Read Biatah Bidayuh AMOS 8 Bible Online

AMOS 8 - Biatah Bidayuh bible

AMOS 8

¹TUHAN Raja kiren dinge kayuh di aku. Aku kiris ndi bakur brisi ngga buwa kayuh.

²TUHAN siken, “Amos, ani kiris mu?” “Bakur brisi ngga buwa kayuh,” aku nam. TUHAN nang di aku, “Mbŭh ripuan tipuh[9] daya Ku Israel. Aku dŭh re nukar pikir Ku pasar re ngukum ngara.

³Di andu anŭ ragu di istana re marui jadi puās. Di barang yŭn re agi tadang. Dudu tadang anŭ re dog taran ngga pajam.”[10]

⁴Dingah, angān adi bidigang di daya adi dŭh biyŭn kayuh ka suba an pirabur daya adi sirata darŭm rais.

⁵Angān nang, “Ata dŭh tungang kajŭn sinde primisi gawai anak buran ati re abo, yŭn ata re jua gandom ta. Sinde andu Sabbath re abo, isa ata bisa piguru bijua dinge? Nganŭ ata bisa paad rega kayuh pakai takar adi sarah, ka ngana batŭh timbang ngga nipu daya adi miris.

⁶Ata bisa jua gandom adi arap ngga rega adi bigatung. Ata re jiroh daya adi sirata adi dŭh tungang bayar utang-i, ndŭg ka rega ndi pasang kasut dŭh gŭh tungang bayar, ka ata re miris ayŭh jadi urun ta.”

⁷TUHAN, adi Tapa Israel, mbŭh bipayu, “Aku dŭh re kambŭt pingandai arap ngara.

⁸Ngapŭi tana re bigugoh, ka barang naan daya di tarun tana anŭ re muās. Ndi tarun tarun tana rais re bigugoh; tana re mūn maad mun Yang Nile.

⁹Tika-i re mandŭg adi ngga Aku bada batŭh andu mūn ngga arong kumbeng ka ong jadi karŭm di tipuh sandu. Aku, TUHAN Raja, mbŭh minyu.

¹⁰Aku re bada andu gawai ngan jadi andu nyikubur ka bada ragu pawŭn ngan jadi ragu puās. Aku re bada angān gumbak ubok ngan ka nēn banang guni, ka angān re mun pimas ngurid anak tambŭ-i. Andu anŭ re pa'it ndŭg pinŭbŭn-i.

¹¹“Tika-i re mandŭg adi ngga Aku pait apag ka tarun tana ati. Daya re sikirau, pak dŭh sikirau pinguman; daya re badŭh asŭng, pak dŭh sabab an nok piin. Ngara re sikirau ka badŭh asŭng di agah so TUHAN. Aku, adi TUHAN Raja, mbŭh minyu.

¹²Daya re bigandon so Rawŭt Pide ndŭg Rawŭt Mediterranean ka komŭnŭ so utara ndŭg timor. Ngara re jiroh di barang yŭn agah so TUHAN, pak ngara dŭh re dapŭd-i.

¹³Di andu anŭ dari ngga dayung adi piaŭn buang adi bua sanang, sirabi ka re tumbang sabab badŭh asŭng.

¹⁴Ngara adi bipayu pakai tibudo Samaria, buang nang, ‘Ngga dŭn tapa Dan,’ puan kah, ‘Ngga dŭn tapa Beersheba’, re rabu ka dŭh tia makat.”