Read Biatah Bidayuh DANIEL 7 Bible Online

DANIEL 7 - Biatah Bidayuh bible

DANIEL 7

¹Di sawa adi sibungas-i kan Belshazzar jadi raja di Babylon, aku agi nyipŭmŭh singarŭm ka kiris kayuh. Aku nuris pŭmŭh anŭ, ka ati inŭh kayuh adi aku kiris

²ngarŭm anŭ: Sabak poh so barang yŭn ka maka tunduh rawŭt.

³ Pat tibande dāng dāng ruah so rawŭt, barang pŭrŭng dāng anŭ bŭkŭn so adi bŭkŭn.

⁴ Adi diŭ mun singah, pak biyŭn urad mun beuh. Darŭm aku tingga, urad urad-i rudos so pŭrŭng-i. Dāng anŭ dog pakat ka dog bada mijog tŭnggŭn. Ka komŭnŭ pikir-kira manusia dog nggen di dāng anŭ.

⁵Dāng adi numbor duwŭh mun buāng mijog ngga duwŭh kaja-i. Buāng anŭ biyŭn di asah jipŭh-i taruh turang tirasah, ka agi sirŭŭn nang di ayŭh, “Man nŭh, man bagŭ dagin situngang tungang mu!”

⁶Darŭm aku tingga, agi dāng adi bŭkŭn tatŭng. Dāng anŭ mun rimaung, pak di punok-i agi pat urad, mun urad manuk, ka-i biyŭn pat ubak. Ayŭh tatŭng biyŭn kuasa.

⁷ Darŭm aku tingga, dāng adi numbor pat tatŭng. Ayŭh tatŭng bikuasa, sipŭ, taru nŭŭh kiris. Ngga tibande jipŭh basi-i ayŭh pirandŭk dangah-i, ka komŭnŭ ayŭh bidigang dieh. Dŭh mun dāng anŭ adi bŭkŭn, ayŭh biyŭn simŭng tanduk.

⁸ Darŭm aku tingga tanduk tanduk anŭ, aku kiris tanduk adi siit ruah so asah tanduk tanduk anŭ. Tanduk anŭ nanggar taruh tanduk adi bŭkŭn. Tanduk siit anŭ biyŭn batŭh manusia ka baba manusia adi minyu gambung.

⁹ Darŭm aku tingga, takta takta mbŭh dog tipan. Sianŭ adi udip ndŭg situi tui guru di ndi so dudu takta anŭ. Piraka-I buda mun salju, ka ubok-I mun tigŭrŭ buruh biri. Takta-I, biyŭn kaja krita kuda adi bijagu apui dieh,

¹⁰ ka sungi apui aman so takta-I. Mbŭh agi biribu ribu daya diginŭ an bituan di Ayŭh, ka bijuta juta daya mijog di sirung jawin-I. Komŭnŭ bisara piguru di yŭn bisara, ka surat surat dog kuka.

¹¹Darŭm aku tingga, aku babŭ dingah tanduk adi siit anŭ minyu gambung. Darŭm aku tingga, dāng adi numbor pat dog siŭ, ka pŭrŭng-i dog taran ka darŭm apui ka dog pirabur.

¹²Dāng dāng adi bŭkŭn, kuasa ngara dog dimbut, pak ngara dog nyibandar udip ndŭg tipuh adi mbŭh dog ngŭtŭ.

¹³ Darŭm kayuh anŭ adi dog kiris keya ka darŭm pŭmŭh ngarŭm anŭ, aku kiris kayuh mun manusia. Ayŭh mandŭg tudu aku, dog kirurung abun, ka ayŭh di ka sianŭ adi udip ndŭg situi tui ka dog taban ka yŭn-I.

¹⁴ Ayŭh dog nggen kuasa, stabi, kuasa-raja, isa bara daya so barang bangsa, kaum, ngga piminyu bisa bituan di ayŭh. Kuasa-i re tan adu adu, ka pritah-i dŭh re mungan.

¹⁵Kayuh adi dog kiris keya ka darŭm pŭmŭh anŭ bada aku susah, ka aku mbŭh raru bipito.[15]

¹⁶Aku tudu ndi naan so ngara adi mijog diginŭ ka bada ayŭh kidaan rati sopŭrŭg-i. Jadi ayŭh kidaan di aku rati-i.

¹⁷Ayŭh nang, “Tibande dāng adi pat anŭ inŭh pat empaya adi re makat di ong.

¹⁸ Ka daya Tapa adi Siabo Bigatung, re kambat kuasa-raja ka nyikŭn-i ndŭg situi tui.”

¹⁹Komŭnŭ aku raan rabis puan pasar dāng anŭ adi numbor pat, adi dŭh mun adi bŭkŭn -- dāng adi taru nŭŭh kiris anŭ adi pirandŭk kayuh ngga siruh timaga-i ka ngga jipŭh basi-i ka komŭnŭ bidigang dieh.

²⁰Ka aku raan puan pasar simŭng tanduk anŭ di tunduh ubak-i ka tanduk anŭ adi ruah ripas anŭ adi dimbut taruh tanduk adi bŭkŭn. Tanduk anŭ biyŭn batŭh ka baba ka mbŭh minyu gambung. Tanduk anŭ mbŭh rabis taru nŭŭh kiris so adi bŭkŭn.

²¹ Darŭm aku tingga, tanduk anŭ biperang ngga daya Tapa ka ngarah ngara.

²² Komŭnŭ sianŭ adi udip ndŭg situi tui mandŭg ka matŭd itong nanyam ka parad[16] daya Tapa adi Siabo Bigatung. Tipuh mbŭh mandŭg yŭn daya Tapa kambat kuasa-raja.

²³Ati inŭh rati-i adi mbŭh dog nggen di aku: “Dāng mangah adi numbor pat anŭ inŭh empaya adi re agi di ong ka re bŭkŭn so sopŭrŭg empaya adi bŭkŭn. Empaya anŭ re pirandŭk ndi ong ong ka re bidigang dieh.

²⁴ Simŭng tanduk inŭh simŭng raja adi re mritah empaya anŭ. Komŭnŭ re agi raja adi bŭkŭn; ayŭh raru bŭkŭn so ngara adi diŭ ka re ngarah taruh naan raja.

²⁵ Ayŭh re minyu rawan Tapa adi Siabo Bigatung ka kinanyuh daya Tapa. Ayŭh re suba ngubah ukum-adat darŭm adat ngga gawai ngara, ka daya Tapa re di ribo kuasa-i sitŭkŭd taruh ngga sitangah sawa.

²⁶Komŭnŭ ayŭh re dog bisara, kuasa-i dog tambit, ka ayŭh dog pirabur.

²⁷ Kuasa ngga sangŭn sopŭrŭg pritah di ong re dog nggen di daya Tapa adi Siabo Bigatung. Kuasa-raja ngara dŭh re mungan ka sopŭrŭg pimritah di ong re bituan ka nundok di ngara.”

²⁸Anŭ inŭh pinŭbŭn dundan-i. Aku mbŭh raru taru ndŭg ka jawin ku mbŭh pusat; sopŭrŭg-i aku nyikŭn darŭm atin ku.