban-bās so birit-mŭrŭt di tŭbŭn tura ka darŭm.”

⁴Komŭnŭ daya anŭ taban aku mŭrŭt so tiban-bās di parad ka utara di ka jawin Ramin TUHAN. Darŭm aku tingga, aku kiris Ramin TUHAN mbŭh brisi ngga jawa bragah-I. Aku sidikang ka mŭŭb di tana,

⁵ka TUHAN nang di aku, “Manusia, nakit pirati sopŭrŭg kayuh adi kuu kiris ka dingah. Aku re kidaan di kuu atur ngga atur-adat yŭn Ramin TUHAN. Nakit ngatin asi adi dog nyibandar mŭrŭt ruah so Ramin TUHAN ka asi adi dŭh.

⁶“Kidaan di bara daya Israel adi an birawan anŭ nang Aku, adi TUHAN Raja, re dŭh tia tandah ngara ndai pingandai adi sipŭ.

⁷Ngara mbŭh nyembar Ramin Ku, sabab di tika ramak ngga deya sadis dog jugan ka Aku, ngara nyibandar daya tami adi dŭh bisunat ka adi dŭh tŭtŭd di Aku mŭrŭt. Ngga sopŭrŭg pingandai ngara adi sipŭ anŭ daya Ku mbŭh miranggar simanya Ku.

⁸Ngara dŭh sita pingandai adat adi kudus darŭm Ramin Ku, pak daya tami dog tijuan ngara bada ndai-i yŭn ngara.

⁹“Aku, adi TUHAN Raja, piagah nang daya adi dŭh bisunat, bait daya adi dŭh tŭtŭd di Aku, dŭh siŭn mŭrŭt Ramin Ku, samŭn daya tami adi rŭŭ bigaur ngga daya Israel.”

¹⁰TUHAN nang di aku, “Aku ngukum bara daya Levi, samŭn daya Israel adi bŭkŭn, adi tagan Aku ka nyambah tibudo.

¹¹Ngara siŭn bituan di Aku di Ramin Ku, adŭ-i jadi tukang jaga tiban-bās ka tukang siŭ dāng dāng adi daya jugan ndu sadis badang ngga pinganggen, ka ngara dŭh siŭn dŭh an nyiraja yŭn daya bagŭ.

¹²Pak sabab ngara ndai atur adat nyambah tibudo yŭn daya Israel ka ngga atur anŭ mbŭh bada daya bidosa, Aku, adi TUHAN Raja, mbŭh bipayu nang ngara dŭh siŭn dŭh dog ukum.

¹³Ngara dŭh siŭn jadi imam Ku bait nyindŭk tadŭ tadŭ kayuh adi kudus yŭn Ku bait mŭrŭt Yŭn adi Siabo Kudus. Ati inŭh ukum yŭn pingandai sipŭ adi ngara mbŭh ndai.

¹⁴Aku bada ngara ndai kraja biasa adi patut dog ndai darŭm Ramin Ku.”

¹⁵TUHAN Raja nang, “Bara imam adi so tibaran-asar Levi adi sesang Zadok, tŭtŭd bituan di Aku di Ramin Ku di tika daya Israel adi bŭkŭn tagan Aku. Jadi madin ngara inŭh adi patut bituan di Aku ka mandŭg ka sirung jawin Ku di jugan ka Aku ramak ngga deya sadis.

¹⁶Ngara sadi adŭ re mŭrŭt Ramin Ku, ndai kraja di Mija-sambah Ku, ka nguru simayang di Ramin Ku.

¹⁷ Kan ngara mŭrŭt tiban-bās di ka badag tura ka darŭm, ngara an nēn piraka linen. Ngara dŭh siŭn nēn piraka adi dog ndai so buruh biri kan ngara ndai kraja di badag bait darŭm Ramin Ku.

¹⁸Isa ngara dŭh mudas, ngara an nēn bubok banang linen ka sinjang banang linen, pak dŭhsah abŭt kupong.

¹⁹ Diŭ so ngara di ka badag sapa di yŭn bara daya tikuruk, ngara dŭh siŭn dŭh diŭ kadi piraka adi ngara nēn ngga nyiraja darŭm birit birit kudus di Ramin Ku. Isa piraka kudus ngara dŭh bada daya kinaman,[102] ngara an nēn piraka adi bŭkŭn.

²⁰ “Bara imam dŭh siŭn nundo ubak ngara bait tandah ubok ngara ambu. Ngara an kapŭg-i bada purok adŭ.

²¹ Bara imam dŭh siŭn nok wain kambŭi re mŭrŭt ka darŭm badag darŭm.

²² Imam dŭh siŭn sawŭn dayung adi mbŭh dog taran banŭh-i; ayŭh patut sawŭn dayung Israel adi babŭ tibŭn bait dayung uban imam bŭkŭn.

²³ “Bara imam patut ngajar daya Ku ani anŭ kayuh kudus ngga ani anŭ kayuh adi dŭh kudus, ka ani anŭ adi kais nanyam ka adat ngga ani anŭ adi dŭh.

²⁴Kan agi kaii timbur, imam an ngatur kayuh nanyam ka ukum-adat Ku. Ngara an sita gawai gawai adat nanyam ka atur ngga atur-adat Ku, ka sita andu Sabbath bada kudus.

²⁵ “Imam dŭh siŭn tama tadang amai anŭ kayuh adi kais nanyam ka adat, adŭ-i tadang pimas-i, anak-i, bait jurud-i adi dari, puan kah jurud dayung-i adi bayuh banan.

²⁶Kan ayŭh mbŭh pari bisig, ayŭh dŭh siŭn dŭh kajŭn ndŭg ka mbŭh ripuan ju andu

²⁷ka komŭnŭ di ka badag darŭm Ramin TUHAN ka jugan sadis yŭn pibisig adŭp-i, isa ayŭh dapŭd nyiraja darŭm Ramin TUHAN dinge. Aku, adi TUHAN Raja, mbŭh minyu.

²⁸ “Bara imam mbŭh trima utung kraja ngara anŭ inŭh kraja imam adi Aku mbŭh nggen di Israel, adi re dog tarik so turap ndi ndŭg turap andi. Ngara dŭh siŭn biyŭn buat-rata di Israel; Aku inŭh rata ngara.

²⁹ Sadis ruwang kayuh, sadis taran dosa ngga sadis bayar gati rugi, samŭn barang masam kayuh adi mbŭh dog nitah ka Aku patut dog nggen di ngara.

³⁰Bara imam patut dog nggen sopŭrŭg sibungas buwa pingatŭm adi siabo kana ngga sopŭrŭg kayuh bŭkŭn adi dog jugan ka Aku. Tiap kari daya ndai ruti, ngara patut nggen di bara imam sibungas baru ruti ndu pinganggen, ka Aku re nyiberkat ramin arŭn ngara.

³¹ Imam dŭh siŭn man manuk bait dāng adi kabŭs sadi adŭp-i bait adi dog siŭ dāng bŭkŭn.”