Read Biatah Bidayuh HOSEA 2 Bible Online

HOSEA 2 - Biatah Bidayuh bible

HOSEA 2

¹Ka bagan meh dingan ngan adi samah daya Israel “Daya Tapa” ka “Anak-nyirot-TUHAN”.

²Angān adi anak Ku, minyu ngga sindŭ ngan; sunggu-i ayŭh mbŭh dŭh tia sawŭn Ku, ka Aku mbŭh dŭh tia banŭh-i. Minyu ngga ayŭh da dŭh tia tanggah ka dŭh tia nyundar.

³Kambŭi dŭh, Aku re pirukos piraka-i isa ayŭh sitabet mun di andu ayŭh dog biranak. Aku re bada ayŭh mun tana adi badŭh ka matung, ka ayŭh re kabŭs badŭh asŭng.

⁴Aku dŭh re masi di anak anak-i; ngara anŭ anak so dayung sundar adi dŭh puan mangŭh.[5] Adŭp-i mbŭh nang, “Aku re di ka yŭn ambai ku. Ngara nggen di aku pinguman ka piin, buruh biri ka banang linen, inyo kanā ka wain.”

⁶Jadi Aku re muwang ayŭh ngga randa reja ka pijog ndi sindung ngga matŭn ayŭh.

⁷Ayŭh re bikaduh tadak bara ambai-i pak re dŭh tungang ndŭg ngara. Komŭnŭ ayŭh re nang, “Aku re pari ka banŭh ku adi sibungas-i. Pimudip ku kana dawŭ-i.”

⁸Ayŭh bŭn ngaku Aku adi nggen di ayŭh gandom, wain, inyo kanā, ka sopŭrŭg pirak ngga mas adi ayŭh pakai ngga nyambah Baal.

⁹Jadi di tika ngatŭm Aku re tambit pari pinganggen gandom ngga wain Ku, ka re tambit buruh biri ka banang linen adi Aku ko nggen di ayŭh ndu piraka.

¹⁰Aku re pirukos piraka-i di sirung jawin bara ambai-i, ka mating daya re tungang nyiramat ayŭh so tangan Ku.

¹¹Aku re pirŭŭ sopŭrŭg gawai-i, gawai sawa ngga gawai buran ka gawai Sabbath, ka sopŭrŭg udung adat-i.

¹²Aku re pirusak tŭngŭn tŭngŭn anggor ngga tŭngŭn tŭngŭn ara-i, adi-i nang dog nggen bara ambai-i ngga bayar ayŭh. Aku re marik teya anggor ngga risŭn ara-i bada jadi tarun tana-pajam; ka dāng dāng tarun re pirusak-i.

¹³Aku re ngukum ayŭh amai tika tika adi ngga-i kambŭt Aku kan-i badang kimanyan ka Baal ka pakai pimakai grua-i ngga di tadak bara ambai-i. TUHAN mbŭh minyu.

¹⁴Aku re taban ayŭh ka tarun tana-pajam dinge; diginŭ Aku re bada ayŭh pari ka adŭp Ku ngga pinganang pinyirindu.

¹⁵ Aku re nggen pari teya anggor-i ka bada Rubān Pinyusah jadi tiban pingarap. Ayŭh re pari ka Aku diginŭ nimun adŭp-i adi gi-mara dawŭ-i, di tika ayŭh mandŭg so Egypt.

¹⁶Komŭnŭ ayŭh re bagan Aku banŭh-i. Ayŭh dŭh re tia bagan Aku Baal-i.[6]

¹⁷Aku re dŭh bada ayŭh tia nyabŭt dŭn Baal.

¹⁸Di tika anŭ Aku re ndai simanya ngga sopŭrŭg dāng tarun ka manuk, isa ngara dŭh kinaman daya Ku. Aku re kadi gŭh sopŭrŭg sinyata perang so tarun tana anŭ, sopŭrŭg pedang ngga bawŭh panah, ka re bada daya Ku udip darŭm damai ngga siramat.

¹⁹Israel, Aku re bada kuu jadi sawŭn Ku; Aku re sawŭ buang tŭtŭd; Aku re masi di kuu, ka pinyirindu Ku di kuu dŭh re birubah; Aku re bada kuu adu adu tung jaku.

²⁰Aku re sita janji Ku ka bada kuu jadi tung jaku, ka kuu re ngaku Aku TUHAN.

²¹Di tika anŭ Aku re nam dua dua daya Ku Israel.[7] Aku re bada ujen rabu di ong, ka ong re piruah gandom ngga anggor ka inyo kanā.

²³ Aku re pijog daya Ku di tarun tana anŭ ka bada ngara mujur. Aku re masi di ngara adi dog kadŭn ‘Dŭh-dog-masi’, ka di ngara adi dog kadŭn “Dŭh daya Ku” Aku re nang, “Angān daya Ku,” ka ngara re nam, “Kaam inŭh Tapa ami.”