Read Biatah Bidayuh EZEKIEL 6 Bible Online

EZEKIEL 6 - Biatah Bidayuh bible

EZEKIEL 6

¹TUHAN minyu ngga aku.

²“Manusia,” Ayŭh nang, “tingga darŭd darŭd Israel ka nggen di ngara agah so Aku.

³Kidaan di darŭd darŭd Israel bada dingah pinganang TUHAN -- dingah kayuh adi Aku, TUHAN Raja, nang di dudu darŭd, sandah sandah, dau dau, ka rubān rubān: Aku re pait pedang bada nyirubuh tarun yŭn daya nyambah tibudo.

⁴Mija mija-sambah re dog nyirubuh ka mija mija-sambah kimanyan re dog mape. Sopŭrŭg daya diginŭ re dog siŭ di jawin tibudo ngara.

⁵Aku re bada mingare tadang tadang daya Israel; Aku re bada mingare turang turang ngara maning mija mija-sambah.

⁶Sopŭrŭg kupo Israel re dog pirabur, isa sopŭrŭg mija-sambah ngara ngga tibudo tibudo ngara dog mape bada asur, mija mija-sambah ngara re dog mapar, ka sopŭrŭg kayuh adi ngara ndai re miyap.

⁷Daya re dog siŭ di barang yŭn, ka ngara adi babŭ udip re ngaku Aku ati TUHAN.

⁸“Aku re tandah kada so ngara pirupas adŭp-i so dog siŭ ka papar sasah di dupan bangsa bangsa,

⁹di yŭn ngara re udip darŭm dog taran so rais adŭp ngara. Diginŭ ngara re ingat Aku ka puan nang Aku mbŭh ngukum ngara ka pimangŭh ngara,[9] sabab ngara dŭh tŭtŭd di Aku ka mbŭh tagan Aku ka raan dŭ di tibudo so di Aku. Ka ngara re sidot di adŭp-i sabab pingandai arap ngga adi kais adi mbŭh ngara ndai.

¹⁰Ngara re puan nang Aku ati TUHAN ka pinyibakan Ku dŭh-i kayuh adi dŭh biyŭn rati.”

¹¹TUHAN Raja nang, “Mŭrŭs tangan mu! Sigudab ngga kaja mu! Sien darŭm susah sabab sopŭrŭg kayuh adi arap ngga adi sipŭ daya Israel mbŭh ndai. Ngara re kabŭs darŭm perang, kabŭs sabab apag, ka kabŭs sabab andam.

¹²Ngara adi jo re mandam ka kabŭs; ngara adi sindŭk re dog siŭ darŭm perang; ngara adi babŭ udip re kabŭs sikirau. Ngara re kinyam bisā baji Ku.

¹³Tadang tadang re mingare di ruang karu tibudo ka maning mija mija-sambah, mingare di barang sandah adi bigatung, di tibung barang darŭd, di ribo tŭngŭn tŭngŭn kayuh barŭm ka di ribo tibande tŭngŭn oak, di barang tarun di yŭn ngara badang sadis yŭn tibudo ngara. Komŭnŭ barang naan daya re puan Aku ati TUHAN.

¹⁴Sawŭ, Aku re pakat tangan Ku ka pirabur rais ngara. Aku re bada-i jadi tarun tana-matung so tarun tana-pajam di siratan ndŭg kupo Riblah di utara, dŭh kidŭm tadŭ tarun adi yŭn daya Israel rŭŭ. Komŭnŭ barang naan daya re puan Aku ati TUHAN.”