Read Biatah Bidayuh JONAH 1 Bible Online

JONAH 1 - Biatah Bidayuh bible

JONAH 1

¹ Agi ndi sidah TUHAN minyu ngga Jonah anak Amittai.

²Ayŭh nang, “Panu di ka Nineveh, kupo bās anŭ, ka nang di bara daya-i; Aku puan munki masam arap-i ngara anŭ.”

³Pak Jonah matak ka tarun bŭkŭn ngga-i mangān TUHAN. Ayŭh di ka Joppa, di yŭn-i dapŭd ndi kapar adi re matak ka Spain. Ayŭh bayar tambang-i ka mŭrŭt kapar anŭ ngga bara daya bŭkŭn an di ka Spain, di yŭn-i bisa pijo adŭp-i so TUHAN.

⁴Pak TUHAN pait sabak adi raru bangat-i ka rawŭt, ka sabak ribut anŭ raru daras-i ndŭg ka kapar anŭ mbŭh re an pape.

⁵Bara adi tukang pimanu kapar taru ka nyirais bagan mite turung, masin masin di tapa adŭp-i. Komŭnŭ, ngga pijangan kapar,[1] ngara taran barang[2] ka darŭm rawŭt. Atan anŭ, Jonah mbŭh di ka rasan kapar ka bŭŭs rŭrŭ.

⁶Pingubak ngara adi pimanu kapar dapŭd ayŭh diginŭ ka nang di ayŭh, “Simuki kuu tungang bŭŭs di tika susah mun ati? Makat ka bidua ka tapa mu mite turung. Kadŭ ayŭh bisa masi di ata ka dŭh tandah ata dog pinyusah.”

⁷Ngara adi tukang pimanu kapar nang di dingan-i, “Ja taran dadu ngga jiroh asi dapu sarah adi bada ata dog pinyusah adi mun ati.” Ngara sawŭ taran dadu, ka dŭn Jonah meh adi dog.

⁸Ka ngara nang di ayŭh: “Kidaan di kieh! Kuu kah adi taban pinyusah ati? Ani ndai mu digiti? So ki kuu, ani bangsa mu?”

⁹“Aku ati daya Jahudi,” Jonah nam. “Aku nyambah TUHAN, adi Tapa di shorga, adi napa deyŭh ngga rawŭt.”

¹⁰Jonah kidaan di ngara nang adŭp-i bu mangān TUHAN. Bara adi tukang pimanu kapar mbŭh taru, ka nang di ayŭh, “Anŭ inŭh kayuh adi raru arap!”[3]

¹¹Sabak ribut anŭ mbŭh tanŭ ka bitambah daras, jadi bara adi tukang pimanu kapar siken di ayŭh, “Ani patut ami ndai di kuu ngga bada sabak ribut ati rŭŭ?”

¹²Jonah nam, “Taran aku ka darŭm rawŭt, ka sabak ribut re rŭŭ. Aku puan anŭ mbŭh sarah ku inŭh angān dog sabak ribut adi raru daras ati.”

¹³Pak, bara adi pimanu kapar suba an taban kapar ka tabing, bikayuh ngga situngang tungang ngara. Pak sabak ribut tanŭ ka makin daras maka ngara, ka ngara mbŭh dŭh dapŭd ndai ani ani.

¹⁴Jadi ngara nyirais bagan mite turung so TUHAN, “O TUHAN, kieh bidua, dŭhnyah ngukum kieh ngga pinyikabŭs sitagar kieh siŭ daya ati! Kaam, O TUHAN, inŭh adi dapu tanggong di sopŭrŭg kayuh ati; kayuh ati inŭh pingandai adŭp Mai.”

¹⁵Komŭnŭ ngara tunduk Jonah ka taran ayŭh ka darŭm rawŭt, ka sabak ribut rasu rŭŭ.

¹⁶Ati bada ngara adi tukang pimanu kapar raru taru di TUHAN ka jugan sadis ka bijanji an bituan di Ayŭh.

¹⁷ So ka pinyibada TUHAN ndi tibande iken tŭrŭn Jonah, ka ayŭh mbŭh darŭm tain iken sitian taruh andu ngga taruh ngarŭm.