Read Biatah Bidayuh PINYIKIANG 24 Bible Online

PINYIKIANG 24 - Biatah Bidayuh bible

PINYIKIANG 24

¹Jadi madin Balaam mbŭh puan nang TUHAN taŭn raan ayŭh nyiberkat daya Israel, ngapŭi ayŭh dŭh tia di jiroh pinyipuan jang, nimun dawŭ-i. Ayŭh bigiring nura tarun tana-pajam

²ka kiris daya Israel bibari ka kutung adŭp ngara nanyam ka tibaran-asar. Roh Tapa nguasa ayŭh,

³ka ayŭh minyu pinganang binabi-i: “Pinganang so Balaam anak Beor, pinganang daya anŭ adi tungang tirase tingga,[17]

⁴adi tungang dingah kayuh adi Tapa nang. Ngga batŭh adi bidarang aku kiris keya ka darŭm pŭmŭh kayuh so Tapa adi Bisa-pŭrŭg.

⁵Bari daya Israel ramus,

⁶Mun ated baris tŭngŭn kurma, puan kah teya di pang sungi, mun tŭngŭn gaharu adi TUHAN purun, puan kah tŭngŭn sedar di pang piin.

⁷Ngara re dapŭd bagŭ piin ujen, ka purun bine-i di tana adi sadang bisa. Raja ngara re bās dŭ so Agag, ka pritah-i re mukap bayah.

⁸Tapa taban ngara ruah so Egypt; Ayŭh birawan yŭn ngara keya ka dari sapi tarun. Ngara tŭrŭn pinganyu ngara, pirandŭk turang ngara, ka mata reja reja-panah ngara.

⁹ Bangsa Israel keya ka singah adi bake; kan-i bŭŭs, mating daya birani kies-i. Asi asi adi nyiberkat Israel re dog nyiberkat, ka asi asi adi mangu Israel re dog mangu.”

¹⁰Darŭm tuas-i Balak nyiriang pupung-i, ka nang di Balaam, “Aku bagan kuu bada mangu pinganyu ku, pak gŭt kuu mbŭh pitaruh kari nyiberkat ngara.

¹¹Madin maad adŭ nŭh! Aku bijanji an ngupah kuu, pak TUHAN mbŭh kinarang kuu so dapŭd upah anŭ.”

¹²Balaam nam, “Aku muko kidaan di pinyisung adi pait mu ka aku nang

¹³kambŭi kuu nggen di aku sopŭrŭg mas ngga pirak di darŭm Istana bait kani, aku dŭh bisa nyibireu pesan TUHAN ka ndai tadŭ kayuh so ka pinyiraan adŭp ku. Kaŭs aku bisa nang anŭ adi TUHAN bada aku nang.”

¹⁴Balaam nang di Balak, “Madin aku pari ka daya adŭp ku. Pak diŭ so aku panu, aku bakan kuu di kayuh adi re daya Israel ndai di tunduh daya mu darŭm tipuh adi re mandŭg.”

¹⁵Komŭnŭ ayŭh minyu pinganang binabi-i: “Pinganang Balaam anak Beor, pinganang daya anŭ adi tungang tirase tingga,

¹⁶adi tungang dingah kayuh adi Tapa nang ka trima pinyipuan adi mandŭg so Ayŭh adi Sambu Sopŭrŭg. Ngga batŭh adi bidarang aku kiris keya ka darŭm pŭmŭh kayuh so Tapa adi Bisa-pŭrŭg.

¹⁷Aku tingga tipuh adi re mandŭg, ka aku kiris bangsa daya Israel. Ndi naan raja, keya ka bitang adi nyirinyak, re makat so bangsa anŭ. Keya ka suat bitang ayŭh re mandŭg so Israel. Ayŭh re pirandŭk bara pinguru Moab ka ngarah sopŭrŭg daya Seth adi miruap ka ganas.

¹⁸Ayŭh re ngarah pinganyu-i di Edom ka bada tarun tana ngara jadi bisaka-i, sitadŭn Israel pijuu pimanang-i.

¹⁹Bangsa Israel re bidigang di tunduh ngara ka pirarap ngara adi gibabŭ udip.”

²⁰Komŭnŭ keya ka darŭm pŭmŭh Balaam kiris daya Amalek, ka minyu pinganang-binabi ati: “Amalek inŭh daya adi bake dŭ so sopŭrŭg bangsa, pak pinŭbŭn-i re rarap adu adu.”

²¹Ka keya ka darŭm pŭmŭh ayŭh kiris daya Ken, ka minyu pinganang-binabi ati: “Tarun adi yŭn ngan rŭŭ agi pagŭng, pagŭng keya ka sarin adi dog ndai di sandah batuh,

²²pak angān daya Ken re dog pirabur kan angān dog nakap daya Assyria.”[18]

²³Balaam minyu pinganang-binabi ati: “Asi dudu daya anŭ adi tikuruk di tura ka utara?[19]

²⁴Bara pinyerang re birayar so Cyprus; ngara re ngarah Assyria ngga Eber, pak ngara, gŭh, re rarap adu adu.”

²⁵Komŭnŭ Balaam sidia adŭp-i ka mari ka arŭn adŭp-i, ka Balak mari gŭh.