Read Biatah Bidayuh DANIEL 6 Bible Online

DANIEL 6 - Biatah Bidayuh bible

DANIEL 6

¹Darius ndai pikir-i an tijuan 120 bara gabenor bada mritah ndi tarun tarun darŭm empaya-i.

²Nambah ka anŭ, ayŭh mien Daniel ngga duwŭh naan adi bŭkŭn bada tukang ngatur kraja bara gabenor anŭ ka adi tukang kingat pinyiraan raja.

³Daniel rasu mbŭh tatŭng pandai dŭ ndai kraja so bara gabenor samŭn ngara adi tukang ngatur kraja gabenor. Sabab ayŭh pandai dŭ, raja mbŭh bipikir an bada ayŭh tukang nguasa ndi tarun tana empaya-i.

⁴Komŭnŭ bara adi tukang ngatur kraja bara gabenor ngga adŭp bara gabenor suba jiroh arap Daniel di gaya-i ndai kraja yŭn empaya, pak ngara dŭh dapŭd, sabab Daniel inŭh daya adi bisa dog sabah ka dŭh ndai sarah buang-i daya adi jujur.

⁵Ngara nang dupan adŭp-i, “Ata dŭh dapŭd jiroh arap Daniel ngga nyarah ayŭh adŭ-i kayuh adi tura ka adat-i.”

⁶Jadi ngara di ka yŭn raja ka nang, “Tabi Tuan Raja Darius!

⁷Sopŭrŭg ami adi ndai kraja yŭn empaya mai -- bara adi tukang ngatur kraja bara gabenor, bara gabenor, bara pinurung gabenor, ka bara pinurung adi bŭkŭn -- mbŭh situju di Tuan Raja patut piruah atur ka bada-i batur batur dog tunda. Nggen ukum dŭh nyibandar sitian taruh puru andu daya mite kayuh so tadŭ tadŭ tapa puan kah so tadŭ tadŭ daya, adŭ-i so kaam adi Tuan Raja. Daya adi rawan atur anŭ dŭh siŭn dŭh dog taran ka darŭm rubang singah.

⁸Mite Tuan Raja ndai atur anŭ ka na tandā-tangan mai dieh, ka-i re dog pimanu, ukum-adat daya Media ngga daya Persia, adi dŭh siŭn dog ngubah.”

⁹Jadi Raja Darius na tandā tangan-i di atur anŭ.

¹⁰Kan Daniel dingah atur anŭ mbŭh dog na tandā-tangan dieh, ayŭh maad. Di birit sambu di ramin-i agi kudu kudu pinjan nura Jerusalem. Diginŭ, nimun adi ari-i ndai, ayŭh sidikang sindŭk pinjan anŭ ka bidua ka Tapa pitaruh kari ndi andu.

¹¹Kan pinganyu Daniel kiris ayŭh bidua ka Tapa,

¹²sopŭrŭg ngara samah di ka yŭn raja di nyarah Daniel. Ngara nang, “Tuan Raja, kaam mbŭh na tandā-tangan mai di atur adi nang taruh puru andu tadŭ tadŭ daya adi mite kayuh so tadŭ tadŭ tapa puan kah so tadŭ tadŭ daya adŭ-i so kaam, re dog taran ka darŭm rubang singah.” Raja nam, “Atur adi takung, ukum-adat daya Media ngga daya Persia, adi dŭh siŭn dog ngubah.”

¹³Komŭnŭ ngara nang di raja, “Daniel, ndi so daya adi dog taran so Judah, dŭh stabi di Tuan Raja ka dŭh tunda atur adi kaam mbŭh piruah. Ayŭh ari simayang pitaruh kari ndi andu.”

¹⁴Kan raja dingah kayuh anŭ, ayŭh mbŭh susah ka ngga situngang-i jiroh aran ngga nyiramat Daniel. Ayŭh bandar bandar suba ndŭg singumi andu.

¹⁵Komŭnŭ pinganyu Daniel pari ka yŭn raja ka nang di ayŭh, “Tuan Raja puan nanyam ka ukum-adat daya Media ngga daya Persia mating atur adi muko raja piruah bisa dog ngubah.”

¹⁶Jadi raja nggen ukum bada Daniel dog nakap, ka ayŭh dog taran ka darŭm rubang singah. Ayŭh nang di Daniel, “Isa-i Tapa mu, adi yŭn mu bituan ngga siabo asŭng mu, nyiramat kuu.”

¹⁷Tibande batuh meh dog na di baba rubang anŭ, ka raja na tandā-i ngga tandā bara pingibās-i di batuh anŭ, isa mating daya tungang nyiramat Daniel.

¹⁸Komŭnŭ raja pari ka istana ka ndi ngarŭm ngarŭm anŭ ayŭh dŭh tungang bŭŭs, buang dŭh man puan kah dŭh biyŭn ani ani ngga pirami adŭp-i.

¹⁹Ngga arong siri jawa raja makat ka bigaut di ka rubang singah.

²⁰Kan ayŭh mbŭh ndŭg nŭ, ayŭh bagan ngga atin adi raru gapang, “Daniel, urun Tapa adi udip! Dapŭd kah Tapa adi yŭn mu bituan ngga siabo asŭng mu nyiramat kuu so dudu singah anŭ?”

²¹Daniel nam, “Tabi Tuan Raja!

²²Tapa pait malaikat-I bada tŭŭp baba singah singah anŭ isa ngara dŭh kinaman aku. Ayŭh ndai simŭnŭ sabab Ayŭh puan aku dŭh sarah ka sabab aku mating ndai sarah di tunduh kaam, Tuan Raja.”

²³Raja mbŭh raru gaŭn ka nggen ukum bada Daniel dog piruah so darŭm rubang anŭ. Jadi ngara tarik ayŭh ka sapa ka kiris ayŭh dŭh mani mani, amai ayŭh sabah di Tapa.

²⁴Komŭnŭ raja nggen ukum bada sopŭrŭg daya adi ko nyarah Daniel dog nakap, ka ngara dog taran samŭn sawŭn ngara ngga anak ngara ka darŭm rubang singah anŭ. Diŭ so ngara ndŭg rasan rubang, singah singah anŭ mbŭh diŭ nakap ngara ka mata sopŭrŭg turang ngara.

²⁵Komŭnŭ Raja Darius nuris surat ka pait ka bara daya so barang bangsa, kaum, ngga piminyu di ong: “Tabi!

²⁶Aku pesan di ndi tarun tana empaya ku nang sopŭrŭg daya patut taru ka stabi di Tapa Daniel. “Ayŭh inŭh Tapa adi udip, ka Ayŭh re mritah ndŭg situi tui. Pritah-I dŭh re tungang dog nyirubuh, ka kuasa-I dŭh re mungan.

²⁷Ayŭh nyiramat ka pirupas; Ayŭh ndai pingandai saruh ngga pingandai-nginga di shorga ngga di ong. Ayŭh nyiramat Daniel so dog man singah.”

²⁸Daniel mujur di jaman pinyipritah Darius ngga di jaman pinyipritah Cyrus daya Persia anŭ.