Read Biatah Bidayuh JONAH 2 Bible Online

JONAH 2 - Biatah Bidayuh bible

JONAH 2

¹So darŭm tain iken Jonah bidua ka TUHAN adi Tapa-i:

²“Darŭm pinyusah ku, O TUHAN, aku bagan Kaam ka Kaam nam aku. So ong daya adi mbŭh kabŭs aku bagan mite turung, ka Kaam dingah aku.

³Kaam taran aku ka yŭn adi tŭrŭp, ka rasan rawŭt, di yŭn ku dog ngapuh piin, ka girumbang Mai adi bikuasa gurai aku.

⁴Aku pikir aku mbŭh miyap so sirung jawin Mai ka re dŭh tia kiris Ramin Kudus Mai.

⁵Piin ngapuh aku ka aku mbŭh aka; rawŭt mbŭh marut ndi pŭrŭng ganan ku, ka uduh rawŭt marut ubak ku.

⁶Aku mūn di ka uat uat darŭd, di ka tarun tana adi yŭn tiban adu adu bitŭŭp.[4] Pak Kaam, O TUHAN Tapa ku, nyiramat aku so yŭn tŭrŭp.

⁷Kan aku kinyam adŭp ku mbŭh re dŭh rada tarun, nganŭ, O TUHAN, aku bidua ka Kaam, ka di darŭm Ramin Kudus Mai Kaam dingah aku.

⁸Ngara adi nyambah tibudo adi dŭh biguna mbŭh tagan Kaam ka dŭh tia tŭtŭd.

⁹Pak aku re nang ragu puji ka Kaam; aku re jugan sadis ka Kaam ka ndai kayuh adi aku mbŭh bijanji an ndai. Pinyiramat mandŭg so TUHAN!”

¹⁰Komŭnŭ TUHAN mritah iken bada ruān Jonah di tabing rawŭt, ka-i sawŭ ndai simŭnŭ.