Read Biatah Bidayuh PINYIKIANG 23 Bible Online

PINYIKIANG 23 - Biatah Bidayuh bible

PINYIKIANG 23

¹Ayŭh nang di Balak, “Pijog ju mija-sambah digiti yŭn ku, ka taban ka yŭn ku ju dari sapi ka ju dari biri.”

²Balak ndai nimun adi mbŭh dog bada, ka ayŭh ngga Balaam nyadis ndi dari sapi ngga ndi dari biri di tunduh barang mija-sambah.

³Komŭnŭ Balaam nang di Balak, “Mijog digiti sindŭk sadis adi kuu badang, atan aku di tingga re bidapŭd kah dŭh TUHAN ngga aku. Aku re kidaan di kuu ani bait ani adi Ayŭh pinandŭng di aku.” Jadi ayŭh di sadi-i ka tibung ndi sandah,

⁴ka Tapa bidapŭd ngga ayŭh. Balaam nang di Ayŭh, “Aku mbŭh pijog ju mija-sambah ka nyadis ndi dari sapi ngga ndi dari biri di tunduh barang mija.”

⁵TUHAN kidaan di Balaam kayuh adi patut-i nang, ka bada ayŭh pari ka yŭn Balak bada nggen pinganang-I di ayŭh.

⁶Jadi ayŭh pari ka dapŭd Balak gibabŭ mijog sindŭk sadis adi-i badang, samah ngga bara pinguru daya Moab.

⁷Balaam minyu pinganang binabi-i: “Balak adi raja daya Moab mbŭh taban aku so Syria, so darŭd tura ka timor. ‘Mandŭg minyu yŭn ku,’ ayŭh nang, ‘Mangu daya Israel.’

⁸Simuki aku bisa mangu kayuh adi Tapa dŭh mangu, bait minyu pasar pinyirusag kan TUHAN dŭh nang ani ani?

⁹So tunduh batuh batuh adi bigatung aku tungang kiris ngara; aku tungang nyibatŭh ngara so dudu sandah. Ngara inŭh ndi bangsa adi udip sadi; ngara puan adŭp-i mbŭh dog nyiberkat rabis so bangsa bangsa bŭkŭn.

¹⁰Sesang sesang daya Israel keya ka dabu; ngara mbŭh raru bagŭ ka dŭh batah dog mirang. Bada aku nŭbŭn pimudip ku nimun ndi so daya TUHAN; bada aku kabŭs ngga sanang nimun daya tŭnggŭn.”

¹¹Komŭnŭ Balak nang di Balaam, “Ani ati ndai mu di aku? Aku taban kuu kamati di mangu bara pinganyu ku, pak gŭt kuu nyiberkat ngara?”

¹²Ayŭh nam, “Aku nang kayuh kaŭs-i kayuh adi TUHAN bada aku nang.”

¹³Komŭnŭ Balak nang di Balaam, “Ja tunda aku di ka tarun bŭkŭn adi so mu bisa kiris kada daya Israel adŭ. Mangu ngara yŭn ku so nŭ.”

¹⁴Ayŭh taban Balaam ngga di ka tana Zophim di tibung Darŭd Pisgah. Diginŭ ayŭh pijog gŭh jŭ mija-sambah, ka nyadis ndi dari sapi ka ndi dari biri di tunduh barang mija-sambah anŭ.

¹⁵Balaam nang di Balak, “Mijog digiti sindŭk sadis badang mu, ka aku re di kamajeh bidapŭd ngga Tapa.”

¹⁶Tapa bidapŭd ngga Balaam, ka kidaan di ayŭh kayuh adi patut-i nang, ka bada ayŭh pari ka yŭn Balak ka nggen pinganang-I di ayŭh.

¹⁷Jadi ayŭh pari ka dapŭd Balak gibabŭ mijog sindŭk sadis badang-i, samah ngga bara pinguru daya Moab. Balak siken ani kayuh adi TUHAN mbŭh nang,

¹⁸ka Balaam minyu pinganang binabi-i: “Mandŭg, Balak anak Zippor, ka dingah kayuh adi re ku nang.

¹⁹Tapa dŭh manusia, adi minyu kadong; Ayŭh dŭh manusia adi an ngubah pikir-i. Ani bait ani adi Ayŭh bijanji, Ayŭh ndai; Ayŭh minyu, ka-i jadi.

²⁰Aku mbŭh dog ngajar bada nyiberkat, ka kan Tapa nyiberkat, aku dŭh bisa tarik pari berkat anŭ.

²¹Aku mbŭh diŭ kiris pimudip Israel adi sundis andu, dŭh re dŭh bituah buang dŭh re dog pinyusah. TUHAN adi Tapa ngara agi ngga ngara; ngara ngaku Ayŭh anŭ Raja ngara.

²²Tapa mbŭh taban ngara ruah so Egypt; Ayŭh birawan yŭn ngara keya ka dari sapi tarun.

²³Mating uri karŭm, mating pingandai siher, adi bisa dog pakai ngga rawan bangsa Israel.[16] Madin daya re nang pasar Israel, ‘Tingga kayuh adi Tapa mbŭh ndai!’

²⁴Bangsa Israel mbŭh keya ka singah adi bake: ayŭh dŭh re rŭŭ ndŭg ka-i muko nyirigat ka man, ndŭg ka-i muko nok deya ngara adi-i muko siŭ.”

²⁵Komŭnŭ Balak nang di Balaam, “Kuu abah mangu daya Israel, pak piji ka nŭŭh dŭhnyah nyiberkat ngara!”

²⁶Balaam nam, “Dŭh kah aku muko kidaan di kuu nang aku dŭh siŭn dŭh ndai sopŭrŭg kayuh adi TUHAN kidaan di aku?”

²⁷Balak nang, “Ja tunda aku, ka aku re taban kuu ka tarun adi bŭkŭn. Kadŭ Tapa re an bada kuu mangu ngara yŭn ku so nŭ.”

²⁸Jadi ayŭh taban Balaam ka tibung Darŭd Peor adi nura tarun tana-pajam.

²⁹Balaam nang di ayŭh, “Pijog ju mija-sambah digiti yŭn ku, ka taban yŭn ku ju dari sapi ka ju dari biri.”

³⁰Balak ndai nimun adi mbŭh dog bada ka nyadis ndi dari sapi ka ndi dari biri di barang mija-sambah anŭ.