Read Biatah Bidayuh AMOS 7 Bible Online

AMOS 7 - Biatah Bidayuh bible

AMOS 7

¹TUHAN Raja agi bada aku kiris kayuh keya ka darŭm pŭmŭh. Aku kiris Ayŭh napa dudu kadis-baga ripas daya muko kapŭg kupai yŭn raja. Di tika anŭ kupai mbŭh pari timbu.

²Aku kiris dudu kadis anŭ man sopŭrŭg kayuh barŭm di tana, ka komŭnŭ aku nang, “TUHAN Raja, apun daya Mai! Munki ngara re tan? Ngara raru sŭ buang ramah!”

³TUHAN nukar pikir-I ka nang, “Kayuh adi kuu kiris dŭh-i re jadi.”

⁴TUHAN Raja bada aku kiris dinge kayuh keya ka darŭm pŭmŭh. Aku kiris Ayŭh aŭn sidia re ngukum daya-I ngga apui. Apui anŭ man rawŭt bās di ribo tana, ka mbŭh piguru man tana.

⁵Komŭnŭ aku nang, “Sadang, TUHAN Raja! Munki daya Mai re tan? Ngara raru sŭ buang ramah!”

⁶TUHAN nukar pikir-I dinge ka nang, “Kayuh anŭ dŭh gŭh re jadi.”

⁷TUHAN bada aku kiris dinge kayuh. Aku kiris Ayŭh mijog sindŭk ndi sindung adi ko dog pijog pakai prambap, ka di tangan-I aku kiris prambap.

⁸Ayŭh siken di aku, “Amos, ani kiris mu?” “Prambap,” aku nam. Komŭnŭ Ayŭh nang, “Aku pakai-i ngga kiren daya Ku mbŭh keya ka sindung adi dŭh tŭnggŭn. Aku dŭh re nukar pikir Ku dinge pasar re ngukum ngara.

⁹Tarun tarun yŭn bara sesang Isaac bisambah re dog pirabur. Tarun tarun kudus Israel re jadi tibawang. Aku re bada taris asar pinyipritah Raja Jeroboam mungan.”

¹⁰Amaziah, imam di Bethel, pait ripot ati ka Jeroboam adi raja Israel: “Amos agi bipekat ngga daya bagŭ rawan kuu. Pinganang-i re pirusak rais.

¹¹Ati inŭh kayuh nang-i: ‘Jeroboam re kabŭs darŭm biperang, ka daya Israel re dog taran jo so rais adŭp ngara.’ ”

¹²Amaziah nang di Amos, “Mbŭh sadang inŭh anŭ, nabi! Pari ka Judah ka nggen ajar mu diginŭ. Bada ngara nggen gaji mu.

¹³Dŭh tia minyu-binabi digiti. Ati inŭh tarun yun raja bisambah, ramin sambah pritah.”

¹⁴Amos nam, “Aku dŭh nabi adi minyu-binabi amai raan trima gaji. Aku ati pingingat-dāng, ka tukang sita tŭngŭn tŭngŭn ara.

¹⁵Pak TUHAN tambit aku so kraja ku adi pingingat-biri ka mritah aku bada mandŭg di minyu-binabi di daya-I Israel.

¹⁶Jadi madin dingah kayuh adi TUHAN nang. Kuu bada aku dŭh tia minyu-binabi, dŭh tia minyu rawan daya Israel.

¹⁷Ngapŭi meh, Amaziah, TUHAN nang di kuu, ‘Sawŭn mu re jadi dayung sundar di aran kupo, ka bara anak mu re dog siŭ darŭm biperang. Tana mu re dog kutung ka dog nggen di daya bŭkŭn, ka adŭp mu re kabŭs di rais daya adi dŭh puan Tapa. Ka daya Israel taŭn re dog taran jo so rais adŭp ngara.’ ”