Read Biatah Bidayuh DANIEL 10 Bible Online

DANIEL 10 - Biatah Bidayuh bible

DANIEL 10

¹(Darŭm sawa adi taruh Cyprus jadi raja-empaya Persia, ndi pinganang dog pinandŭng di Daniel, adi dog kadŭn gŭh Belteshazzar. Pinganang anŭ sawŭ pak raru mbar dog mirati.[23] Kayuh anŭ dog kidaan rati-i di ayŭh darŭm kayuh adi dog kiris keya ka darŭm pŭmŭh.)

²Di tika anŭ, aku aŭn ngurid taruh minggu.

³Aku dŭh man pinguman adi sidi bait tadŭ tadŭ dagin, dŭh nok wain, bait nyinod ubok ku ndŭg ka taruh minggu mbŭh ripuan.

⁴Di andu adi 24 darŭm sibungas buran sawa anŭ, aku mijog di tabing Yang Tigris adi baga anŭ.

⁵ Aku nyigura ka kiris daya nēn piraka banang linen ka abŭt kupong-i tigŭrŭ mas.

⁶Pŭrŭng ganan-i bringam mun batuh brega. Jawin-i jawa mun kirab kijat, ka batŭh-i bijireb mun apui. Tangan ngga kaja-i bringam mun timaga adi ko dog ngusu, ka sirŭŭn-i sak jawŭn sirŭŭn bara daya bagŭ.

⁷Aku sadi adŭ adi kiris kayuh anŭ adi keya ka darŭm pŭmŭh. Ngara adi ayō aku dŭh kiris ani ani, pak ngara mbŭh raru taru ka bikaduh bu di bisukan.

⁸Aku dog tingge sadi adŭp ku diginŭ, tingga kayuh saruh anŭ adi keya ka darŭm pŭmŭh. Aku mbŭh raru ramah, ka jawin ku mbŭh birubah ndŭg ka daya dŭh natŭng aku.

⁹Kan aku dingah sirŭŭn-i, aku tumbang ka sipŭŭb diginŭ di tana dŭh rada tarun.

¹⁰Komŭnŭ agi tangan tama aku ka turung aku makat bisangan di tangan ngga kaja ku; aku gibabŭ kimŭtŭr.

¹¹Malaikat anŭ nang di aku, “Daniel, Tapa rindu kuu. Mijog ka dingah nakit kayuh adi re ku nang. Aku mbŭh dog pait ka yŭn mu.” Kan ayŭh mbŭh nang sakanŭ, aku makat mijog, babŭ kimŭtŭr.

¹²Komŭnŭ ayŭh nang, “Daniel, dŭhnyah taru. Tapa mbŭh dingah dua mu so andu mu pirapat adŭp mu an mirati kayuh adi dog kiris keya ka darŭm pŭmŭh anŭ. Aku mbŭh mandŭg jadi pinyinam yŭn dua mu.

¹³ Malaikat adi tukang kingat pritah Persia matah aku duwŭh puru ndi andu. Komŭnŭ Michael, ndi naan so bara pingubak malaikat, mandŭg di turung aku, sabab aku mbŭh dog tingge sadi adŭp ku di Persia.

¹⁴Aku mbŭh mandŭg an bada kuu mirati kayuh adi re jadi di daya mu ju. Kayuh anŭ adi dog kiris keya ka darŭm pŭmŭh inŭh pasar kayuh adi re.”

¹⁵Darŭm ayŭh nang sakanŭ, aku tingga tana, dŭh dapŭd nang ani ani.

¹⁶Komŭnŭ malaikat anŭ, adi mun manusia, ton tangan-i ka tama bibis ku. Aku nang di ayŭh, “Tuan, kayuh adi kiris ku anŭ keya ka darŭm pŭmŭh mbŭh bada aku raru ramah ndŭg ka dŭh ko ko kimŭtŭr.

¹⁷Aku mbŭh keya ka urun mijog di sirung jawin tuan-i. Simuki aku re minyu ngga kaam? Aku mbŭh ramah ka dŭh tungang ngasŭng.”

¹⁸Ayŭh tama dinge aku, ka aku rasu pari bake.

¹⁹Ayŭh nang, “Tapa rindu kuu, ka dŭhnyah kuu susah bait taru.” Kan ayŭh nang sakanŭ, aku kinyam adŭp ku bitambah rabis bake ka nang, “Tuan, kidaan di aku kayuh adi re mai nang. Kaam mbŭh nggen di aku pinyibake.”

²⁰Ayŭh nang, “Puan mu kah mani aku mandŭg ka yŭn mu? Aku mandŭg an pinandŭng kayuh adi dog nuris darŭm Surat Pinyawŭ. Madin aku re pari di rawan malaikat adi tukang kingat Persia. Muko anŭ, malaikat adi tukang kingat Greece re timbur. Mating daya re turung aku adŭ-i Michael, malaikat adi tukang kingat Israel.[24]