Read Biatah Bidayuh OBADIAH 1 Bible Online

OBADIAH 1 - Biatah Bidayuh bible

OBADIAH 1

¹ Ati inŭh pinganang-binabi Obadiah, kayuh adi TUHAN Raja nang pasar daya Edom. TUHAN mbŭh pait pinyisung-I ka bangsa bangsa, ka ata mbŭh dingah pinganang-I: “Sidia adŭp ngan! Ja ata di biperang rawan Edom!”

²TUHAN nang di Edom, “Aku re piramah kuu; barang naan daya re ngamun kuu.

³Uap-sambuh mu mbŭh nipu kuu. Sindŭ kupo mu inŭh kuta adi dog ndai so tigŭrŭ batuh; yŭn pinyirŭŭ mu inŭh di tibung darŭd, ka kuu nang darŭm atin mu, ‘Asi re dapŭd pirabu aku?’

⁴Sunggu kuu pijog ramin mu di tarun adi bigatung mun sarin beuh, keya ka di ruang dudu bitang, Aku babŭ gŭh re pirabu kuu.

⁵“Kan pinaku mandŭg singarŭm ngara kaŭs-i tambit kayuh adi ngara raan adŭ. Kan daya sun buwa anggor, ngara ari kidŭm kada-i. Pak pinganyu mu re pirarap kuu.

⁶Bara sesang Esau, buat-rata ngan mbŭh dog sirapas.

⁷Pambit ngan mbŭh nipu angān; ngara mbŭh pibu angān so rais ngan. Daya adi ko bidamai ngga angān mbŭh nyerang angān madin. Bara jerā ngan adi ko samah man ngga angān mbŭh tŭŭn jarat ngga nakap angān; ngara nang pasar angān, ‘Diki meh sopŭrŭg pinyipitar ngara?’

⁸“Di andu Aku ngukum Edom, Aku re pirabur daya-i adi pitar ka kinating sopŭrŭg pinyibijak ngara.

⁹Bara pimagan Teman re taru, ka barang naan soldadu di Edom re dog siŭ.

¹⁰“Sabab angān mirupak ka siŭ jurud adŭp ngan,[1] adi sesang Jacob, angān re dog pirabur ka dog ngamun adu adu.

¹¹Angān dŭh mbit piduri kan pinganyu nyirubuh tiban tiban-bās kupo Jerusalem. Angān arap mun daya tami adi taban ngga bu pinyikaya Jerusalem ka kutung-i dupan adŭp ngara.

¹²Angān dŭh patut angan nasip arap jurud ngan di Judah. Angān dŭh patut gaŭn di andu pinyirubuh ngara. Angān dŭh patut tawŭh ngara dog nyatŭk pinyusah.

¹³Angān dŭh patut mŭrŭt kupo daya Ku. ka angan sangsara ngara ka sirapas pinyikaya ngara di andu pinyirusag nyatŭk ngara.

¹⁴Angān dŭh patut mijog di sakap aran ka nakap ngara adi suba an pirupas adŭp-i. Angān dŭh patut nggen ngara ka darŭm tangan pinganyu di andu ngara dog pinyusah.

¹⁵“Mbŭh re sindŭk andu adi ngga Aku, adi TUHAN, re bisara sopŭrŭg bangsa. Edom, anŭ adi kuu mbŭh ndai re dog ndai di kuu. Pingandai adŭp mu re nyatŭk kuu.

¹⁶Daya Ku ko nok saker ukum di sandah kudus[2] Ku. Pak sopŭrŭg bangsa adi maning anŭ re nok saker ukum adi rabis bisā; ngara re nok ndŭg abo ka ngara re miyap.

¹⁷“Pak di Sandah Zion agi adi re siramat, ka-i re jadi tarun adi kudus. Daya Judah re dapu tana adi mbŭh hak adŭp ngara.

¹⁸Daya Jacob ngga daya Joseph re keya ka apui; ngara re pirabur daya Esau nimun apui man siriyang. Mating sesang Esau re siramat. Aku, adi TUHAN, mbŭh minyu.

¹⁹“Daya so siratan Judah re ngisi Edom; ngara adi so sigŭn sandah parad ka barat re sirabut Philistia; Israel re dapu tarun tana Ephraim ngga Samaria; daya Benjamin re tambit Gilead.

²⁰Tibaran bara soldadu adi dog taran so parad ka utara Israel re pari ka ngarah Phoenicia, jeh ndŭg Zarephath di utara. Daya so Jerusalem adi dog taran ka Sardis re sirabut kupo kupo di parad ka siratan Judah.

²¹Daya Jerusalem adi mbŭh manang re nyerang Edom ka nguasa-i. Ka adŭp TUHAN re jadi Raja.”