Read Biatah Bidayuh AMOS 1 Bible Online

AMOS 1 - Biatah Bidayuh bible

AMOS 1

¹ Ati inŭh piminyu pinganang Amos, ndi naan pingingat-biri so kupo Tekoa. Duwŭh sawa diŭ so tana-bigugoh, kan Uzziah jadi raja Judah ka Jeroboam anak Jehoash jadi raja Israel, Tapa pinandŭng di Amos sopŭrŭg kayuh ati pasar Israel.

² Amos nang, “TUHAN ngŭr so Sandah Zion; sirŭŭn-I bidudū so Jerusalem. Tarun tana kupai badŭh pisŭk, ka kupai di Darŭd Carmel marui pisŭk.”

³ TUHAN nang, “Daya Damascus mbŭh pari pari bidosa, ka sabab anŭ Aku re sawŭ ngukum ngara. Ngara mbŭh gaok ginaka ngga daya Gilead.

⁴Jadi Aku re pait apui bada nyatŭk istana adi Raja Hazael pijog ka Aku re badang kuta kuta Raja Benhadad.

⁵Aku re nyirubuh tiban-bās kupo Damascus ka pibu bara daya adi rŭŭ di Rubān Aven ngga pimritah Betheden. Daya Syria re dog taban ngga bu jadi daya-takap ka tarun tana Kir.”

⁶ Ka TUHAN nang, “Daya Gaza mbŭh pari pari bidosa, ka sabab anŭ Aku re sawŭ ngukum ngara. Ngara taban ngga bu sopŭrŭg daya so ndi bangsa ka jua ngara jadi urun ka daya Edom.

⁷Ngapŭi Aku re pait apui da nyatŭk sindung kuta Gaza ka badang-i.

⁸Aku re kadi sopŭrŭg pimritah kupo Ashdod ngga Ashkelon. Aku re ngukum kupo Ekron, ka sopŭrŭg daya Philistine adi dŭm re abo kabŭs.”

⁹ TUHAN nang, “Daya Tyre mbŭh pari pari bidosa, ka sabab anŭ Aku re sawŭ ngukum ngara. Ngara taban ngga bu sopŭrŭg daya so ndi bangsa jadi daya adi dog taran di tarun tana Edom, ka dŭh sita pekat-damai adi ngara mbŭh ndai.

¹⁰Ngapŭi Aku re pait apui da nyatŭk sindung kuta Tyre ka badang kuta-i.”

¹¹ TUHAN nang, “Daya Edom mbŭh pari pari bidosa, ka sabab anŭ Aku re sawŭ ngukum ngara. Dŭh ngga masi, ngara siŭ madis madis adŭp ngara,[1] adi daya Israel. Baji ngara dŭh tigŭngŭng, ka ngara dŭh re an ko baji.

¹²Ngapŭi Aku re pait apui da nyatŭk kupo Teman ka sigot kuta kuta Bozrah.”

¹³ TUHAN nang, “Daya Ammon mbŭh pari pari bidosa, ka sabab anŭ Aku re sawŭ ngukum ngara. Darŭm perang ngara adi ngga tambit tambah tarun tana, ngara mbŭh nyeja tain dayung dayung adi bite di Gilead.

¹⁴Ngapŭi Aku re pait apui da nyatŭk sindung kuta Rabbah ka badang kuta-i. Ka diginŭ re agi ngāb pinganyu nyerang, ka bisaad anŭ re mun sabak ribut.

¹⁵Raja ngga bara pinurung pritah-i re dog nakap ka jadi daya adi dog taran ka rais tami.”