Read Biatah Bidayuh EZEKIEL 8 Bible Online

EZEKIEL 8 - Biatah Bidayuh bible

EZEKIEL 8

¹Di andu adi rimŭh darŭm buran nŭm darŭm sawa adi nŭm kieh dog taran, bara pinguru bara adi dog taran so Judah agi guru tikuruk di ramin ku. Gŭgŭh kuasa TUHAN Raja nguasa aku.

² Aku nyigura ka kiris keya ka darŭm pŭmŭh ndi gayŭn adi mun manusia. So kupong-i mūn ka sagān mun apui, ka so kupong maad ka sambu bringam mun timaga dog ngusu.

³Ayŭh ton kayuh mun tangan ka nakap aku di ubok. Komŭnŭ keya ka darŭm pŭmŭh roh Tapa pakat aku bigatung di au-tarun ka taban aku ka Jerusalem. Ayŭh taban aku ka tura ka darŭm tiban parad utara Ramin TUHAN, di yŭn tibudo adi bada Tapa baji dog pijog.

⁴ Diginŭ aku kiris jawa adi nyirinyak adi kiren bragah Tapa Israel, nimun adi muko aku kiris di andu aku di pang Yang Chebar.

⁵Tapa nang di aku, “Manusia, tingga ka parad utara.” Aku tingga, ka diginŭ sindŭk ndi mija-sambah di rawa tiban-bās aku kiris tibudo adi bada Tapa baji.

⁶Tapa nang di aku, “Manusia, kiris mu kah kayuh adi mbŭh jadi? Tingga pingandai sipŭ adi daya Israel ndai digiti, ngga bada Aku makin jo so tarun yŭn kudus Ku. Kuu re kiris rabis bagŭ kayuh adi arap so ati.”

⁷Ayŭh taban aku ka tiban mŭrŭt badag adi tura ka sapa ka kiren di aku ndi rubang di sindung.

⁸Ayŭh nang, “Manusia, bada baga rubang sindung ati.” Aku bada-i baga, ka kiris ndi tiban.

⁹Ayŭh nang di aku, “Mŭrŭt ka tingga pingandai arap anŭ, kayuh adi sipŭ adi ngara ndai diginŭ.”

¹⁰Jadi aku mŭrŭt ka tingga. Sindung sindung dog nutu gambar gambar dudu jippŭh ka dāng dāng adi bŭkŭn adi kais,[14] ka kayuh kayuh adi bŭkŭn adi daya Israel nyambah.

¹¹Ju puru naan pinguru daya Israel agi diginŭ, samŭn Jaazaniah anak Shaphan. Barang naan ngara digŭng bŭrŭh yŭn badang kimanyan, ka asuh makat so kimanyan anŭ.

¹²Tapa siken aku, “Manusia, kiris mu kah kayuh adi daya Israel ndai darŭm bisukan? Ngara bisambah darŭm birit adi puno ngga masam masam gayŭn kayuh. Sŭn ngara nang, ‘TUHAN dŭh kiris ata! Ayŭh mbŭh tagan rais ta.’ ”

¹³Komŭnŭ TUHAN nang di aku, “Kuu re kiris ngara ndai kayuh adi rabis sipŭ so anŭ.”

¹⁴Jadi Ayŭh taban aku ka tiban Ramin TUHAN adi tura ka utara ka kiren di aku bara dayung muās pinyikabŭs tapa Tammuz.[15]

¹⁵Ayŭh nang, “Manusia, kiris mu kah anŭ? Kuu re kiris adi rabis sipŭ dinge.”

¹⁶Jadi Ayŭh taban aku ka badag Ramin TUHAN adi tura ka darŭm. Diginŭ sindŭk tiban mŭrŭt yŭn adi kudus, di asah mija-sambah ngga aran-tambus, agi duwŭh puru-rimŭh naan daya. Ngara nyipunok yŭn kudus anŭ ka sidikang nura ka timor, nyambah batŭh andu makat.

¹⁷TUHAN nang di aku, “Manusia, kiris mu kah anŭ? Bara daya Judah ati dŭh puas asŭng ndai anŭ adi kuu kiris tejah samŭn pingandai ganas di ndi tarun tana rais. Tanŭ kah ngara dŭh siŭn dŭh mandŭg ka ndai-i digiti darŭm Ramin Ku ka bada Aku rabis baji. Tingga munki masam ngara pimangŭh Aku ngga pingandai adi raru sipŭ anŭ![16]

¹⁸Ngara re kinyam bisā baji Ku. Aku dŭh re tandah bait masi di ngara. Ngara re nyirais ngga situngang ngara nang dua ka Aku, pak Aku dŭh re dingah ngara.”