Read Biatah Bidayuh HOSEA 11 Bible Online

HOSEA 11 - Biatah Bidayuh bible

HOSEA 11

¹ Ka TUHAN nang, “So Israel gibabŭ sŭ, Aku mbŭh rindu ayŭh, ka bagan ayŭh, anak Ku,[32] bada ruah so Egypt.

²Pak makin Aku[33] bagan ayŭh, makin ka ayŭh bu so Aku.[34] Daya Ku nyadis ka Baal; ngara badang kimanyan ka tibudo.

³Pak Aku inŭh adi ngajar Israel panu. Aku tambit puko daya Ku,[35] pak ngara dŭh ngaku Aku adi sita ngara.

⁴Aku nyindŭk ngara ngga pinyirindu ka masi. Aku tunduk ngara ka sium ngara; Aku mutu ka nggen man di ngara.[36]

⁵“Ngara abah pari ka Aku, ngapŭi ngara dŭh siŭn dŭh pari ka Egypt, ka Assyria re mritah ngara.

⁶Perang re nyarab kupo kupo ngara ka nyirubuh tiban tiban-bās kupo. Ngara re rabur sabab ngara ndai kayuh nanyam ka pinyiraan adŭp ngara.

⁷Ngara garis an bu so Aku. Ngara re bagan mite turung amai dog pijera darŭm pimudip ngara, pak mating daya re pirupas ngara.[37]

⁸ “Simuki Aku re tandah kuu, Israel? Simuki Aku re tagan kuu? Bisa kah Aku pirabur kuu mun Admah, puan kah ndai di tunduh mu mun Zeboiim? Atin Ku dŭh re bada Aku ndai simŭnŭ! Pinyirindu Ku di kuu inŭh raru bās.

⁹Aku dŭh re ngukum kuu kan Aku baji; Aku dŭh re pirabur Israel dinge. Amai Aku ati Tapa ka dŭh manusia. Aku, adi Kudus, agi ngga kuu. Aku dŭh re baji di kuu dinge.

¹⁰“Daya Ku re tunda Aku kan Aku ngŭr pinganyu ngara mun singah. Ngara re rikas tudu Aku so tura ka barat.

¹¹Ngara re mandŭg so Egypt, raju mun manuk, ka so Assyria, mun manuk asang. Aku re taban ngara mari ka ramin ngara dinge. Aku, adi TUHAN, mbŭh minyu.”

¹²TUHAN nang, “Daya Israel mbŭh kirurung Aku ngga pinganang kadong ka pingandai tipu, ka daya Judah gibabŭ birawan rawan Aku, Tapa adi tŭtŭd ka kudus.