Read Biatah Bidayuh EZEKIEL 46 Bible Online

EZEKIEL 46 - Biatah Bidayuh bible

EZEKIEL 46

¹TUHAN Raja nang, “Tiban-bās timor adi nura badag darŭm dŭh siŭn dŭh bitŭŭp sitŭkŭd nŭm andu daya nyiraja, pak siŭn dog kuka di andu Sabbath ka di tika Gawai Anak Buran.

²Pinguasa adi mritah re mŭrŭt so badag sapa ka birit-mŭrŭt ka mijog ngapid tiang tiang tiban-bās sitadŭn imam imam mŭrŭng badang sadis-i buang jugan sadis bidingan-i. Di tiban-bās anŭ ayŭh dŭh siŭn dŭh nyambah TUHAN ka komŭnŭ pari ruah. Tiban-bās anŭ dŭh siŭn dog tŭŭp ndŭg singumi andu.

³Barang andu Sabbath ngga barang Gawai Anak Buran sopŭrŭg rayat an sua mutu ubak ngara ka nyambah TUHAN di jawin tiban-bās anŭ.

⁴“Di andu Sabbath pinguasa an taban ka TUHAN, ndu sadis adi mŭrŭng dog badang, nŭm anak biri ngga ndi dari biri, ka sopŭrŭg-i an adi pidanah.

⁵Samah barang dari biri ayŭh an taban 17.5 lita sadis gandom, ka samah barang anak biri ayŭh an taban tadŭ tadŭ kayuh adi raan-i nggen. Yŭn barang sadis ruwang kayuh adi 17.5 lita anŭ ayŭh an taban 3 lita inyo kanā.

⁶Di tika Gawai Anak Buran ayŭh an jugan ndi anak dari sapi, nŭm anak biri, ka ndi dari biri, ka sopŭrŭg-i an adi pidanah.

⁷Samah barang dari sapi ngga barang dari biri an agi 17.5 lita sadis gandom, ka samah barang anak biri an agi tadŭ tadŭ sadis adi raan pinguasa anŭ nggen. 3 lita inyo kanā an dog jugan ngga barang 17.5 lita sadis gandom.

⁸Pinguasa dŭh siŭn dŭh bu so birit-mŭrŭt tiban-bās anŭ ka ruah so aran adi so-i mŭrŭt.

⁹“Kan daya mandŭg di nyambah TUHAN di tika tadŭ tadŭ gawai, ngara adi mŭrŭt so tiban-bās utara an bu so tiban-bās siratan ripas ngara ko nyambah, ka ngara adi mŭrŭt so tiban-bās siratan an bu so tiban-bās utara. Daya dŭh siŭn ruah so aran adi so-i mŭrŭt, pak dŭh siŭn dŭh bu so tiban-bās pah mandi.

¹⁰Pinguasa an mŭrŭt samah bara rayat, ka ruah samah bara rayat.

¹¹Di andu andu gawai ka di tika bigawai, sadis ruwang kayuh an 17.5 lita ngga barang pŭrŭng dari sapi bait dari biri, ka tadŭ tadŭ kayuh adi daya adi mandŭg nyambah raan nggen samah barang pŭrŭng anak biri. 3 lita inyo kanā an dog jugan ngga barang 17.5 lita sadis ruwang kayuh.

¹²“Kan pinguasa adi mritah raan nggen ngga pinyiraan asŭng adŭp-i ka TUHAN, bait-i sadis adi re mŭrŭng dog badang, puan kah sadis bidingan, tiban-bās timor adi nuju badag darŭm an dog kuka yŭn-i. Ayŭh an jugan sadis anŭ mun gaya-i jugan di andu Sabbath, ka tiban-bās anŭ an dog tŭŭp kan ayŭh mbŭh pari ruah.”

¹³TUHAN nang, “Barang isan ndi pŭrŭng anak biri adi ndi sawa umbur-i adi pidanah an dog mŭrŭng badang ndu sadis ka TUHAN. Sadis anŭ dŭh siŭn dŭh dog jugan barang andu.

¹⁴Simŭnŭ gŭh sadis tibaduk adi 2 kilogram an dog jugan barang isan, samah ngga 1 lita inyo kanā ngga gaur tibaduk. Atur yŭn sadis ati an pagŭng dog sita adu adu.

¹⁵Anak biri, tibaduk, ka inyo kanā an marar dog jugan ka TUHAN barang isan.”

¹⁶TUHAN Raja pesan: “Kambŭi pinguasa adi mritah nggen tadŭ tana adi ayŭh dapu di ndi naan so anak anak dari-i ndu pinganggen, tana anŭ dog dapu anak anŭ ka jadi rata rawang-i.

¹⁷ Pak kambŭi pinguasa adi mritah anŭ nggen tadŭ tana di daya adi nyiraja di ribo-i, tana anŭ re pari jadi rata pinguasa anŭ darŭm Sawa Pinyipari[108]. Tana anŭ ayŭh dapu, ayŭh ngga anak anak dari-i bisa adu adu dapu-i.

¹⁸Pinguasa adi mritah anŭ dŭh siŭn tambit tadŭ tadŭ tana rayat-i. Tana adi ayŭh nggen di anak anak dari-i dŭh siŭn dŭh anŭ adi dog pirutung di ayŭh, isa ayŭh dŭh sirapas tana daya Ku ngga kinanyuh daya Ku.”

¹⁹Komŭnŭ daya anŭ taban aku ka tiban birit birit adi nura utara sindŭk tiban-bās di parad ka siratan badag darŭm. Birit birit anŭ inŭh birit kudus, yŭn bara imam. Ayŭh tiju ndi tarun di parad ka barat birit birit anŭ

²⁰ka nang, “Ati inŭh tarun yŭn bara imam tanŭk ngga piin dagin adi dog jugan ndu sadis ngga taran dosa bait sadis bayar gati rugi, ka ndai sadis tibaduk, isa mating kayuh kudus dog taban ka badag sapa, ka bada daya kinaman.”[109]

²¹Komŭnŭ ayŭh nguru aku ka badag sapa ka kiren di aku badag adi siit di barang pat sikuh badag sapa anŭ, adi 20 mita ambu-i ka 15 mita buka-i.

²³Barang badag anŭ biyŭn ndi sindung batuh maning-i, ngga tarun tarun yŭn tanŭk agi dog ndai ngapid-i.

²⁴Daya anŭ kidaan di aku, “Ati inŭh dapor dapor di yŭn daya tanŭk ngga piin dudu sadis adi daya jugan.”