Read Biatah Bidayuh HOSEA 8 Bible Online

HOSEA 8 - Biatah Bidayuh bible

HOSEA 8

¹TUHAN nang, “Mambak trompet ngga nguga bara daya! Pinganyu mbŭh aŭn nyerang tarun tana Ku mun beuh mūn nyambar nakap dangah-i! Daya Ku mbŭh miranggar simanya adi Aku mbŭh ndai ngga ngara, ka mbŭh rawan ajar Ku.

²Sunggu ngara kadŭn Aku Tapa ngara ka ngaku adŭp ngara daya Ku ka puan gŭh Aku,

³ngara mbŭh tirawan kayuh adi kana. Sabab anŭ pinganyu ngara re tadak ngara.

⁴“Daya Ku mien raja, pak ngara mien raja sadi adŭp ngara. Ngara tijuan bara pinguru, pak dŭh so pinyibandar Ku. Ngara tambit pirak ngga mas ka ndai tibudo, adi jadi pinyirusag yŭn adŭp ngara.

⁵Aku tiru di sapi mas adi dog nyambah daya kupo Samaria. Aku raru baji di ngara. Ndŭg sinde meh ngara re adu adu nyambah tibudo?

⁶Ndi naan daya Israel adi tukang, ndai tibudo, adi taŭn dŭh tapa! Sapi mas adi dog nyambah di Samaria re dog mape bada asur!

⁷Kan ngara purun sabak, ngara re ngatŭm sabak ribut! Ŭmŭh gandom adi dŭh masak, dŭh re pijadi ruti. Pak kambŭi masak, daya tami gŭh re man-i.

⁸Israel mbŭh jadi keya ka bangsa bŭkŭn ka mbŭh dŭh biguna mun priok adi pape.

⁹Baking keya ka kaldi adi siga, daya Israel mbŭh kadŭg pinyiraan adŭp-i. Ngara mbŭh bu di mite turung so Assyria, ka mbŭh bayar bangsa bŭkŭn bada grindung adŭp-i.

¹⁰Pak madin Aku re nguruk ngara ka ngukum ngara. Dŭm dŭh tui ngara re nyidaing amai sangsara dog kinanyuh raja-empaya Assyria.

¹¹“Bagŭ mija-sambah dog pijog daya Israel ngga taran dosa, pak pinyadi-i tanŭ ka bagŭ tarun yŭn ngara ndai dosa!

¹²Aku nuris raru bagŭ ajar yŭn bara daya, pak ngara tirawan-i mun kayuh adi saruh.

¹³Ngara jugan sadis ka Aku ka man dagin so sadis anŭ.[21] Pak Aku, adi TUHAN, dŭh munos asŭng di ngara, ka madin Aku re ingat dosa ngara ka ngukum ngara amai dosa ngara; Aku re pait ngara pari ka Egypt!

¹⁴“Daya Israel mbŭh pijog istana, pak ngara mbŭh kambŭt Pinapa ngara. Daya Judah mbŭh pijog kupo kupo adi bikuta. Pak Aku re pait apui ngga sigot istana ka kupo kupo ngara.”