Read Biatah Bidayuh PINYIKIANG 11 Bible Online

PINYIKIANG 11 - Biatah Bidayuh bible

PINYIKIANG 11

¹Bara daya piguru mingungut di TUHAN pasar pinyusah ngara. Kan TUHAN dingah ngara, Ayŭh jadi baji ka pait apui bada nyatŭk ngara. Apui anŭ bijagu di ruang ngara ka man ndi bŭngŭn tarun yŭn bibari.

²Bara daya mite turung so Moses; ayŭh bidua ka TUHAN, ka apui anŭ pura.

³Ngapŭi tarun anŭ dog kadŭn Taberah,[2] sabab diginŭ apui TUHAN agi bijagu di ruang ngara.

⁴Daya daya pinami agi sua bigandon ngga bara daya Israel. Ngara mbŭh raru kirarŭn an man dagin, ka adŭp daya daya Israel gŭh mbŭh piguru mingungut, nang: “Kasi kambŭi ata biyŭn dagin!

⁵Di Egypt ata ari man iken sikiang adi ata raan, buang-i dŭh mbar rega-i. Ingat meh timun, simaka, ka tŭngŭn bang, bang bireh, ka bang buda adi ata ari biyŭn diginŭ?

⁶Pak madin mating tia pinyibake ta. Mbŭh mating ani ani re ata man tia, adŭ-i manna adi barang andu ata man!”

⁷ (Manna inŭh mun ruwang adi siit, buda sia kala-i.

⁸ Manna rabu di tarun yŭn bibari singarŭm samah sipot-abun. Ngga isan isan bara daya ruah di sun-i, ngisar bait pŭh-i da jadi tibaduk, ka komŭnŭ tanŭk-i ka bada-i jadi kue-pipi. Sap-i nyam ruti adi dog ndai ngga inyo kanā.)

¹⁰Moses dingah sopŭrŭg daya mingungut darŭm ngara mijog darŭm tibaran di rawa bari bari ngara. Ayŭh raru susah amai TUHAN mbŭh baji di ngara,

¹¹ka-i nang di TUHAN, “Mani Kaam simuti ngga aku? Mani Kaam dŭh sanang asŭng di aku? Mani Kaam bada aku dapu tanggong sopŭrŭg daya ati?

¹²Aku mating napa bait biranak ngara! Mani Kaam bada aku mun adi mira ngara, puko ngara mun anak pira di ka tarun tana adi Kaam mbŭh bijanji di tayung-babuk ngara?

¹³So ki aku re dapŭd dagin sadang yŭn sopŭrŭg daya anŭ? Ngara marar sien sien mite dagin.

¹⁴Dŭh aku tungang sadi adŭp ku dapu tanggong bara daya anŭ; mbŭh dŭh aku tan!

¹⁵Kambŭi Kaam re adu adu simuti ngga aku, masi di aku ka siŭ adŭ aku, isa aku dŭh tia kinyam andam ati adi Kaam nggen di aku.”

¹⁶TUHAN nang di Moses, “Nguruk ju puru naan ngara adi dog stabi, adi traŭn tungang jadi pinguru bara daya Israel; taban ngara ka Aku di Bari Ku, ka bada ngara mijog diginŭ ngapid kuu.

¹⁷Aku re mūn ka minyu ngga kuu diginŭ, ka Aku re tambit kada roh adi Aku ko nggen di kuu ka nggen-i di ngara. Simŭnŭ ngara re bisa turung kuu di pinanggong mu di bara daya ati; simŭnŭ kuu dŭh re tia gŭrŭng-i sadi adŭp mu.

¹⁸Madin kidaan di bara daya, ‘Pibisig adŭp ngan yŭn andu sipagi; agi dagin re ngan man. TUHAN mbŭh dingah sien ngan buang angān ingat munki masam kirarŭn angān an man dagin, ka nang adŭp ngan biyŭn sukup di andu angān babŭ di Egypt. Madin TUHAN re nggen dagin di angān ka angān dŭh siŭn dŭh man-i.

¹⁹Angān re man-i dŭh ndi duwŭh andu adŭ, puan kah rimŭh andu, puan kah simŭng andu, puan kah duwŭh puru andu,

²⁰pak sitŭkŭd ndi buran, ndŭg ka-i ruah so kajit ngan, ndŭg ka angān an nguta da-i. Kayuh anŭ re jadi simŭnŭ sabab angān tirawan TUHAN adi agi ngga angān digiti ka mbŭh mingungut nang adŭp ngan patut dŭh bu so Egypt.’ ”

²¹Moses nang di TUHAN, “Madin Aku nguru 600,000 naan daya, ka Kaam nang adŭp Mai re nggen dagin sadang man ngara sitŭkŭd ndi buran?

²²Sadang kah dudu sapi ngga biri biri dog siŭ ngga pimunos ngara? Sadang kah sopŭrŭg iken di rawŭt yŭn ngara?”

²³“Agi kah pinyikurang di kuasa Ku?” TUHAN nam. “Kuu re kiris sawŭ kah dŭh kayuh adi Aku muko nang jadi bitŭtŭk!”

²⁴Jadi Moses di ruah ka kidaan di bara daya kayuh adi TUHAN mbŭh nang. Ayŭh nguruk ju puru naan pinguru ka bada ngara mijog maning Bari TUHAN.

²⁵Komŭnŭ TUHAN mūn darŭm abun ka minyu ngga ayŭh. Ayŭh tambit kada roh adi-I ko nggen di Moses ka nggen-i di ju puru naan bara pinguru anŭ. Kan roh anŭ mbŭh mūn di tunduh ngara, ngara nyirais sak bara nabi, pak dŭh tui.

²⁶Duwŭh naan so bara pinguru anŭ adi ju puru naan, Eldad ngga Medad, babŭ di tarun yŭn bibari ka dŭh sua di ka Bari TUHAN. Diginŭ di yŭn bibari roh mandŭg ka ngara, ka ngara gŭh nyirais sak nabi.

²⁷Ndi naan dari adi mara mandŭg ka kidaan di Moses kayuh adi mbŭh jadi di Eldad ngga Medad.

²⁸Komŭnŭ Joshua anak Nun, adi jadi pinurung Moses so-i gi-mara, minyu ka nang di Moses, “Bada ngara pajam, tuan!”

²⁹Moses nam, “Bipikir kah kuu di kayuh ati? Kasi kambŭi TUHAN an nggen Roh-I di sopŭrŭg daya-I ka bada sopŭrŭg ngara nyirais sak bara nabi!”

³⁰Komŭnŭ Moses ngga bara pinguru Israel anŭ pari ka tarun yŭn bibari.

³¹Ka gŭgŭh TUHAN pait sabak adi taban manuk manuk pŭpŭng so rawŭt, mikabur kurang so ndi mita so tana. Dudu manuk anŭ mbap di tunduh bari bari samŭn di ndi tarun tana maning anŭ ka mingare ndŭg ka bikilo-kilo mita bayah-i di barang parad.[3]

³²Jadi ndi andu andu anŭ, ndi ngarŭm ngarŭm, ka ndi andu andu anŭ ndi, bara daya nyiraja nakap manuk pŭpŭng; mating adi nguruk kurang so siribu kilogram pŭrŭng manuk. Ngara tipan-i yŭn dawan da pisŭk maning sopŭrŭg parad tarun yŭn bibari.

³³Sitadŭn dagin gibabŭ bagŭ yŭn ngara, TUHAN jadi baji ngga bara daya ka bada sesak-andam nyerang ngara.

³⁴Tarun anŭ rasu dog kadŭn Kibroth Hattaavah (rati-i “Kubur bara daya adi Kirarŭn”), sabab diginŭ ngara kubur bara daya adi kirarŭn an man dagin.

³⁵So nŭ bara daya bipindah ka Hazeroth, ka bibari diginŭ.