Read Biatah Bidayuh PINYIKIANG 20 Bible Online

PINYIKIANG 20 - Biatah Bidayuh bible

PINYIKIANG 20

¹Darŭm sibungas buran sopŭrŭg daya Israel di ka tarun tana-pajam Zin ka bibari di Kadesh. Diginŭ Miriam kabŭs ka dog kubur.

² Mating piin di tarun yŭn ngara bibari, jadi bara daya mandŭg tikuruk maning Moses ngga Aaron,

³buang mingungut: “Mbŭh kana dŭ ata pati ka samah kabŭs ngga bara dingan ta daya Israel di rawa Bari TUHAN.

⁴Mani angān taban kieh di ka tarun tana-pajam ati? Isa kieh kabŭs digiti samah ngga dāng dāng ami kah?

⁵Mani angān taban kieh ngga bu so Egypt di ka tarun tana ati adi ruai arap, buang mating ani ani timbu dieh? Gandom mating, tŭngŭn ara mating, tŭngŭn anggor mating, tŭngŭn delima mating. Piin re nŭŭh nok mating gŭh!”

⁶Moses ngga Aaron bu so yŭn bara daya ka mijog di tiban Bari TUHAN. Ngara mutu ubak ngara, ka jawa bragah TUHAN nandŭng di ngara.

⁷TUHAN nang di Moses,

⁸“Tambit sikud anŭ adi di jawin Pati Simanya, komŭnŭ kuu ngga Aaron nguruk sopŭrŭg daya Israel. Diginŭ di sirung jawin sopŭrŭg ngara minyu di batuh ajeh, ka piin re minapus ruah so dieh. Simŭnŭ kuu re piruah piin so batuh anŭ yŭn bara daya samŭn dāng dāng ngara bada nok.”

⁹Moses di ka tambit sikud anŭ nimun TUHAN mbŭh bada.

¹⁰Ayŭh ngga Aaron nguruk sopŭrŭg daya Israel di jawin batuh anŭ, ka Moses nang, “Dingah angān adi an birawan! Patut kah kieh piruah piin so batuh ati yŭn ngan?”

¹¹Komŭnŭ Moses pakat sikud anŭ ka mupu batuh anŭ piduwŭh kari ngga sikud anŭ, ka piin bagŭ ruah so dieh, ka sopŭrŭg daya samŭn dāng nok-i.

¹²Pak TUHAN nang Moses ngga Aaron. Ayŭh nang, “Sabab angān dŭh biyŭn puno pinyabah di Aku ngga ngaku kuasa Ku adi kudus di sirung jawin daya Israel, angān dŭh re nguru ngara ka tarun tana adi Aku mbŭh bijanji an nggen di ngara.”

¹³Kayuh anŭ jadi di Meribah[7] adi yŭn daya Israel mingungut rawan TUHAN, ka di yŭn-I kiren di ngara nang adŭp-I kudus.

¹⁴Moses pait bara pinyisung so Kadesh ka yŭn raja di Edom. Ngara nang, “Pinganang ati so bara madis mai, tibaran-asar daya Israel. Kaam puan pinyusah adi mbŭh dog kieh,

¹⁵munki tayung-babuk ami di ka Egypt, di yŭn ami rŭŭ bisawa sawa. Daya Egypt kinanyuh bara tayung-babuk ami, samŭn kieh,

¹⁶ka kieh sien bagan TUHAN bada turung kieh. Ayŭh dingah sien ami ka pait ndi naan malaikat, adi taban kieh ruah so Egypt. Madin kieh mbŭh di Kadesh, anak kupo di baat tarun tana ngan.

¹⁷Turung nyibandar kieh mutas tarun tana ngan. Kieh ngga dāng kudip ami batur panu kadŭg aran adŭ ka kieh dŭh re digang ŭmŭh puan kah teya anggor ngan, ka kieh dŭh gŭh re nok piin so prigi ngan. Kieh re adu adu panu di aran bās[8] adŭ, ndŭg ka kieh mbŭh ruah so tarun tana ngan.”

¹⁸Pak daya Edom nam, “Kieh dŭh re bada angān panu mutas rais ami! Kambŭi angān suba mutas, kieh re ruah di nyerang angān.”

¹⁹Daya Israel nang, “Kieh re adu adu panu di aran bās adŭ, ka kambŭi kieh puan kah dāng ami nok piin ngan, kieh re bayar. Kaŭs kieh raan panu mutas adŭ.”

²⁰Daya Edom nang dinge, “Dŭh bisa!” ka ngara matak taban bara soldadu adi bās re an nyerang daya Israel.

²¹Sabab daya Edom abah bada daya Israel panu mutas tarun tana ngara, daya Israel biruit kadŭg aran adi bŭkŭn adŭ.

²²Sopŭrŭg daya Israel bu so Kadesh ka mandŭg ka Darŭd Hor,

²³di baat Edom. Diginŭ TUHAN nang di Moses ngga Aaron,

²⁴“Aaron dŭh re mŭrŭt tarun tana adi Aku mbŭh bijanji an nggen di Israel; ayŭh re kabŭs, sabab angān duwŭh mbŭh rawan pinganang Ku di Meribah.

²⁵Taban Aaron ngga anak dari-i Eleazar ka maad Darŭd Hor,

²⁶ka diginŭ pirukos jipo-ambu imam Aaron, ka kasŭk-i di Eleazar. Aaron re kabŭs diginŭ.”

²⁷Moses ndai nimun pinyibada TUHAN. Ngara maad Darŭd Hor dog kiris sopŭrŭg daya Israel,

²⁸ ka Moses pirukos jipo-ambu imam Aaron ka kasŭk-i di Eleazar. Diginŭ di tibung darŭd Aaron kabŭs, ka Moses ngga Eleazar mūn pari.

²⁹Sopŭrŭg daya Israel mbŭh puan nang Aaron mbŭh kabŭs, ka sopŭrŭg ngara ngurid ayŭh sitŭkŭd taruh puru andu.