Read Biatah Bidayuh EZEKIEL 9 Bible Online

EZEKIEL 9 - Biatah Bidayuh bible

EZEKIEL 9

¹Komŭnŭ aku dingah Tapa nyirais nang, “Mandŭg kamati, angān adi re ngukum kupo ati. Taban sinyata ngan.”

²Nŭm naan daya rasu mandŭg so tiban-bās sapa Ramin TUHAN tura ka utara. Ayō ngara ndi naan daya nēn piraka banang linen, taban kayuh ngga nuris. Sopŭrŭg ngara mandŭg ka mijog sindŭk mija-sambah timaga.

³Komŭnŭ jawa bragah Tapa Israel makat so cherubim,[17] so yŭn-i anŭ, ka nyirinyak nuju tiban mŭrŭt Ramin TUHAN. TUHAN bagan daya anŭ adi nēn piraka banang linen,

⁴ “Panu ka barang yŭn darŭm kupo Jerusalem ka na tandā di arŭ barang naan daya adi susah ka adi bipito sabab sopŭrŭg kayuh sipŭ adi dog ndai darŭm kupo.”

⁵Ka aku dingah Tapa nang di ngara adi bŭkŭn, “Tunda ayŭh panu darŭm kupo, ka siŭ sopŭrŭg daya. Dŭhnyah masi di asi asi.

⁶Siŭ daya adi minyamba, adi mara, sindŭ daya, ka anak anak daya. Pak dŭhnyah nyingŭg ngara adi biyŭn tandā di arŭ ngara. Piguru so ti, so Ramin Ku.” Jadi ngara piguru ngga bara pinguru adi mijog diginŭ darŭm Ramin TUHAN.

⁷Tapa nang di ngara, “Nyembar Ramin TUHAN. Ngisi badag-i ngga tadang tadang daya. Ndai meh anŭ madin!” Jadi ngara piguru siŭ bara daya adi darŭm kupo anŭ.[18]

⁸Sitadŭn ngara siŭ daya, aku agi diginŭ sadi adŭp ku. Aku sidikang ka nyirais, “TUHAN Raja, Kaam mbŭh raru baji kah di Jerusalem ndŭg ka Kaam re siŭ sopŭrŭg daya adi babŭ udip di Israel?”

⁹Tapa nam, “Daya Israel ngga Judah mbŭh ndai dosa adi raru bās. Ngara inŭh pinyiŭ ka mbŭh ngisi Jerusalem ngga pingandai adi sarah. Ngara nang Aku, adi TUHAN, mbŭh tagan rais ngara ka nang Aku dŭh kiris ngara.

¹⁰Pak Aku dŭh re masi di ngara; Aku re ndai di ngara kayuh adi ngara ndai di daya bŭkŭn.”

¹¹Komŭnŭ sianŭ adi nēn piraka banang linen pari ka nggen puan di TUHAN, “Aku mbŭh ndai nanyam ka pinyibada Mai.”