Read Biatah Bidayuh EZEKIEL 45 Bible Online

EZEKIEL 45 - Biatah Bidayuh bible

EZEKIEL 45

¹Kan tarun tana dog kutung yŭn barang tibaran-asar, ndi utung an dog nitah ka TUHAN. Tana anŭ an 12.5 kilomita ambu ka 10 kilomita[103] buka-i. Ndi tarun tana anŭ re dog kadŭn kudus.

²Di tarun anŭ agi ndi utung tarun adi misagi pat dog nitah yŭn Ramin TUHAN, 250 mita di barang parad, ka dog kirurung tana adi 25 mita buka-i.

³Sitangah tarun tana anŭ, anŭ inŭh utung tarun adi 12.5 kilomita ambu-i ka 5 kilomita buka-i, an dog nitah yŭn Ramin TUHAN mijog; tarun adi siabo kudus.

⁴Anŭ re tarun adi kudus darŭm rais, dog nitah yŭn bara imam adi bituan di TUHAN di Ramin-I. Ramin ramin ngara ngga Ramin TUHAN re dog pijog diginŭ.

⁵Pire tarun tana anŭ adi bŭkŭn an dog nitah jadi bisaka daya Levi, adi ndai kraja biasa darŭm Ramin TUHAN. Re agi kupo kupo diginŭ di yŭn ngara rŭŭ.[104]

⁶Ngapid tarun kudus anŭ, agi utung tarun adi bŭkŭn, 12.5 kilomita ambu-i ka 2.5 kilomita buka-i, dog nitah yŭn pijog kupo di yŭn tadŭ tadŭ daya Israel bisa rŭŭ.

⁷Tana gŭh an dog nitah yŭn pinguasa adi mritah. Buka-i so baat tarun tana kudus adi tura ka barat jeh ndŭg Rawŭt Mediterranean di barat; ka so baat tarun tana tura ka timor jeh ndŭg baat rais di timor, isa ambu-i birŭkŭd ngga ambu tarun tana adi mbŭh dog pirutung yŭn tibaran tibaran-asar Israel.

⁸Tarun tana anŭ re jadi utung adi pinguasa adi mritah re dapu di tarun tana Israel, isa ayŭh dŭh kinanyuh rayat-i, pak re tandah tana adi bŭkŭn darŭm rais dog dapu tibaran tibaran-asar Israel.

⁹TUHAN Raja nang, “Angān mbŭh tui bidosa, angān pimritah Israel! Pirŭŭ pinyiganas ngga kraja ngan adi kinanyuh daya. Ndai kayuh adi batur ka tŭnggŭn. Angān dŭh siŭn tia pibu daya Ku so tarun tana ngara. Aku, adi TUHAN Raja, mbŭh kidaan di angān.

¹⁰ “Barang naan dŭh siŭn dŭh pakai timbang ngga takar adi batur:

¹¹“Ndi ephah ngga nakar kayuh adi badŭh dŭh siŭn dŭh nyikiang ngga ndi bath adi ngga nakar kayuh adi bipiin. Takar adi kanyet ka patut dog pakai inŭh homer. [105] Sabab anŭ meh takar ngan an nanyam ka ati: 1 homer == 10 ephah == 10 bath

¹²“Timbang ngan an nanyam ka ati: 20 gerah == 1 shekel[106] 60 shekel == 1 mina

¹³“Ati inŭh atur adi angān an tunda kan angān re jugan pinganggen sadis ngan: Gandom: 1/60 so pingatŭm ngan Jeri: 1/60 so pingatŭm ngan Inyo kanā: 1/100 so buwa buwa kayuh ngan (Nakar kayuh ati pakai bath: 10 bath == 1 homer == 1 kor.) Biri: 1 biri so barang 100 pŭrŭng biri so tarun tana kupai Israel. “Angān an taban sadis ruwang kayuh, dāng dāng adi re dog mŭrŭng badang, ka dāng dāng yŭn sadis bidingan, isa dosa ngan dog apun. Aku, adi TUHAN Raja, mbŭh pesan.

¹⁶“Sopŭrŭg daya tarun tana rais anŭ dŭh siŭn dŭh taban[107] sadis anŭ ka pinguasa adi mritah Israel.

¹⁷Ayŭh inŭh adi dapu tanggong sidia dāng dāng adi re dog mŭrŭng badang, ka sadis ruwang kayuh, ngga sadis wain yŭn sopŭrŭg daya di Israel di tika Gawai Anak Buran, andu Sabbath, ka gawai gawai adi bŭkŭn. Ayŭh gŭh dapu tanggong sidia sadis taran dosa, sadis ruwang kayuh, sadis adi dog mŭrŭng badang, ka sadis bidingan, ngga taran dosa daya Israel.”

¹⁸TUHAN Raja nang, “Di sibungas andu darŭm sibungas buran angān an nyadis ndi dari sapi adi pidanah ngga pibisig Ramin Ku.

¹⁹Bara imam re tambit kada deya so sadis taran dosa anŭ ka na-i di uros uros tiban Ramin TUHAN, ka di pat sikuh mija-sambah, ka di uros uros tiban-bās badag darŭm.

²⁰Di andu adi ju darŭm buran anŭ angān an ndai simŭnŭ ngga ngarun daya adi ndai dosa ngga dŭh singaja puan kah sabab dŭh puan. Simŭnŭ inŭh angān re sita pinyikudus Ramin Ku.

²¹ “Di andu adi simŭng pat darŭm sibungas buran angān re piguru sita Gawai Paska. Sitŭkŭd ju andu barang naan re man ruti adi dŭh biragi.

²²Di sibungas andu gawai anŭ pinguasa adi mritah dŭh siŭn dŭh jugan ndi dari sapi ndu sadis taran dosa yŭn adŭp-i samŭn yŭn sopŭrŭg rayat-i.

²³Ngga barang ju andu gawai anŭ ayŭh an nyadis ka TUHAN ju dari sapi ka ju dari biri adi pidanah ka mŭrŭng badang sopŭrŭg-i. Ayŭh gŭh an nyadis ndi dari kambing barang andu ndu sadis taran dosa.

²⁴Yŭn barang dari sapi ngga barang dari biri adi dog nyadis, an agi samah ngga anŭ 17.5 lita sadis gandom ka 3 lita inyo kanā.

²⁵ “Yŭn Gawai Bari Dawŭn, adi piguru ngga andu adi simŭng-rimŭh darŭm buran ju, pinguasa an pari jugan barang andu sitŭkŭd ju andu anŭ sadis taran dosa, sadis adi mŭrŭng dog badang, ka sadis gandom ngga inyo kanā.”