Read Biatah Bidayuh AMOS 3 Bible Online

AMOS 3 - Biatah Bidayuh bible

AMOS 3

¹Daya Israel, dingah pinganang ati adi TUHAN mbŭh piruah pasar angān, ndi bangsa adi-I mbŭh taban ruah so Egypt:

²“So dupan sopŭrŭg bangsa di ong, angān adŭ adi Aku puan ka sita. Anŭ inŭh adi bada dosa ngan raru sipŭ, ka sabab anŭ inŭh Aku dŭh siŭn dŭh ngukum angān.”

³Bisa kah duwŭh naan daya panu samah kambŭi dŭh diŭ bisatur diki re bidapŭd?

⁴An kah singah ngŭr di tuān kambŭi-i bayuh dapŭd dangah-i? Agi kah anak singah ngŭr kambŭi-i bayuh nakap kayuh?

⁵Agi kah manuk dog jarat kambŭi upan mating dog na di jarat anŭ? Bisa kah jarat bukās kambŭi mating kayuh mukas-i?

⁶Kan trompet tandā biperang dog mambak di kupo, dŭh kah daya re taru? Bisa kah pinyirusag nyatŭk kupo kambŭi TUHAN dŭh bada?

⁷TUHAN Raja dŭh ndai kayuh kambŭi-I dŭh diŭ kidaan di bara urun-I, adi daya Nabi.

⁸Kan singah ngŭr, asi re dŭh taru? Kan TUHAN Raja minyu, asi re dŭh kidaan agah-I?

⁹Kidaan di ngara adi rŭŭ di istana di Egypt ngga di Ashdod: “Tikuruk di sandah sandah maning Samaria ka tingga pito bās ngga barang masam sarah adi dog ndai diginŭ.”

¹⁰TUHAN nang, “Ngara anŭ ngisi ramin bās-i ngga kayuh kayuh adi tambit-i pakai aran adi sarah ka ganas. Ngara taŭn dŭh adŭ puan munki re bada adŭp-i jujur.

¹¹Ngapŭi meh pinganyu re maning tarun tana ngara, nyirubuh kuta ngara, ka mirupak ramin bās ngara.”

¹²TUHAN nang, “Nimun pingingat-biri dapŭd kaŭs-i duwŭh kaja puan kah ndi kajit biri adi singah muko man, simŭnŭ gŭh re nisŭ adŭ daya Samaria dŭm, adi madin guring di pangō adi grua.[4]

¹³Dingah madin, ka bakan bara sesang Jacob,” nang TUHAN Raja adi Bisa-pŭrŭg.

¹⁴ “Di andu Aku ngukum daya Israel amai dosa ngara, Aku re pirabur mija mija-sambah Bethel. Sikuh sikuh barang mija-sambah re timber ka re rabu ka tana.

¹⁵Aku re pirabur ramin tipuh madud ka ramin tipuh paras. Ramin adi dog ngabuh ngga bŭbŭt gajah re rubuh; sopŭrŭg ramin adi bayah re dog nyirubuh.”