Read Biatah Bidayuh EZEKIEL 5 Bible Online

EZEKIEL 5 - Biatah Bidayuh bible

EZEKIEL 5

¹TUHAN nang, “Manusia, tambit pedang adi reja ka pakai-i ngga gumbak gagap ka nundo ubak mu. Komŭnŭ nimbang ubok anŭ, ka kutung-i nyitaruh.

²Badang ndi utung-so-taruh ubok anŭ darŭm kupo anŭ kan pinyikapung anŭ mbŭh ripuan. Tambit ndi utung-so-taruh dinge ka nŭtŭb-i ngga pedang mu buang kuu panu maning kupo anŭ. Nabur ndi utung-so-taruh adi bŭkŭn di au-tarun, ka Aku re tadak-i ngga pedang Ku.

³Kidŭm kada ubok anŭ ka marut-i di sigŭn upet jipo mu.

⁴Komŭnŭ tambit kada-i ka taran di apui bada sau. So nŭ apui re mirarat ka badang barang naan bangsa Israel.”

⁵TUHAN Raja nang, “Tingga Jerusalem. Aku na-i di yun ong, ngga sopŭrŭg rais adi bŭkŭn maning-i.

⁶Pak Jerusalem rawan pesan Ku ka kiren adŭp-i rabis ginaka so bangsa bangsa bŭkŭn, rabis abah dingah pinganang so rais rais adi maning-i. Jerusalem tirawan pesan Ku ka abah sita ukum ukum-adat Ku.

⁷Dingah madin, Jerusalem, kayuh adi Aku, adi TUHAN Raja, nang. Darŭm kuu abah tunda ukum ukum-adat Ku bait abah sita pesan Ku, kuu mbŭh ndai rabis bagŭ pinyusah so adi dog ndai bangsa bangsa bŭkŭn adi maning kuu. Kuu mbŭh tunda adat bangsa bangsa bŭkŭn.

⁸Ngapŭi Aku, adi TUHAN Raja, kidaan di kuu nang Aku ati inŭh pinganyu mu. Aku re ngukum kuu di sirung jawin sopŭrŭg bangsa.

⁹Sabab sopŭrŭg kayuh adi kuu ndai adi Aku tiru, Aku re ngukum Jerusalem; gi-bŭn Aku ngukum Jerusalem mun anŭ, ka Aku re dŭh tia ndai simŭnŭ.

¹⁰ Sabab anŭ, pimas pimas di Jerusalem re man anak ngara, ka anak anak re man pimas ngara. Aku re ngukum kuu ka bada papar sasah asi asi adi babŭ udip.

¹¹“Aku ati inŭh Tapa adi udip -- ati inŭh pinganang TUHAN Raja -- sabab kuu nyembar Ramin Ku ngga barang masam pingandai arap ngga adi sipŭ, Aku re kapŭg kuu ngga dŭh kira masi.

¹²Ndi utung-so-taruh daya mu re kabŭs mandam ngga kabŭs sikirau darŭm kupo; ndi utung-so-taruh dinge re dog siŭ ngga pedang di sapa kupo; ka Aku re bada papar sasah ndi utung-so-taruh adi bŭkŭn ka barang yŭn, ka tadak ngara ngga pedang.

¹³“Kuu re kinyam bisā baji Ku ka magā Ku ndŭg ka Aku mbŭh puas. Kan sopŭrŭg kayuh anŭ jadi, kuu re ngaku Aku ati, adi TUHAN, mbŭh minyu ngga kuu sabab baji Ku di kurang pinyitŭtŭd mu.

¹⁴Sopŭrŭg ngara so bangsa bangsa bŭkŭn adi maning kuu adi murah re mijŭh kuu ka pijo adŭp ngara so kuu.

¹⁵“Kan Aku baji ka bangok di kuu ka ngukum kuu, sopŭrŭg bangsa maning kuu re taru. Ngara re tingga kuu buang ngamun kuu ka nyirimbe kuu.

¹⁶Aku re pirŭŭ pimandŭg pinguman mu ka bada kuu sikirau. Kuu[8] re kinyam andam sikirau keya ka reja-panah tabŭk kuu.

¹⁷ Aku re bada daya mu sikirau ka dāng dāng tarun re siŭ daya mu, ka bada andam, pinyiganas, ka perang siŭ kuu. Aku, adi TUHAN, mbŭh minyu.”