Read Biatah Bidayuh AMOS 2 Bible Online

AMOS 2 - Biatah Bidayuh bible

AMOS 2

¹TUHAN nang, “Daya Moab mbŭh pari pari bidosa, ka sabab anŭ Aku re sawŭ ngukum ngara. Ngara dŭh stabi di turang raja so Edom; ngara badang turang-i ndŭg ka jadi apŭk.

²Aku re pait apui da nyatŭk tarun tana Moab ka badang kuta kuta Kerioth. Daya Moab re kabŭs darŭm jawŭn perang sitadŭn bara soldadu ngāb ka dudu trompet dog mambak.

³Aku re siŭ pimritah Moab ngga sopŭrŭg pinguru di tarun tana anŭ.”

⁴TUHAN nang, “Daya Judah mbŭh pari pari bidosa, ka sabab anŭ Aku re sawŭ ngukum ngara. Ngara mbŭh ngamun ajar Ku ka dŭh sita pesan Ku. Ngara mbŭh manyap bada tapa-kadong adi tayung-babuk ngara ko nyambah dawŭ-i.

⁵Ngapŭi Aku re pait apui da nyatŭk Judah ka badang kuta kuta Jerusalem.”

⁶TUHAN nang, “Daya Israel mbŭh pari pari bidosa, ka sabab anŭ Aku re sawŭ ngukum ngara. Ngara jua bada jadi urun daya adi jujur adi dŭh tungang bayar utang ngara, ka daya sirata adi dŭh tungang bayar ndŭg ka ndi pasang kasut.

⁷Ngara digang[2] daya adi ramah ka adi dŭh bigaya ka turak ka bŭngŭn daya adi sirata. Ndi naan daya ngga sama-i mbŭh nyibŭŭs ndi naan dayung urun, ka mbŭh nyembar adŭn kudus Ku.

⁸Di barang tarun yŭn bisambah, daya bŭŭs nēn piraka adi ngara mbŭh tambit so daya sirata ndu jamen utang-i. Di Ramin Tapa ngara, ngara nok wain adi dog tambit so daya adi ngutang duit ngara.

⁹ “Kana yŭn ngan adi daya Ku inŭh, Aku mbŭh pirarap daya Amor adi bigatung mun tŭngŭn sedar ka adi bake mun tŭngŭn oak.

¹⁰Aku taban angān ngga ruah so Egypt, nguru angān mutas tarun tana-pajam pat puru sawa, ka nggen di angān tarun tana daya Amor bada jadi tung jangān.

¹¹ Aku mien kada so anak anak ngan bada jadi nabi, ka kada so anak dari ngan adi mara bada jadi daya nazir.[3] Dŭh kah kayuh anŭ sawŭ, daya Israel? Aku, adi TUHAN, mbŭh minyu.

¹²Pak angān bada bara daya nazir nok wain, ka nggen ukum bada bara nabi dŭh nyuse ajar Ku.

¹³Ka Aku re nyinjŭn angān di tana, ka angān re nyidaing mun krita-sapi sarad ngga gandom.

¹⁴Daya adi raju bikaduh dŭh gŭh re tungang pirupas adŭp-i; daya adi bake re manyap bake-i, ka soldadu dŭh re tungang nyiramat asŭng-i.

¹⁵Ngara adi tukang nimbak reja-panah re dŭh tan birawan, ngara adi raju bikaduh re dŭh dapŭd bikaduh bu, ka soldadu pinunggang kuda re dŭh tungang nyiramat adŭp-i.

¹⁶Di andu anŭ, ndŭg ka soldadu adi siabo pagan re pasan sinyata-i ka bikaduh bu.” TUHAN mbŭh minyu.