Read Biatah Bidayuh AMOS 9 Bible Online

AMOS 9 - Biatah Bidayuh bible

AMOS 9

¹Aku kiris TUHAN mijog sindŭk mija-sambah. Ayŭh nang: “Bana mukong tibung tiang tiang bās Ramin TUHAN ndŭg ka awah-i bigugoh. Bada pata tiang tiang anŭ ka bada-i tumbang nyatŭk ubak bara daya. Aku re siŭ bara adi bŭkŭn darŭm perang. Mating daya re tungang bikaduh bu nyiramat adŭp-i.

²Sunggu ngara kareh rubang ndŭg ong daya adi mbŭh kabŭs bait kani, Aku re nakap ngara. Sunggu ngara maad ka shorga bait kani, Aku re taban ngara mūn.

³Kambŭi ngara bisukan di tibung Darŭd Carmel, Aku re jiroh ngara ka nakap ngara. Kambŭi ngara bisukan so Aku di rasan rawŭt, Aku re mritah dāng-bās-rawŭt anŭ[11] bada kuut ngara.

⁴Kambŭi ngara dog taban pinganyu ngga bu jadi daya adi dog taran, Aku re nggen ukum bada ngara dog siŭ. Aku mbŭh natu adŭp Ku an siŭ ngara, ka dŭh re turung ngara.”

⁵TUHAN Raja adi Bisa-pŭrŭg tama ong, ka-i bigugoh; sopŭrŭg adi rŭŭ dieh re muās. Ndi ong ong re maad mūn mun Yang Nile.

⁶TUHAN ndai yŭn pinyirŭŭ-I di rangit, ka nyirungan ong Ayŭh na sakŭb rangit. Ayŭh bagan piin so rawŭt, ka rēn-i di deyŭh. Adŭn-I inŭh TUHAN!

⁷TUHAN nang, “Daya Israel, Aku piduri daya Ethiopia mun Aku piduri angān. Aku taban daya Philistine so Crete ka daya Syria so Kir, mun Aku taban angān ruah so Egypt.

⁸Aku, adi TUHAN Raja, nyibatŭh pritah Israel adi bidosa ati, ka Aku re pirarap-i so ong. Pak Aku dŭh re pirabur sopŭrŭg sesang Jacob.

⁹“Aku re mritah, ka kusok daya Israel mun gandom di ayag. Aku re ngayag ngara di dupan bangsa bangsa ngga kadi sopŭrŭg adi dŭh biguna.

¹⁰Bara daya adi bidosa di dupan daya Ku re dog siŭ darŭm biperang, sopŭrŭg ngara adi nang, ‘Tapa re dŭh tandah pinyirusag dog ata.’ ”

¹¹ TUHAN nang, “Andu-i re mandŭg adi ngga Aku pari pijog pritah David, adi keya ka ramin adi mbŭh rubuh. Aku re nyurat sindung-i ka bada-i pari tagap mun dawŭ-i.

¹²Daya Israel re sirabut tana Edom adi dŭm, ka sopŭrŭg rais adi muko Aku dapu dawŭ-i,” nang TUHAN, adi re bada-i jadi simŭnŭ.

¹³“Tipuh-i re mandŭg,” nang TUHAN, “kan tŭngŭn gandom re raru rikas timbu ndŭg ka pingatŭm mbŭh dŭh patŭd patŭd, ka tŭngŭn anggor re raru rikas timbu ndŭg ka wain mbŭh dŭh rŭŭ rŭŭ dog ndai. Wain adi sidi re bititeg so darŭd, ka-i re aman so sandah.

¹⁴Aku re taban daya Ku pari ka tarun tana ngara. Ngara re pari pijog kupo kupo ngara adi mbŭh nyibawang ka rŭŭ diginŭ; ngara re ndai teya anggor ka nok wain; ngara re biteya birŭmŭh ka man kayuh adi ngara purun.

¹⁵Aku re purun daya Ku di tana adi Aku nggen di ngara, ka ngara dŭh re dog dimbut dinge.” TUHAN adi Tapa ngan mbŭh minyu.