Read Biatah Bidayuh HOSEA 5 Bible Online

HOSEA 5 - Biatah Bidayuh bible

HOSEA 5

¹“Dingah ati, angān bara imam! Nakit dingah, daya Israel! Dingah, angān adi so rawang raja! Sipatut-i angān nyarah daya ngga pinyitŭnggŭn; ngapŭi meh ukum re nyatŭk angān! Angān mbŭh jadi jarat di Mizpah, jaring adi dog tŭŭn di Darŭd Tabor,

²rubang adi tŭrŭp di Kupo Acacia,[14] ka Aku re ngukum sopŭrŭg ngan.

³Aku puan mun ani Israel; dŭh-i bisa bisukan so Aku. Ayŭh dŭh tŭtŭd di Aku, ka daya-i dŭh bia re nyambah Aku.”

⁴Pingandai arap ngara mbŭh matŭn ngara pari ka Tapa ngara. Ngara mbŭh dŭh tungang ko nyambah tibudo, ka ngara dŭh ngaku TUHAN.

⁵Uap-sambuh daya Israel mbŭh manŭn ka mbŭh jadi taksi yŭn sarah ngara. Dosa ngara bada ngara sikak ka rabu, ka daya Judah rabu ayō ngara.

⁶Ngara tambit biri ngga sapi an ngara jugan ka TUHAN, pak pingandai anŭ dŭh biguna. Ngara dŭh tungang dapŭd Ayŭh, amai Ayŭh mbŭh tingge ngara.

⁷Ngara mbŭh dŭh tŭtŭd di TUHAN; bara anak ngara dŭh Ayŭh dapu. Jadi madin ngara ngga tana ngara re dog pirabur.

⁸Mambak trompet di Gibeah! Mambak ngga nguga daya di Ramah! Ngab di Bethaven![15] Matak biperang, angān daya Benjamin!

⁹Israel dŭm dŭh tui re rabur dog ukum. Daya Israel, kayuh ati re sawŭ jadi!

¹⁰TUHAN nang, “Aku baji amai bara pinguru Judah mbŭh nyerang Israel ka mbŭh naku tana-i. Jadi Aku re ren ukum di tunduh ngara keya ka piin uba.

¹¹Israel mbŭh dog kinanyuh; tana adi taŭn ayŭh dapu mbŭh dog tambit so ayŭh, sabab ayŭh ngandŭ mite turung so ngara adi dŭh dapŭd turung.[16]

¹²Aku re taban pinyirusag ka Israel ka pinyirubuh ka daya Judah.

¹³“Kan Israel kinyam munki masam mandam adŭp-i re, ka kan Judah kiris tawan adŭp-i, nganŭ Israel re di ka Assyria di mite turung so raja bās empaya, pak ayŭh dŭh re dapŭd nguri ngara bait kah pibua tawan ngara.

¹⁴Aku re nyerang daya Israel ngga Judah mun singah. Aku re nyirigat nyiratak ngara ka tingge ngara. Kan Aku batak ngara, mating daya re tungang nyiramat ngara.

¹⁵“Aku re tagan daya Ku ndŭg ka ngara mbŭh sukup jera amai dosa adi mbŭh ngara ndai, ka ngara re mandŭg di jiroh Aku. Kadŭ darŭm sangsara ngara, ngara re bandar bandar an dapŭd Aku.”