Read Biatah Bidayuh HOSEA 13 Bible Online

HOSEA 13 - Biatah Bidayuh bible

HOSEA 13

¹Dawŭ-i, kan tibaran-asar Ephraim minyu, bara tibaran-asar adi bŭkŭn taru. Ngara raru stabi di Ephraim. Pak daya bidosa amai nyambah Baal, ka sabab anŭ ngara re kabŭs.

²Ngara babŭ bidosa amai babŭ ndai gayŭn gayŭn so basi an ngara nyambah, mun tibudo so pirak, adi dog ndai ngga tangan manusia. Komŭnŭ ngara nang, “Jugan sadis ka ngara!” Simuki daya re sium tibudo anŭ, tibudo adi dog ndai tunda gayŭn sapi![39]

³Ngapŭi ngara re miyap mun abun isan isan, mun sipot-abun adi miyap awar isan isan. Ngara re mun aping adi dog poh sabak so tarun yŭn ngiik, mun asuh so sirumbong asuh.

⁴TUHAN nang, “Aku ati TUHAN adi Tapa ngan, adi taban angān ruah so Egypt. Angān dŭh biyŭn Tapa bŭkŭn adŭ-I Aku. Aku sadi adŭ pinyikudip ngan.

⁵ Aku kingat angān di tarun tana badŭh, tarun tana sumat.

⁶Pak kan angān mŭrŭt tarun tana adi kana, angān bisoh, angān jadi sambuh ka kambŭt Aku.

⁷Ngapŭi Aku re nyerang angān mun singah. Mun rimaung Aku re tuman angān di aran.

⁸Aku re nyerang angān mun buāng adi manyap anak-i, ka Aku re nyiratak nyirigat pŭrŭng ngan. Mun singah Aku re man angān diginŭ ka nyiratak nyirigat angān mun dāng tarun.

⁹“Aku re siŭ angān, daya Israel! Asi re dapŭd turung angān?[40]

¹⁰ Angān mite raja ka mite pinguru, pak simuki ngara re nyiramat bangsa ati?[41]

¹¹ Ngga baji Aku mbŭh nggen di angān bara raja, ka ngga riyŭn Aku mbŭh tambit ngara ngga bu.

¹²“Dosa Israel ngga sarah-i agi dog nuris, ka rekod anŭ mbŭh nakit dog nyikŭn.

¹³Israel biyŭn pluang udip, pak mbŭh raru budo re tambit-i; mun sipira re dog ruwan, pak abah ruah so tain.

¹⁴ Aku dŭh re nyiramat daya ati so ong daya adi mbŭh kabŭs bait pirupas ngara so kuasa pinyikabŭs. Taban[42] sesak andam mu, pinyikabŭs! Taban[43] pinyirusag mu, ong daya adi mbŭh kabŭs! Aku mbŭh dŭh tia masi di bangsa ati.

¹⁵Sunggu Israel mujur mun uduh di tana adi damŭn,[44] Aku re pait sabak timor adi paras so tarun tana-pajam, ka-i re nyibadŭh anak anak sungi ngga prigi ngara. Ka-i re taban ngga bu sopŭrŭg kayuh adi brega.

¹⁶Samaria dŭh siŭn dŭh dog ukum amai rawan Aku. Daya-i re kabŭs darŭm biperang; anak anak pira re dog pān di tana, ka dayung dayung adi bite re dog nyeja tain-i.”