Read Biatah Bidayuh DANIEL 11 Bible Online

DANIEL 11 - Biatah Bidayuh bible

DANIEL 11

¹Ayŭh inŭh[25] dapu tanggong turung ka ngibān aku.

²Ka kayuh adi aku re kidaan di kuu madin inŭh sawŭ.” Malaikat anŭ nang, “Dŭm taruh naan raja re mritah Persia, dog tunda anŭ adi numbor pat, adi re jadi rabis kaya so sopŭrŭg ngara adi bŭkŭn. Kan ayŭh mbŭh sukup bikuasa buang kaya ayŭh re natang pritah Greece.

³“Komŭnŭ raja pimagan re timbur. Ayŭh mritah tibande empaya ka ndai masam masam kayuh ngga suka asŭng-i.

⁴Pak kan ayŭh mbŭh sukup bikuasa empaya-i re pape nyikupat. Raja raja adi dŭh sesang-i re mritah gati ayŭh, pak ngara dŭh re biyŭn kuasa mun jangi.

⁵“Raja Egypt re jadi bitambah bake. Pak ndi naan so bara pingubak soldadu-i re jadi rabis bake ka mritah pritah adi rabis baga.

⁶Kudu kudu sawa ripas anŭ raja Egypt re bipambit ngga raja so Syria ka bada anak dayung-i banan ngga raja anŭ. Pak pambit anŭ dŭh re tui, ka ayŭh, banŭh-i, anak-i,[26] ngga bara urun adi tunda ayŭh re dog siŭ.

⁷Dŭh tui ripas anŭ, ndi so bara madis-i re jadi raja. Ayŭh re nyerang bara tibaran soldadu Syria, mŭrŭt kuta ngara, ka ngarah ngara.

⁸Ayŭh re taban pari ka Egypt dudu patong tapa tapa ngara ngga kayuh kayuh adi dog ndai so mas ngga pirak adi dog nitah ka tapa tapa ngara. Ripas kudu kudu sawa udip darŭm damai

⁹raja di Syria re nyerang Egypt, pak ayŭh re pari ka rais adŭp-i.

¹⁰“Anak anak raja Syria re sidia yŭn biperang ka ndai tibaran bara soldadu adi raru bagŭ. Ndi naan so ngara re nyurong mun uba ka nyerang kuta kuta pinganyu.

¹¹Darŭm baji-i raja so Egypt re matak biperang rawan raja Syria ka ngarah bara tibaran soldadu bās-i anŭ.

¹²Ayŭh re mingangŭn pasar pimanang-i ka pasar bara soldadu adi-i mbŭh siŭ, pak ayŭh dŭh re adu adu manang.

¹³“Raja Syria re mari ka ndai bara tibaran soldadu adi rabis bās so anŭ. Kan tipuh-i mbŭh mandŭg, ayŭh re pari ngga tibaran adi bās ka adi sukup bisinyata.

¹⁴Di tika anŭ bagŭ daya re rawan pritah raja Egypt. Ka kada so ngara adi ganas so bangsa mu, Daniel, re rawan pritah sabab kayuh adi dog kiris keya ka darŭm pŭmŭh, pak ngara re dog ngarah.

¹⁵Jadi raja so Syria re nyerang kupo adi bikuta ka sirabut-i. Bara soldadu Egypt dŭh re adu adu biperang; sirabi ka ngara adi siabo pandai biperang dŭh gŭh re tia sukup bake.

¹⁶Daya Syria anŭ adi nyerang re ndai nanyam suka asŭng-i, ka mating daya re tungang rawan ayŭh. Ayŭh re mijog di Tarun Tana adi dog Janji ka-i re abo di ribo kuasa-i.

¹⁷“Raja so Syria re bisatur an masang nyerang bara pinganyu-i ngga sopŭrŭg bara tibaran soldadu-i. Komŭnŭ, ngga pirabur pritah pinganyu-i, ayŭh re ndai pambit ngga pinganyu-i ka bada anak dayung-i[27] banan ngga pambit-i anŭ pak pusar-i dŭh re mujur.

¹⁸Ripas anŭ ayŭh re nyerang bangsa bangsa bŭkŭn so rawŭt ka ngarah bagŭ bangsa anŭ. Pak pinguru, adi daya tami, re ngarah ayŭh ka pirŭŭ gambung-i; sawŭ ayŭh re bada gambung raja Syria pari nyatŭk adŭp-i.[28]

¹⁹Raja re pari ka kuta kuta di tarun tana adŭp-i, pak ayŭh re dog ngarah, ka anŭ inŭh re pimungan-i.

²⁰“Ayŭh re dog gati raja adi bŭkŭn, adi re pait ndi naan pingubak bada kinanyuh bara daya ngga suke ngga nambah pinyikaya pritah. Dŭh tui ripas anŭ raja anŭ re dog siŭ, pak dŭh so pinyipuan daya bagŭ puan kah darŭm perang.”

²¹Malaikat pijuu kidaan: “Raja Syria adi ripas anŭ re daya adi arap ka daya adi dŭh biyŭn hak jadi raja, pak ayŭh re tapŭ mandŭg ka sirapas kuasa ngga tipu.

²²Daya adi matah ayŭh, bait-i Imam Bās Tapa, re dog taran ka dog siŭ.

²³Ngga pekat-damai, ayŭh re nipu bangsa bangsa bŭkŭn ka re jadi bitambah bake sunggu-i ayŭh mritah bangsa adi siit.

²⁴Ayŭh re nyerang utung tarun tana ngga nyirŭgŭh ka re ndai kayuh adi bŭn tayung babuk-i ndai. Komŭnŭ ayŭh re kutung dupan bara pinunda-i dudu kayuh ngga buat-rata adi ayŭh mbŭh sirapas darŭm perang. Ayŭh re ndai pusar-i an nyerang kuta kuta, pak tipuh-i re rikas mungan.

²⁵“Ayŭh re ngga atin birani ndai ndi tibaran bara soldadu adi raru bagŭ ka nyerang raja Egypt, adi re sidia an rawan ayŭh pari ngga bara tibaran soldadu adi bās buang bake. Pak raja so Egypt re dog nipu ka dŭh mujur.

²⁶Daya-i adi tukang pitayan ka adi sukup rapat ngga ayŭh re pirabu ayŭh. Bagŭ so bara soldadu-i re dog siŭ, ka bara tibaran soldadu-i re abo kabŭs.

²⁷Komŭnŭ duwŭh naan raja anŭ re samah guru man di ndi mija, pak pinŭtŭn ngara re arap, ka re kadong dingan-i. Ngara dŭh re dapŭd kayuh adi ngara raan, sabab tipuh-i gibayuh mandŭg.

²⁸Raja so Syria re mari ngga sopŭrŭg kayuh adi dog sirapas, bigŭtŭ an nyirubuh adat daya Tapa. Ayŭh re ndai nanyam suka asŭng-i ka pari ka tarun tana adŭp-i.

²⁹“Dŭh tui ripas anŭ ayŭh re nyerang Egypt, pak kari ati kayuh dŭh re mun adi mbŭh.

³⁰Bara daya Roman re mandŭg ngga dudu kapar ka nyerang ayŭh, ka ayŭh re taru. “Komŭnŭ ayŭh re pari ngga baji ka suba an nyirubuh adat daya Tapa. Ayŭh re tunda pinyitayan ngara adi tagan adat anŭ.

³¹ Kada so bara soldadu-i re nyembar Ramin TUHAN. Ngara re pirŭŭ sadis barang andu ka pijog Pinyembar adi Raru Sipŭ diginŭ[29]

³²Ngga aran tipu raja re dapŭd batu so ngara adi mbŭh tagan adat ngara, pak ngara adi tunda Tapa re rawan ngara.

³³Pinguru pinguru adi bijak re kutung pinyibijak ngara ngga bagŭ daya. Pak agi gŭh andu-i kada so ngara re agi dog siŭ darŭm perang puan kah dog badang bada kabŭs, ka kada re dog mirupak ka jadi daya-takap.

³⁴Di tipuh ngara dog siŭ, daya Tapa re kambat nisŭ pinurung, sunggu bagŭ adi sua ngga ngara batur-i ndai simŭnŭ ngga atin sibut adŭ.

³⁵Kada so bara pinguru adi bijak anŭ re dog siŭ, pak so ka kayuh adi mun anŭ daya re dog pibisig. Kayuh anŭ re babŭ mun anŭ ndŭg ka pimungan-i, tika adi Tapa mbŭh miratak.

³⁶ “Raja Syria re ndai nanyam suka asŭng-i. Ayŭh re mingangŭn adŭp-i bās dŭ so tadŭ tadŭ tapa, bigatung dŭ so Tapa adi Siabo Bigatung. Ayŭh re tungang ndai simŭnŭ ndŭg ka andu adi ngga Tapa ngukum ayŭh. Tapa re ndai nimun adi mbŭh-I ngatur.

³⁷Raja re nyibireu tapa tayung babuk-i, ka simŭnŭ gŭh ngga tapa adi bara dayung rindu. Ayŭh taŭn re nyibireu sopŭrŭg tapa, sabab ayŭh pikir adŭp-i bās dŭ so ngara.

³⁸Pak ayŭh re stabi di tapa adi grindung kuta. Ayŭh re jugan mas, pirak, batuh adi brega, ngga pinganggen adi bās ka tapa adi tayung babuk-i bŭn nyambah.

³⁹Ayŭh re bada daya adi nyambah tapa saruh jaga kuta kuta-i. Ayŭh re nggen pangkat bās di ngara adi ngaku ayŭh pimritah, nggen di ngara kuasa di tunduh bara daya ka ngupah ngara ngga tana.

⁴⁰“Kan tipuh raja Syria mbŭh re mungan, raja so Egypt re nyerang ayŭh, ka raja Syria re maras serang anŭ ngga sopŭrŭg kuasa-i, pakai krita krita kuda, dudu kuda, ngga dudu kapar. Ayŭh re nyerang bagŭ rais, mun piin uba nyarab.

⁴¹Ayŭh re nyerang gŭh Tarun Tana adi dog Janji ka siŭ biribu ribu daya, pak rais Edom, Moab, ngga daya adi dŭm di Ammon re siramat.

⁴²Kan ayŭh nyerang sopŭrŭg rais anŭ, Egypt dŭh gŭh re dog tandah.

⁴³Ayŭh re tambit sopŭrŭg rata Egypt adi dog sukan, mun mas, pirak ngga rata rata brega adi bŭkŭn. Ayŭh re ngarah Libya ngga Ethiopia.

⁴⁴Komŭnŭ agah adi mandŭg so timor ngga utara re pirawan ayŭh, ka ayŭh re bandar bandar biperang, siŭ bagŭ daya.

⁴⁵Ayŭh re pijog tibande bari bari-i di asah rawŭt ngga sandah adi yŭn Ramin TUHAN mijog. Pak ayŭh re kabŭs, ka mating daya re turung ayŭh.”