Read Biatah Bidayuh EZEKIEL 7 Bible Online

EZEKIEL 7 - Biatah Bidayuh bible

EZEKIEL 7

¹TUHAN minyu ngga aku.

²“Manusia,” Ayŭh nang, “ati inŭh kayuh adi Aku, TUHAN Raja, nang di tarun tana Israel: ati inŭh pimungan yŭn ndi tarun tana rais ati!

³“Israel, pimungan mbŭh mandŭg. Kuu re kinyam baji Ku, sabab Aku bisara kuu amai kayuh adi kuu mbŭh ndai. Aku re maras kuu amai sopŭrŭg urah mu adi kais anŭ.

⁴Aku dŭh re pirupas kuu bait masi di kuu. Aku re ngukum kuu amai pingandai sipŭ adi mbŭh mu ndai, isa kuu puan Aku ati TUHAN.”

⁵Ati inŭh kayuh adi TUHAN Raja nang, “Pinyirusag re bitunda nyatŭk kuu.

⁶Sopŭrŭg-i mbŭh mungan. Ati inŭh pimungan mu. Mating tia pingarap mu.

⁷Pimungan mbŭh mandŭg ka angān adi rŭŭ di tarun tana ati. Tika-i mbŭh sindŭk kan gawai di bari-sambah di darŭd re mating tia, adŭ-i pito.

⁸“Dŭm dŭh tui angān re kinyam sopŭrŭg pinyibisā baji Ku. Aku re bisara angān amai kayuh adi angān mbŭh ndai, ka Aku re maras angān amai sopŭrŭg urah ngan adi kais anŭ.

⁹Aku dŭh re pirupas angān bait masi di angān. Aku re ngukum angān amai pingandai sipŭ adi mbŭh ngan ndai, isa angān puan Aku ati TUHAN, ka Aku ati adi ngukum angān.”

¹⁰Andu pinyirusag mbŭh aŭn mandŭg yŭn Israel. Pinyiganas mbŭh masang bagŭ. Pinyigambung aŭn parak,[10]

¹¹Pinyiganas bada udip ginaka rabis bagŭ. Sopŭrŭg pinyikaya, sangŭn-i, bragah-i re miyap.

¹²Tika-i mbŭh aŭn mandŭg. Andu-i mbŭh sindŭk adi ngga bibiris ngga bijua re dŭh tia biyŭn rati, sabab ukum Tapa re nyatŭk barang naan daya.

¹³Mating daya dagang re udip tui yŭn dapŭd pari rugi so dingan-i, sabab baji Tapa mbŭh nyatŭk barang naan daya. Ngara adi arap dŭh re siramat.[11]

¹⁴Trompet jawŭn, ka barang naan mbŭh sidia. Pak mating daya matak di biperang, amai baji Tapa re nyatŭk barang naan daya

¹⁵Agi biperang di aran raya, ka daya mandam ngga adi sikirau agi di ramin. Tadŭ daya di sapa tarun tana rais re kabŭs biperang, ka tadŭ daya di kupo re kabŭs mandam ka kabŭs sikirau.

¹⁶Kada re bikaduh bu ka darŭd mun manuk asang mikabur bu so rubān. Sopŭrŭg ngara re muās amai dosa ngara.[12]

¹⁷Tangan barang naan daya re ramah, ka karŭb ngara re kimŭtŭr.

¹⁸Ngara re nēn banang guni ka ndi pŭrŭng ganan ngara re kimŭtŭr. Ubak ngara re dog nundo, ka sopŭrŭg ngara re dog pimangŭh.

¹⁹Ngara re taran mas ngga pirak ngara mun sapok di aran, sabab pirak ngga mas dŭh dapŭd nyiramat ngara kan TUHAN kiren baji-I. Ngara dŭh dapŭd pakai-i ngga pimunos pinyiraan ngara bait ngisi tain ngara. Mas ngga pirak adi bada ngara bidosa.

²⁰Dawŭ-i ngara mingangŭn di ramus batuh batuh brega ngara, pak ngara pakai-i ngga ndai tibudo adi sipŭ. Anŭ sabab TUHAN mbŭh bada buat-rata ngara jadi kayuh adi sidot ngara kiris.

²¹“Aku re bada daya tami mirupak ngara,” nang TUHAN, “ka daya arap re tambit sopŭrŭg buat-rata ngara ka nyembar-i.

²²Aku re dŭh mbit piduri kan Ramin Ku adi siŭt Ku dog kinais, kan pirupak mŭrŭt ka nyembar-i.

²³“Ndi rais rais mbŭh bipito[13] -- di tarun tana mbŭh agi dudu pinyiŭ ka kupo kupo mbŭh puno ngga pinyiganas.

²⁴Aku re taban bangsa adi siabo arap kamati ka bada ngara rŭŭ di ramin ramin ngan. Daya ngan adi siabo bake re dŭh biyŭn pinyabah di adŭp ngara kan Aku bada bangsa bangsa bŭkŭn kinais tarun yŭn ngan bisambah.

²⁵Pingarap ngan re miyap. Angān re jiroh damai ka dŭh re dapŭd-i.

²⁶Pinyirusag re bitunda nyatŭk angān, ka agah arap re adu adu mandŭg. Angān re bada nabi nabi pinandŭng kayuh adi ngara diŭ kiris. Imam imam re dŭh biyŭn kayuh re-i ngajar di bara daya, ka bara nyamba re dŭh biyŭn pinganang pitayan re-i nggen.

²⁷Raja re muās, anak raja re manyap pingarap, ka bara daya re kimŭtŭr amai taru. Aku re ngukum angān amai sopŭrŭg kayuh adi angān mbŭh ndai, ka re bisara angān mun angān bisara daya bŭkŭn. Anŭ re kiren di angān Aku ati TUHAN.”