Read Biatah Bidayuh PINYIKIANG 10 Bible Online

PINYIKIANG 10 - Biatah Bidayuh bible

PINYIKIANG 10

¹TUHAN nang di Moses,

²“Ndai duwŭh trompet so pirak adi dog maba ngga bagan daya bada tikuruk ka ngga piguru natas bari.

³Kan so-duwŭh trompet anŭ tui dog mambak, sopŭrŭg daya Israel siŭn tikuruk maning kuu di rawa tiban Bari Ku.

⁴Pak kan ndi adŭ trompet dog mambak, anŭ ngga bagan pinguru manak manak adŭ bada tikuruk maning kuu.

⁵Kan jawŭn-i purok adŭ, tibaran tibaran-asar adi bibari tura ka timor siŭn makat ka piguru panu.

⁶Kan jawŭn anŭ adi purok dog mambak piduwŭh kari, tibaran tibaran-asar adi bibari tura ka siratan siŭn makat ka piguru panu. Jadi jawŭn adi purok dog mambak ngga bada daya natas bari,

⁷pak ngga bagan sopŭrŭg daya Israel bada tikuruk, jawŭn adi tui siŭn dog mambak.

⁸Trompet trompet siŭn dog mambak anak anak Aaron, adi bara imam. “Atur ati an adu adu dog sita.

⁹Kan angān biperang di tarun tana ngan, tak adŭp ngan so pinganyu adi nyerang angān; mambak trompet anŭ kan re biperang. Aku, TUHAN adi Tapa ngan, re turung angān ka nyiramat angān so pinganyu ngan.

¹⁰Simŭnŭ gŭh di tipuh pawŭn, mun di tika Gawai Anak Buran ngga di tika gawai gawai adat adi bŭkŭn; angān siŭn mambak trompet trompet kan angān jugan sadis badang ngga sadis bidingan. Jadi Aku re turung angān. Aku ati TUHAN adi Tapa ngan.”

¹¹Di andu adi duwŭh puru darŭm buran adi duwŭh darŭm sawa adi duwŭh ripas bara daya bu so Egypt, abun anŭ adi nyirungan Bari TUHAN makat,

¹²ka bara daya Israel piguru pimanu ngara ruah so Tarun tana-pajam Sinai. Abun anŭ rŭŭ di tarun tana-pajam Paran.

¹³Ngara piguru matak so ka pesan TUHAN so baba Moses,

¹⁴ka niap saba ngara matak, ngara siraru pakai atur simuti: Ngara adi di ribo binira-uruk adi dog nguru tibaran-asar Judah diŭ panu, tibaran tunda tibaran, dog nguru Nahshon anak Amminadab.

¹⁵Nethanel anak Zuar, jadi pinguru tibaran-asar Issachar,

¹⁶ka Eliab anak Helon, jadi pinguru tibaran-asar Zebulun.

¹⁷Kan Bari TUHAN dog natas, bara manak Gershon ngga Merari, adi gŭrŭng-i, siŭn panu gŭh.

¹⁸Komŭnŭ, ngara adi di ribo binira-uruk adi dog nguru tibaran-asar Reuben panu, tibaran tunda tibaran, dog nguru Elizur anak Shedeur.

¹⁹Shelumiel anak Zurishaddai jadi pinguru tibaran-asar Simeon,

²⁰ka Eliasaph anak Deuel jadi pinguru tibaran-asar Gad.

²¹Komŭnŭ Levi adi manak Kohath piguru panu, taban kayuh kayuh kudus. Kan ngara mbŭh ndŭg tarun yŭn bibari anŭ ndi, Bari TUHAN taŭn mbŭh dog pijog.

²²Ripas anŭ, ngara adi di ribo binira-uruk adi dog nguru tibaran-asar Ephraim siŭn panu, tibaran tunda tibaran, dog nguru Elishama anak Ammihud.

²³Gamaliel anak Pedahzur jadi pinguru tibaran-asar Manasseh,

²⁴ka Abidan anak Gideoni jadi pinguru tibaran-asar Benjamin.

²⁵Sikasŭn-i, ngara adi di ribo binira-uruk adi dog nguru tibaran-asar Dan, adi jadi tukang jaga tura ka punok sopŭrŭg uruk, siŭn panu, tibaran tunda tibaran dog nguru Ahiezer anak Ammishaddai.

²⁶Pagiel anak Ochran jadi pinguru tibaran-asar Asher,

²⁷ka Ahira anak Enan jadi pinguru tibaran-asar Naphtali.

²⁸Anŭ, inŭh gaya pingatur darŭm pimanu, tibaran tunda tibaran, niap saba bara daya Israel natas bari ka bipindah.

²⁹Moses nang di sike-i Hobab anak Jethro daya Midian, “Ata re matak ka tarun adi TUHAN nang adŭp-I re nggen di ata. Ayŭh mbŭh bijanji an bada Israel mujur, jadi ja meh tunda kieh, ka kieh re bada kuu sua dapu pimujur ami.”

³⁰Hobab nam, “Dŭh, aku re pari ka tarun tana asar adŭp ku.”

³¹“Turung dŭhnyah tingge kieh,” Moses nang. “Kuu puan diki bisa bibari di tarun tana-pajam, ka kuu inŭh adi bisa nguru kieh.

³²Kambŭi kuu sua ngga kieh, kieh re samah ngga kuu sopŭrŭg berkat adi TUHAN nggen di kieh.”

³³Kan bara daya bu so Sinai, darŭd kudus, ngara panu sitian taruh andu. Pati Simanya TUHAN taŭn ari dog taban diŭ so ngara, jiroh tarun yŭn ngara bibari.

³⁴Darŭm ngara bipindah so barang tarun yŭn bibari, abun TUHAN agi nyirungan ngara sandu.

³⁵ Niap saba Pati Simanya dog pakat ngga panu, Moses nang, “Makat TUHAN; mesak pinganyu Mai ka bada ngara adi tiru di Kaam babak bu!”

³⁶Ka niap saba-i rŭŭ, ayŭh nang, “Pari, TUHAN, ka yŭn biribu ribu rawang daya Israel.”