Read Biatah Bidayuh HOSEA 9 Bible Online

HOSEA 9 - Biatah Bidayuh bible

HOSEA 9

¹Daya Israel, dŭh tia sita gawai ngan mun daya adat karŭm. Angān mbŭh nyipunok Tapa ngan ka mbŭh dŭh tŭtŭd di Ayŭh. Di ndi tarun tana angān mbŭh jua adŭp ngan keya ka sundar di tapa Baal ka mbŭh suka trima gandom adi ngga-i ngupah angān!

²Pak dŭm dŭh tui angān re dŭh biyŭn sukup gandom ngga inyo kanā, ka wain gŭh re mating tia.

³Daya Israel re dŭh rŭŭ di tarun tana TUHAN, pak re pari di ka Egypt ka re di man pinguman adi dŭh siŭn dog man[22] di Assyria.

⁴Di tarun tarun tana daya tami anŭ ngara re dŭh tungang jugan wain ka TUHAN, bait taban sadis ngara ka Ayŭh. Pinguman ngara re nyembar barang naan adi man-i, mun pinguman adi dog man di tika nyikubur; anŭ batur-i ngga pibisoh adŭ, dŭh siŭn dog taban ka dog jugan di Ramin TUHAN.

⁵Ka kan tika yŭn gawai adi dog miratak ngga stabi di TUHAN mbŭh mandŭg, ani meh re ngara ndai?

⁶Kan pinyirusag mandŭg ka daya mbŭh papar sasah, daya Egypt re nguruk ngara yŭn dog siŭ ka nguruk ngara yŭn dog kubur di Memphis! Rata ngara adi dog ndai so pirak ngga tarun yŭn ramin ngara dawŭ-i re birasu ngga uduh ka randa reja.

⁷ Tika ngga ngukum mbŭh mandŭg, tika adi ngga daya trima baras yŭn kayuh adi mbŭh ngara ndai. Kan-i mbŭh jadi simŭnŭ, daya Israel re puan! “Nabi ati,” angān nang, “inŭh budo. Daya ati adi dog pait Tapa inŭh gira.” Angān ruai tiru di aku sabab dosa ngan mbŭh raru bagŭ.

⁸Tapa mbŭh pait aku jadi nabi bada bakan daya Israel. Pak di barang yŭn aku panu, angān suba an mirakap aku mun manuk. Ndŭg ka di Ramin Tapa daya mbŭh sadi pinganyu nabi.

⁹ Ngara mbŭh raru arap darŭm pingandai ngara, mun adŭp ngara dawŭ-i di Gibeah.[23] Tapa re ingat dosa ngara ka sabab anŭ re ngukum ngara.

¹⁰ TUHAN nang, “Di andu sibungas Aku dapŭd Israel, anŭ mbŭh keya ka dapŭd anggor timbu di tarun tana-pajam. Di andu sibungas Aku kiris tayung-babuk ngan, anŭ mbŭh keya ka kiris sibungas asak buwa ara di tipuh-i. Pak kan ngara mandŭg ka Darŭd Peor, ngara piguru nyambah Baal, ka dŭh tui rasu arap mun tapa adi ngara rindu.

¹¹Bragah Israel re mikabur bu mun manuk. Ngara re dŭh tia biyŭn anak. Dayung ngara re dŭh tia bite.

¹²Pak sunggu ngara mira biranak, Aku re tambit anak anak ngara, ka ndi naan mating gŭh re udip. Kan Aku tagan ngara, kayuh adi sipŭ re jadi di ngara.”

¹³TUHAN, aku kiris bara anak ngara dog tadak[24] ka dog siŭ.

¹⁴Ani patut ku mite Kaam ndai yŭn bara daya ati? Bada bara dayung ngara aboh! Bada ngara dŭh dapŭd mira anak pira ngara!

¹⁵TUHAN nang, “Sopŭrŭg pingandai arap ngara piguru di Gilgal. Diginŭ inŭh Aku piguru tiru di ngara. Ka sabab arap adi ngara mbŭh ndai, Aku re pibu ngara so tarun tana Ku. Aku re dŭh tia rindu ngara; sopŭrŭg pinguru ngara mbŭh rawan Aku.

¹⁶Daya Israel inŭh mun anak kayuh-udip adi mbŭh pisŭk uat-i ka adi dŭh buān. Ngara dŭh biyŭn anak, pak kambŭi ngara biyŭn, Aku re siŭ anak anak adi ngara raru siŭt.”

¹⁷Tapa adi yŭn ku bituan re tirawan daya-I, sabab ngara dŭh dingah pinganang-I. Ngara re jadi daya adi bigandon di ruang bangsa bangsa.