Read Biatah Bidayuh DANIEL 9 Bible Online

DANIEL 9 - Biatah Bidayuh bible

DANIEL 9

¹Darius adi daya Media, anak Xerxes, jadi raja pritah Babylonia.

² Darŭm sibungas sawa pinyipritah-i, aku nakit basa surat surat kudus ka bipikir pasar 70 sawa Jerusalem jadi tibawang, nanyam ka adi mbŭh TUHAN kidaan di nabi Jeremiah.

³Aku bidua ngga siabo asŭng ku ka TUHAN Tapa, mite masi so Ayŭh, buang aku bipusa, nēn banang guni, ka guru di apŭk.

⁴Aku bidua ka TUHAN adi Tapa ku ka ngaku dosa daya bangsa ku. Aku nang, “TUHAN Tapa, Kaam inŭh bās, ka kieh stabi di Kaam. Kaam inŭh tŭtŭd ngga simanya Mai ka kiren pinyirindu adi dŭh bisa birubah di ngara adi rindu di Kaam ka adi ndai kayuh adi Kaam pesan.

⁵“Kieh mbŭh bidosa, kieh mbŭh ndai arap, kieh mbŭh ndai sarah. Kieh mbŭh tirawan kayuh adi Kaam pesan di kieh bada ndai ka mbŭh miriseu so kayuh adi Kaam nang batur.

⁶Kieh dŭh dingah pinganang bara urun Mai adi bara nabi, adi minyu ngga adŭn Mai di bara raja ami, bara pimritah ami, tayung-babuk ami, ka sopŭrŭg daya bangsa ami.

⁷Kaam, TUHAN, ari ndai kayuh adi batur, pak kieh mbŭh ari nggen mangŭh di adŭp ami. Kayuh ati inŭh sawŭ pasar sopŭrŭg ami adi rŭŭ di Judea ngga di Jerusalem, simŭnŭ gŭh pasar bara daya Israel adi Kaam mbŭh bada papar sasah di barang yŭn di rais rais adi sindŭk ngga adi jo sabab ngara dŭh tŭtŭd di Kaam.

⁸Bara raja ami, pimritah ami, ka tayung-babuk ami mbŭh ndai kayuh adi mangŭh nŭŭh ngarun ka mbŭh bidosa rawan Kaam, TUHAN.

⁹Kaam inŭh masi ka an apun, sunggu kieh mbŭh rawan Kaam.

¹⁰Kieh dŭh dingah pinganang Mai, O TUHAN adi Tapa ami, kan Kaam kidaan di kieh bada udip nanyam ka ukum ukum-adat adi Kaam mbŭh nggen di kieh so urun Mai bara nabi.

¹¹Sopŭrŭg daya Israel miranggar ukum ukum-adat Mai ka abah dingah kayuh adi Kaam nang. Kieh bidosa rawan Kaam, ka Kaam meh mbŭh kudog kieh ngga pangu adi dog nuris darŭm Ukum-adat Moses, adi urun Mai.

¹²Kaam mbŭh ndai di kieh ngga di bara pimritah ami kayuh adi Kaam nang adŭp Mai re ndai. Kaam ngukum Jerusalem rabis bisā so adi mbŭh tadŭ tadŭ kupo di ong mbŭh kinyam,

¹³ngukum kieh ngga sopŭrŭg ukum adi mbŭh dog nuris darŭm Ukum-adat Moses. Pak madin gŭh, O TUHAN adi Tapa ami, kieh mating suba pimunos asŭng Mai. Kieh mating marik pimudip ami pari ka Kaam ka dŭh tia bidosa, puan kah tunda ajar Mai adi sawŭ.

¹⁴Kaam, O TUHAN adi Tapa ami, taŭn sidia an ngukum kieh, ka sawŭ Kaam mbŭh ngukum kieh. Pingandai Mai anŭ inŭh batur amai kieh dŭh dingah pinganang Mai.

¹⁵“O TUHAN adi Tapa ami, Kaam mbŭh kiren kuasa Mai darŭm Kaam taban daya Mai ruah so Egypt, ka kuasa Mai inŭh babŭ dog ingat. Kieh mbŭh bidosa; kieh mbŭh ndai sarah.

¹⁶Kaam ngibān kieh di jaman adi mbŭh, ka dŭhsah baji di Jerusalem tia. Anŭ inŭh kupo Mai, sandah kudus Mai.[19] Sopŭrŭg daya di rais rais adi sindŭk ngamun Jerusalem samun daya Mai sabab dosa ami ngga arap adi tayung-babuk ami mbŭh ndai.

¹⁷O Tapa, dingah dua ngga pimite ku. Pari pijog Ramin Mai, adi mbŭh dog nyirubuh; Pari pijog-i isa barang naan daya bisa puan nang Kaam inŭh Tapa.

¹⁸Dingah kieh, O Tapa; tingga kieh, ka tingga pinyusah ami ngga sangsara kupo adi dog kadŭn tunda adŭn Mai. Kieh bidua ka Kaam sabab Kaam inŭh puno ngga masi, dŭh sabab kieh mbŭh ndai pingandai batur.

¹⁹TUHAN, dingah kieh. TUHAN, apun kieh. TUHAN, dingah kieh, ndai meh yŭn ami! Siŭn barang naan daya puan nang Kaam inŭh Tapa, dŭhnyah sais! Kupo ngga bara daya ati inŭh jamai.”

²⁰Aku babŭ bidua, ngaku dosa ku ngga dosa daya ku bangsa Israel, ka mite turung so TUHAN adi Tapa ku bada pari pijog Ramin-I adi kudus.

²¹ Sitadŭn aku bidua, Gabriel, adi muko aku kiris di kayuh adi keya ka darŭm pŭmŭh sibungas-i, mandŭg mikabur mūn ka yŭn ku. Anŭ mbŭh tika ngga jugan sadis singumi andu.

²²Ayŭh nang, “Daniel, aku mbŭh mandŭg kamati an turung kuu mirati pinganang-binabi anŭ.

²³Kan kuu piguru mite turung so Tapa, Ayŭh nam kuu. Ayŭh rindu kuu, ngapŭi aku mbŭh mandŭg di kidaan di kuu pinyinam-I. Madin nakit dingah darŭm aku kidaan rati kayuh anŭ adi dog kiris keya ka darŭm pŭmŭh.

²⁴“Ju kari ju puru sawa inŭh ambu tipuh adi Tapa mbŭh miratak yŭn-I re pirupas daya mu ngga kupo kudus mu so dosa ngga arap. Dosa re dog apun ka pinyitŭnggŭn adi tan adu adu re dog pijog, isa kayuh adi dog kiris keya ka darŭm pŭmŭh ngga pinganang-binabi anŭ jadi bitŭtŭk, ka Ramin TUHAN adi kudus[20] re pari dog nitah.

²⁵Ngatin ka mirati kayuh ati: so andu pinganang dog nggen bada pari pijog Jerusalem, ndŭg andu pinguru adi Tapa mien mandŭg, ju kari ju sawa re ripuan. Jerusalem re pari dog pijog ngga anak anak aran passar ngga sindung sindung adi tagap, ka re mijog sitian ju kari ju puru sawa, pak anŭ re tipuh susah.

²⁶Ka di tibŭn tipuh anŭ pinguru adi Tapa mien re dog siŭ sunggu ayŭh dŭh sarah.[21] Kupo ngga Ramin TUHAN re dog nyirubuh bara soldadu pimritah adi bikuasa. Pinŭbŭn anŭ re keya ka uba, taban perang ngga pinyirusag adi Tapa mbŭh sidia.

²⁷ Pimritah anŭ re biyŭn pekat-janji adi takung ngga bara daya sitŭkŭd ju sawa, ka kan sitangah tipuh anŭ mbŭh ripuan, ayŭh re pirŭŭ sadis ngga pinganggen. Pinyembar adi Raru Sipŭ[22] re dog na di yŭn adi siabo bigatung di Ramin TUHAN ka re babŭ diginŭ ndŭg ka sianŭ adi na-i diginŭ mbŭh dapŭd pimungan adi Tapa mbŭh sidia yŭn-i.”