Read Biatah Bidayuh HOSEA 10 Bible Online

HOSEA 10 - Biatah Bidayuh bible

HOSEA 10

¹Daya Israel mbŭh mun tŭngŭn anggor adi sarad ngga buwa anggor. Pimudip ngara mujur, pak tanŭ ka bagŭ mija-sambah dog pijog ngara. Bagŭ buwa pimuruh ngara, pak tanŭ ka bagŭ uros pirapu' dog nyambah ngara.

²Daya adi puno ngga tipu atin-i, dŭh siŭn dŭh sangsara amai dosa-i. Tapa re nyirubuh mija-sambah ngara ka pirusak uros uros pirapu' ngara.

³Ngara re rikas nang, “Ata dŭh biyŭn raja amai ata dŭh taru TUHAN. Pak ani garang re raja bisa ndai yŭn ta?”

⁴Ngara pandai minyu adŭ, ndai janji kadong ka ndai pekat-damai adi dŭh biguna. Pinyitŭnggŭn mbŭh mating tia, marui jadi uduh birasun di ŭmŭh.

⁵Daya adi rŭŭ di kupo Samaria re taru ka re ngurid dari sapi[25] mas di Bethaven[26]. Ngara ngga bara imam adi bituan di tibudo anŭ re muās-i. Ngara re bana sien kan-i dog pirukos so sangŭn mas-i.

⁶Tibudo anŭ re dog taban bu ka Assyria ndu takŭd ka raja bās empaya. Daya Israel re dog ngamun ka dog pimangŭh sabab pinyitayan adi ngara tunda.

⁷Raja ngara re dog taban ngga bu, mun supek kayuh di tunduh piin.

⁸ Bari-sambah di tibung sandah Aven,[27] di yŭn daya Israel nyambah tibudo, re dog nyirubuh. Reja ngga bakah re timbu ka nutu tunduh mija-sambah ngara. Daya re nang di darŭd, “Sukan kieh!” ka di sandah, “Nutu kieh!”

⁹ TUHAN nang, “Daya Israel gibayuh ko bidosa rawan Aku so jaman ngara bidosa di Gibeah.[28] Jadi di Gibeah perang re nyandat ngara.

¹⁰Aku re nyerang[29] ngara adi bidosa ati ka ngukum ngara. Bangsa bangsa re tikuruk rawan ngara, ka ngara re dog ukum amai dosa ngara adi raru bagŭ.

¹¹“Israel ko dawŭ-i mun anak sapi adi ko nakit dog ngajar, sidia an ngiik gandom. Pak Aku mbŭh ndai pikir Ku an na parang punggo di[30] tungo-i adi ramus anŭ ka takan ayŭh bada bandar nyiraja. Aku bada Judah tukang majak ka Israel tukang tarik bajak.

¹² Aku nang, ‘Majak tana adi bauh yŭn adŭp ngan, purun pinŭnggŭn, ka ngatŭm berkat adi mandŭg so pinyirindu ngan di Aku. Ati inŭh tika adi ngga angān pari ka Aku, adi TUHAN ngan, ka Aku re mandŭg ka ren berkat di tunduh ngan.’

¹³Pak gŭt angān purun arap ka ngatŭm buwa-i. Angān mbŭh man buwa so pinganang kadong ngan. “Sabab angān sabah di krita kuda ngan[31] ka di kiang bara soldadu ngan,

¹⁴perang re mandŭg ka daya ngan, ka sopŭrŭg kuta ngan re dog nyirubuh. Anŭ re mun andu adi ngga Raja Shalman nyirubuh kupo Betharbel darŭm perang, ka bara sindŭ ngga anak anak ngara kabŭs dog nyatŭk.

¹⁵Anŭ inŭh kayuh adi re jadi di angān, daya Bethel, sabab arap adi sipŭ anŭ adi mbŭh ngan ndai. Kan perang anŭ piguru, raja Israel re kabŭs.”