Read Biatah Bidayuh EZEKIEL 48 Bible Online

EZEKIEL 48 - Biatah Bidayuh bible

EZEKIEL 48

¹Baat utara tana anŭ piguru so Rawŭt Mediterranean nuju timor ndŭg kupo Hethlon, ndŭg Ateng Hamath, ndŭg kupo Enon, ndŭg baat di asah pritah Damascus ngga pritah Hamath. Barang tibaran-asar an trima ndi utung tana piguru so baat timor nuju Rawŭt Mediterranean,[113] nanyam ka susud ati so utara ndŭg siratan: Dan Asher Naphtali Manasseh Ephraim Reuben Judah

⁸Utung tana anŭ ndi an dog nitah yŭn guna adi grua. Tana anŭ an 12.5 kilomita buka-i so utara ndŭg siratan, ka simŭnŭ gŭh so timor ndŭg barat jadi utung utung dog nggen di barang tibaran-asar. Ramin TUHAN re di darŭm utung ati.

⁹Di yun utung ati, ndi tana adi grua adi 12.5 kilomita ambu-i ngga 10 kilomita[114] buka-i an dog nitah ka TUHAN.

¹⁰Bara imam an biyŭn ndi utung so tana kudus ati. So timor ndŭg barat, tung ngara utung, an 12.5 kilomita, ka so utara ndŭg siratan, an 5 kilomita. Ramin TUHAN an di yun tana ati.

¹¹Tarun tana kudus ati inŭh yŭn bara imam adi sesang Zadok. Ngara bituan di Aku ngga tŭtŭd ka mating sua ngga bara daya Israel adi bŭkŭn darŭm pingandai sarah, nimun ngara adi bŭkŭn so tibaran-asar Levi.

¹²Sabab anŭ ngara adi sesang Zadok an biyŭn ndi tana adi grua sindŭk tana adi dog dapu bara daya Levi, ka-i re adi siabo kudus.

¹³Bara daya Levi gŭh an biyŭn ndi tana adi grua, tura ka siratan anŭ adi tung bara imam. Anŭ gŭh an 12.5 kilomita so timor ndŭg barat, ngga 5 kilomita so utara ndŭg siratan.

¹⁴Tana adi dog nitah ka TUHAN inŭh adi siabo kana, ka mating so tadŭ tadŭ supek-i siŭn dog jua bait dog nyambi bait dog mindah ka tangan daya bŭkŭn. Tana anŭ kudus ka TUHAN inŭh adi dapu-i.

¹⁵Pire adi dŭm so tana adi grua anŭ, 12.5 kilomita ngga 2.5 kilomita, inŭh dŭh kudus, pak yŭn tadŭ mun kraja pingandai daya. Ngara bisa rŭŭ diginŭ ka pakai tana anŭ. Kupo an agi di yun-i,

¹⁶ka-i an misagi pat, ngga 2.25 kilomita di barang parad-i.

¹⁷Maning kupo anŭ di barang parad an agi asah tarun adi 125 mita bayah-i.

¹⁸Tana adi dŭm ripas kupo mbŭh dog pijog di tura ka siratan tana kudus anŭ inŭh 5 kilomita ngga 2.5 kilomita bayah-i di parad ka timor, ka 5 kilomita ngga 2.5 kilomita bayah-i di parad ka barat. Soduwŭh anŭ inŭh yŭn daya adi rŭŭ di kupo anŭ biteya birŭmŭh.

¹⁹Tadŭ tadŭ daya adi rŭŭ di kupo anŭ, dŭh mien so tibaran-asar aki ndi, bisa biteya birŭmŭh di tana anŭ.

²⁰Ka prungun tarun tana adi tura ka yun utung tana anŭ adi mbŭh dog nitah samŭn tana adi yŭn kupo anŭ an misagi pat, 12.5 kilomita di barang parad.

²¹Tana di parad ka timor ngga parad ka barat tadŭh anŭ adi yŭn Ramin TUHAN, yŭn bara imam, yŭn bara daya Levi, ka yŭn kupo, inŭh tung pinguasa adi mritah. Buka-i jeh ndŭg baat tura ka timor ka jeh ndŭg Rawŭt Mediterranean, di asah utung tana Judah di parad ka utara ngga utung tana Benjamin di parad ka siratan.

²³Parad ka siratan tana adi dog nitah anŭ, barang tibaran-asar an trima ndi utung so tana adi piguru so baat timor nuju barat jeh ndŭg Rawŭt Mediterranean, nanyam ka susud ati so utara ndŭg siratan: Benjamin Simeon Issachar Zebulun Gad

²⁸Di parad ka siratan supek tana adi dog nggen di tibaran-asar Gad, baat siratan-barat piguru so Tamar ndŭg tubo-piin Kadesh, ka komŭnŭ nuju utara-barat nŭdŭs baat Egypt ndŭg Rawŭt Mediterranean.

²⁹TUHAN Raja nang, “Simŭnŭ inŭh gaya tana anŭ an dog kutung di tibaran tibaran-asar Israel yŭn dapu.”

³⁰ Kupo Jerusalem biyŭn simŭng duwŭh aran mŭrŭt. Barang parad sindung-i 2.25 kilomita ambu ka biyŭn taruh tiban, ka barang tiban dog kadŭn tunda dŭn barang tibaran-asar Israel. Tiban tiban sindung tura ka utara dog kadŭn Reuben, Judah, ka Levi; tiban tiban sindung tura ka timor dog kadŭn Joseph, Benjamin, ka Dan; tiban tiban sindung tura ka siratan dog kadŭn Simeon, Issachar, ka Zebulun; ka tiban tiban sindung tura ka barat dog kadŭn Gad, Asher, ka Naphtali.

³⁵Prungun kŭd sindung di sopŭrŭg parad inŭh 9 kilomita. So madin kupo anŭ an dog kadŭn, “TUHAN agi digiti!”