Read Biatah Bidayuh EZEKIEL 47 Bible Online

EZEKIEL 47 - Biatah Bidayuh bible

EZEKIEL 47

¹ Daya anŭ taban aku pari ka tiban mŭrŭt Ramin TUHAN. Piin agi ruah so ribo tiban mŭrŭt ka aman nuju timor, parad adi Ramin TUHAN nura. Piin anŭ aman so ribo parad ka siratan Ramin TUHAN murah parad ka siratan mija-sambah.

²Daya anŭ taban aku ruah so tarun yŭn Ramin TUHAN so tiban-bās utara ka taban aku ka tiban-bās adi nura timor. Anak sungi aman ruah di bŭngŭn parad ka siratan tiban-bās anŭ.

³Pakai sikud pingŭkŭd-i daya anŭ ngŭkŭd 500 mita ka saba sungi anŭ nuju timor ka bada aku panu di piin so nŭ. Piin anŭ kŭd bukuh-siok ku adŭ.

⁴Komŭnŭ ayŭh ngŭkŭd 500 mita dinge ka saba, ka piin anŭ kŭd karŭb ku. 500 mita dinge, piin anŭ kŭd kupong ku.

⁵Ayŭh ngŭkŭd 500 mita dinge, ka diginŭ piin mbŭh raru tŭrŭp ka aku dŭh dapŭd panu, adŭ-i biranang.

⁶Ayŭh nang di aku, “Manusia, nakit ngatin sopŭrŭg kayuh ati.” Komŭnŭ daya anŭ taban aku pari ka tabing sungi anŭ,

⁷ka kan aku mbŭh diginŭ aku kiris raru bagŭ tŭngŭn kayuh di soduwŭh tabing.

⁸Ayŭh nang di aku, “Piin ati aman so deyŭh nuju timor mūn ka Rubān Jordan ngga Rawŭt Pide. Kan-i aman ka Rawŭt Pide, piin ati gati piin pide rawŭt anŭ ngga piin bisig sungi karangan.

⁹Di tadŭ yŭn piin anŭ aman, diginŭ agi barang masam dāng ngga iken. Piin anŭ re bada piin Rawŭt Pide jadi piin bisig sungi karangan, ka di tadŭ yŭn-i aman, diginŭ re agi kayuh udip.

¹⁰So rubang piin Engedi ndŭg ka rubang piin Eneglaim, diginŭ re agi pinakap iken di tabing rawŭt, ka ngara re dawan jaring diginŭ. Diginŭ re bagŭ masam iken nimun anŭ adi di Rawŭt Mediterranean.

¹¹Pak piin adi bitapo ka adi di padak adi sindŭk tabing rawŭt re dŭh jadi piin tibŭn. Piin anŭ re babŭ diginŭ jadi atak garo.

¹² Di soduwŭh tabing anak sungi anŭ bagŭ masam tŭngŭn kayuh adi bisa buān re timbu. Dawŭn-i re dŭh rayu, ka-i re dŭh rŭŭ buān. Tŭngŭn tŭngŭn anŭ re biyŭn buwa bauh barang buran, sabab-i dog misa piin so anak sungi adi aman so Ramin TUHAN. Buwa buwa tŭngŭn kayuh anŭ re jadi pinguman, ka dawŭn dawŭn-i re dog pakai ngga pibua daya.”

¹³TUHAN Raja nang, “Ati inŭh baat baat tana adi dog kutung di simŭng duwŭh tibaran-asar Israel, adi ngga tibaran-asar Joseph trima duwŭh utung.[110]

¹⁴Aku muko bipayu ngga tayung-babuk ngan nang Aku an nggen tana ati di ngara; madin kutung-i bada nyimati dupan adŭp ngan.

¹⁵“Baat di utara piguru so Rawŭt Mediterranean nuju timor ndŭg kupo Hethlon, ndŭg Ateng Hamath, ndŭg kupo Zedad,[111]

¹⁶ndŭg kupo Berothah ngga kupo Sibraim (ati duwŭh inŭh di asah tana pritah Damascus ngga pritah Hamath), ka kupo Ticon (sindŭk baat utung tana Hauran).

¹⁷Jadi baat di utara piguru so Mediterranean nuju timor ndŭg kupo Enon, ngga baat tana Damascus ngga Hamath di parad tura ka utara-i.

¹⁸“Baat timor nuju siratan piguru so ndi tarun yŭn di asah tana Damascus ngga tana Hauran, ngga Yang Jordan jadi baat di asah tana Israel tura ka barat ngga Gilead tura ka timor, jeh ndŭg Tamar[112] di Rawŭt Pide.

¹⁹“Baat siratan nuju siratan-barat piguru so Tamar ndŭg tubo-piin Kadesh Meribah, ka komŭnŭ nuju utara-barat nŭdŭs Baat Egypt ndŭg Rawŭt Mediterranean.

²⁰“Rawŭt Mediterranean jadi baat barat nuju utara ndŭg ndi tarun yŭn adi tura ka barat Ateng Hamath.

²¹“Kutung tana anŭ di dupan tibaran tibaran-asar ngan.

²²Tana anŭ, angān adu adu dapu. Daya tami adi rŭŭ di ruang ngan ka adi mbŭh biyŭn anak adi dog biranak di rais ati an dog nggen gŭh tung ngara utung kan kuu kutung tana anŭ. Ngara an dog nyirundeng tigŭrŭ daya Israel ka siŭn sua taran dadu ngga dapŭd utung tana samah tibaran tibaran-asar Israel.

²³Daya tami adi rŭŭ di ruang ngan siŭn dapŭd tung ngara utung samah ngga daya tibaran tibaran-asar adi ngga ngara rŭŭ. Aku, adi TUHAN Raja, mbŭh minyu.”