Read Biatah Bidayuh DANIEL 4 Bible Online

DANIEL 4 - Biatah Bidayuh bible

DANIEL 4

¹Raja Nebuchadnezzar pait pinganang ati ka bara daya so barang bangsa, kaum, ngga piminyu di ndi ong ong: “Tabi!

²Dingah dundan ku pasar pingandai saruh ngga pingandai-nginga adi Tapa adi Siabo Bigatung mbŭh kiren di aku.

³“Munki masam bās-i pingandai saruh adi Tapa kiren di aku! Munki masam saruh-i pingandai-nginga adi-I ndai! Tapa inŭh raja ndŭg situi tui; Ayŭh re adu adu mritah.

⁴“Aku tian-ti udip sanang di istana ku, biyŭn barang masam kayuh.

⁵Pak aku agi pŭmŭh arap ka kiris kayuh keya ka darŭm pŭmŭh kayuh adi pitaru.

⁶Aku nggen ukum bada sopŭrŭg daya ku adi tukang pitayan di Babylon dog taban ka yŭn ku isa ngara bisa kidaan di aku rati pŭmŭh anŭ.

⁷Komŭnŭ sopŭrŭg adi tukang kidaan nasip, bara pinanung, bara dukun, ngga bara adi puan pasar bitang dog taban mŭrŭt, ka aku kidaan di ngara pŭmŭh ku, pak ngara dŭh tungang kidaan rati-i di aku.

⁸Komŭnŭ Daniel mŭrŭt. (Ayŭh adi dog kadŭn gŭh Belteshazzar, tunda dŭn tapa ku.) Roh bara tapa adi kudus[4] agi di ayŭh, jadi aku kidaan di ayŭh kayuh adi aku nyipŭmŭh. Aku nang di ayŭh:

⁹Belteshazzar, kuu adi pingubak bara adi tukang kidaan nasip, aku puan roh bara tapa adi kudus[5] agi di kuu, ka kuu mirati sopŭrŭg rusia. Ati inŭh[6] pŭmŭh ku. Kidaan di aku ani rati-i.

¹⁰“Darŭm aku bŭŭs, aku kiris ndi tibande tŭngŭn kayuh di yun ong.

¹¹Tŭngŭn kayuh anŭ jadi dŭ dŭ baga ndŭg ka bigatung ndŭg rangit ka tungang dog kiris sopŭrŭg daya di ong.

¹²Dawŭn dawŭn-i ramus, ka mbŭh sarad ngga buwa, dang ngga paan barang naan daya di ong. Dāng tarun rŭŭ di sayung-i, manuk ndai sarin di daan-i, ka barang masam anŭ adi udip man buwa-i.

¹³“Darŭm aku bipikir pasar kayuh adi aku kiris anŭ, aku kiris ndi malaikat mun so shorga, adi gringet ka adi taŭn marar bijaga.

¹⁴Ayŭh kidaan ngga sirŭŭn bana, ‘Tabŭng tŭngŭn kayuh anŭ ka japa kadi dudu daan-i; piruruh dawŭn-i ka bada mingare buwa-i. Kasig dāng dāng so ribo-i ka manuk manuk so daan-i.

¹⁵Pak tandah tŭŭd-i di tana, ka marut-i ngga parik basi ka timaga. Tandah-i diginŭ di tarun tana kupai. “ ‘Madin bada daya anŭ dog sipot-abun, ka bada ayŭh udip bigaur ngga dāng ka anak anak kayuh-udip.

¹⁶Sitŭkŭd ju sawa ayŭh re dŭh biyŭn pikir manusia, pak pikir dāng.

¹⁷Anŭ inŭh pingatur bara malaikat adi gringet ka adi marar bijaga. Jadi meh, isa-i sopŭrŭg daya di barang yŭn puan Tapa adi Siabo Bigatung biyŭn kuasa di tunduh pritah manusia ka biyŭn kuasa nggen-i di tadŭ daya adi-I mien, samŭn ngara adi siabo sŭ darŭm pangkat.’

¹⁸“Anŭ inŭh pŭmŭh ku,” Raja Nebuchadnezzar nang. “Madin, Belteshazzar, kidaan di aku rati-i. Mating so bara daya ku adi tukang pitayan tungang kidaan rati-i di aku, pak kuu tungang, sabab roh bara tapa adi kudus[7] agi di kuu.”

¹⁹Dingah sakanŭ, Daniel, adi dog kadŭn gŭh Belteshazzar, mbŭh raru gŭgŭh ndŭg ka dŭh dapŭd nang ani ani. Raja nang di ayŭh, “Belteshazzar, dŭhnyah bada pŭmŭh anŭ ngga rati-i bada kuu gŭgŭh.” Belteshazzar nam, “Tuan Raja, aku harap pŭmŭh anŭ ngga rati-i pasar pinganyu mai ka dŭh pasar kaam.

²⁰Tŭngŭn kayuh anŭ, raru bigatung ndŭg rangit, tungang dog kiris sopŭrŭg daya di ong.

²¹Dawŭn-i ramus, ka-i biyŭn buwa dang ngga paan daya di ndi ong ong. Dāng tarun rŭŭ di ribo-i, ka manuk bisarin di daan-i.

²²“Tuan Raja, kaam inŭh tŭngŭn kayuh anŭ, bigatung ka bake. Ka bās mai mbŭh bitambah ndŭg rangit, ka kuasa mai mbŭh di ndi ong ong.

²³Darŭm Tuan Raja tingga, malaikat mūn so shorga ka nang, ‘Tabŭng tŭngŭn kayuh anŭ ka pirusak-i, pak tandah tŭŭd-i di tana. Marut-i ngga parik basi ka timaga, ka tandah-i diginŭ di tarun tana kupai. Tandah daya anŭ dog sipot-abun, ka bada ayŭh rŭŭ diginŭ ngga dāng sitŭkŭd ju sawa.’

²⁴“Ati inŭh rati-i, Tuan Raja, ka ati inŭh kayuh adi Tapa adi Siabo Bigatung mbŭh kidaan di kaam nang re jadi.

²⁵Kaam re dog pibu so dupan bara manusia ka re udip bigaur ngga dudu dāng tarun. Sitŭkŭd ju sawa kaam re man kupai mun sapi, ka bŭŭs di sapa tarun ka bisa bada sipot-abun. Komŭnŭ kaam re ngaku Tapa adi Siabo Bigatung biyŭn kuasa di tunduh sopŭrŭg pritah manusia, ka biyŭn kuasa nggen-i di tadŭ daya adi-I mien.

²⁶Malaikat anŭ nggen ukum bada tŭŭd anŭ dog tandah di tana. Rati-i kaam re jadi raja dinge kan kaam ngaku Tapa mritah ndi ong ong.

²⁷Jadi meh, Tuan Raja, tunda pinyitayan ku. Dŭh tia bidosa, ndai kayuh adi batur, ka masi di daya adi sirata.[8] Simŭnŭ kaam re adu adu mujur.”

²⁸Sopŭrŭg kayuh anŭ sawŭ jadi di Raja Nebuchadnezzar.

²⁹Simŭng duwŭh buran ripas anŭ, darŭm ayŭh panu di tibung[9] istana-i di Babylon,

³⁰ayŭh nang, “Tingga munki masam bās-i Babylon! Aku pijog-i ndu sindŭ kupo ngga kiren kuasa ka pinyibake ku, ngga kiren bragah ka sangŭn ku.”

³¹Darŭm raja minyu sakanŭ, sirŭŭn dog dingah minyu so shorga, “Raja Nebuchadnezzar, dingah kayuh adi Aku nang! Kuasa-raja mu madin mbŭh dog tambit so kuu.

³²Kuu re dog pibu so dupan bara manusia, udip bigaur ngga dudu dāng tarun, ka man kupai mun sapi sitŭkŭd ju sawa. Komŭnŭ kuu re ngaku nang Tapa adi Siabo Bigatung biyŭn kuasa di tunduh pritah manusia ka biyŭn kuasa nggen-i di tadŭ daya adi-I mien.”

³³Pinganang anŭ rasu jadi bitŭtŭk. Nebuchadnezzar dog pibu so dupan bara manusia ka man kupai mun sapi. Pŭrŭng ganan-i bisa bada sipot-abun, ka ubok-i jadi ambu mun buruh beuh ka siruh-i ambu mun siruh manuk.

³⁴“Kan ju sawa anŭ mbŭh ripuan,” raja nang, “aku nyigura ka rangit, ka pikir-kira ku pari mun adi dawŭ-i. Aku muji Tapa adi Siabo Bigatung ka nggen stabi ngga bragah di Ayŭh adi udip ndŭg situi tui. “Ayŭh re mritah ndŭg situi tui, ka pritah-I re tan adu adu.

³⁵Ayŭh tingga daya di ong keya ka au-tarun; malaikat di shorga ngga manusia di ong inŭh di ribo kuasa-I. Mating daya dapŭd nyakar pinyiraan-I puan kah ngika pingandai-I.

³⁶“Kan pikir-kira ku mbŭh pari mun adi dawŭ-i, bās ku, sangŭn ku, ka bragah pritah ku dog nggen pari ka aku. Bara pinurung ku ngga bara pingibās ku kambat aku, ka aku dog nggen pari kuasa-raja ku, ngga stabi adi rabis so adi mbŭh.

³⁷“Ka madin, aku, Nebuchadnezzar, muji, stabi, ka nyibragah Raja Shorga. Barang masam kayuh adi ndai-I inŭh batur buang kana, ka Ayŭh dapŭd pirapat daya adi udip sambuh.”