Read Biatah Bidayuh PINYIKIANG 18 Bible Online

PINYIKIANG 18 - Biatah Bidayuh bible

PINYIKIANG 18

¹TUHAN nang di Aaron, “Kuu, anak anak dari mu, ngga daya Levi dŭh siŭn dŭh dog ukum kambŭi angān ndai sarah darŭm angān nyiraja darŭm Bari Ku; pak adŭ-i kuu ngga anak anak dari mu re dog ukum kambŭi ndai sarah darŭm ndai kraja imam.

²Taban mŭrŭt jurud madis mu, adi tibaran-asar Levi, da nyiraja ngga angān ka turung kuu sitadŭn kuu ngga anak anak dari mu nyiraja di Bari Ku.

³Di ribo kuu ngara an pijadi kraja ngara samŭn pinanggong ngara di Bari Ku, pak ngara dŭh siŭn nyingŭg kayuh kayuh kudus di Yŭn Kudus puan kah mija-sambah. Kambŭi ngara miranggar atur anŭ, kuu ngga ngara re dog ukum kabŭs.

⁴Ngara siŭn nyiraja ngga kuu ka pijadi pinanggong ngara yŭn sopŭrŭg kraja pingandai di Bari Ku, pak daya adi dŭh dog nggen hak ndai kraja diginŭ dŭh siŭn nyiraja ngga kuu.

⁵Kuu ngga anak anak dari mu adŭ adi bisa ndai kraja di Yŭn Kudus ngga di mija-sambah, isa baji Ku dŭh tia nyatŭk daya Israel.

⁶Aku inŭh adi mien jurud madis mu daya Levi so dupan daya Israel ndu pinganggen ka kuu. Ngara mbŭh dog nitah ka Aku, isa ngara dapŭd ndai kraja ngara di Bari Ku.

⁷Pak kuu ngga anak anak dari mu sadi adŭ siŭn pijadi sopŭrŭg pinanggong imam tura ka mija-sambah ka kayuh adi di Yŭn adi Siabo Kudus. Kayuh kayuh anŭ inŭh pinanggong mu, sabab Aku mbŭh nggen di kuu kraja imam. Tadŭ daya adi dŭh dog nggen hak mandŭg nyindŭk kayuh kayuh adi kudus anŭ dŭh siŭn dŭh dog ukum kabŭs.”

⁸TUHAN nang di Aaron, “Ingat Aku mbŭh nggen di kuu sopŭrŭg pinganggen adi grua adi dog jugan ka Aku adi dŭh dog badang jadi sadis. Aku nggen-i di kuu ka di bara sesang mu ndu utung ngan ndŭg situi tui.

⁹So sadis adi siabo kudus adi dŭh dog badang di tunduh mija-sambah, anŭ mbŭh tung jamu: sadis ruwang kayuh, sadis taran dosa, ka sadis bayar gati rugi. Sopŭrŭg kayuh adi dog jugan ka Aku ndu sadis adi kudus, inŭh kuu ngga anak anak dari mu dapu.

¹⁰Angān dŭh siŭn dŭh man kayuh kayuh anŭ di yŭn kudus, ka kaŭs-i dari adŭ adi bisa man-i; nyirundeng-i kayuh kudus.

¹¹“Ngga nambah anŭ, tadŭ tadŭ pinganggen adi grua adi bŭkŭn adi daya daya Israel jugan ka Aku siŭn jadi tung jamu. Aku nggen-i di kuu, di anak anak dari mu, ka di anak anak dayung mu yŭn situi tui. Barang naan di rawang mu adi bisig nanyam ka adat siŭn man-i.

¹²“Aku nggen di kuu pinganggen buwa bungas adi siabo kana adi daya Israel nggen di Aku barang sawa, mun inyo kanā, wain, ka gandom.

¹³Sopŭrŭg anŭ mbŭh tung jamu. Barang naan di rawang mu adi bisig nanyam ka adat siŭn man-i.

¹⁴ “Sopŭrŭg kayuh di Israel adi mbŭh dog nitah ka Aku mbŭh tung jamu.

¹⁵“Barang naan anak pinuai puan kah anak bungas dāng adi daya daya Israel jugan ka Aku mbŭh tung jamu. Pak kuu dŭh siŭn dŭh an nubos anak pinuai, ka dŭh siŭn dŭh gŭh an nubos barang anak bungas dāng adi kais nanyam ka adat.

¹⁶Anak-sŭ an dog nubos kan umbur-i mbŭh ndi buran pakai rimŭh kiping pirak adi mbŭh dog ngŭtŭ, nanyam ka rega adi dog miratak di Bari Ku.

¹⁷Pak anak bungas sapi, biri, ka kambing bisa dŭh dog nubos; anŭ taŭn mbŭh tung jaku ka siŭn dog nyadis. Naui deya dāng dāng anŭ di mija-sambah ka badang ramak-i ndu sadis pinguman, ka dagŭn-i pimunos asŭng Ku.

¹⁸Dagin dāng dāng anŭ mbŭh jamu, mun isin sudo ngga sape tauh adi taŭn mbŭh pinganggen adi grua.

¹⁹“Aku re nggen di kuu, di anak anak dari mu, ka di anak anak dayung mu, yŭn adu adu, sopŭrŭg pinganggen adi grua adi bara daya Israel jugan ka Aku. Anŭ inŭh simanya adi dŭh siŭn dog kabang adi Aku ndai ngga kuu ka ngga sesang sesang mu.”

²⁰TUHAN nang di Aaron, “Kuu dŭh re kambat buat-rata adi bisa jadi bisaka yŭn turap bauh, ka mating utung tana Israel re dog nggen di kuu. Aku, adi TUHAN, inŭh utung mu.”

²¹ TUHAN nang, “Aku mbŭh nggen di daya Levi barang pinganggen ndi utung-so-simŭng adi daya Israel jugan ka Aku. Anŭ inŭh ndu pinyibayar yŭn kraja ngara adi sita Bari Ku.

²²Daya daya Israel adi bŭkŭn dŭh siŭn tudu Bari Ku amai simŭnŭ ngara tŭd adŭp-i ka ukum kabŭs.

²³So madin kaŭs-i daya Levi adi re sita Bari Ku ka re dapu tanggong ngga sipuno-i di kraja anŭ. Ati inŭh atur adi dŭh siŭn dog nukar, yŭn bara sesang mu ani. Daya Levi dŭh siŭn biyŭn rata adi ruro ngara dapu di Israel,

²⁴sabab Aku mbŭh nggen di ngara ndu utung ngara pinganggen ndi utung-so-simŭng adi daya Israel nggen di Aku ndu pinganggen adi grua. Anŭ sabab Aku mbŭh kidaan di ngara nang ngara dŭh re biyŭn rata adi ruro ngara dapu di Israel.”

²⁵TUHAN Pesan di Moses,

²⁶da kidaan di daya Levi: “Kan angān kambat so daya Israel pinganggen ndi utung-so-simŭng adi TUHAN nggen di angān ndu utung bās ngan, angān dŭh siŭn dŭh nggen ndi utung-so-simŭng so pinganggen anŭ ndu pinganggen adi grua ka TUHAN.

²⁷Pinganggen adi grua anŭ bisa dog nyirundeng brinyam ngga sadis gandom bauh ngga wain bauh adi daya adi biteya birŭmŭh jugan.

²⁸Ngga aran ati angān an gŭh nggen pinganggen adi grua ka TUHAN so sopŭrŭg pinganggen ndi utung-so-simŭng adi angān trima so daya Israel. Angān siŭn nggen pinganggen adi grua ati ka TUHAN di Aaron adi imam.

²⁹Nggen pinganggen so anŭ adi siabo kana adi angān mbŭh trima.

³⁰Kan angān muko nggen anŭ adi siabo kana, angān bisa nyikŭn tadŭh-i, nimun daya adi biteya birŭmŭh nyikŭn tadŭh tung jangi ripas-i muko jugan jangi pinganggen.

³¹Angān ngga rawang rawang ngan bisa man tadŭh anŭ di tadŭ yŭn-i, sabab anŭ mbŭh gaji ngan adi nyiraja di Bari TUHAN.

³²Angān dŭh sarah kan angān man-i, atas angān muko jugan anŭ adi siabo kana ka TUHAN. Pak dŭhnyah nyembar pinganggen adi kudus anŭ so daya Israel darŭm angān man-i diŭ so adi siabo kana dog jugan; kambŭi angān ndai simŭnŭ, angān re dog ukum kabŭs.”