Read Biatah Bidayuh PINYIKIANG 27 Bible Online

PINYIKIANG 27 - Biatah Bidayuh bible

PINYIKIANG 27

¹Mahlah, Noah, Hoglah, Milcah, ka Tirzah inŭh bara anak dayung Zelophehad adi anak dari Hepher. Hepher anak dari Gilead, Gilead anak dari Machir, Machir anak dari Manasseh, Manasseh anak dari Joseph.

²Ngara di ka mijog di sirung jawin Moses, imam Eleazar, bara pinguru, ka sopŭrŭg daya Israel di rawa Bari TUHAN ka nang,

³“Sama ami kabŭs di tarun tana-pajam dŭh biyŭn anak dari. Ayŭh dŭh ndi so bara pinunda Korah, adi rawan TUHAN; ayŭh kabŭs sabab dosa adŭp-i.

⁴Mani dŭn sama ami re manyap so Israel batur sitagar ayŭh dŭh biyŭn anak dari? Nggen di kieh utung di buat-rata samah ngga jurud madis sama ami.”

⁵Moses taban har anŭ ka TUHAN,

⁶ka TUHAN nang di ayŭh,

⁷ “kayuh adi bara anak dayung Zelophehad mite inŭh batur; nggen di ngara utung buat-rata nanyam patut nimun jurud madis sama ngara. Bisaka so sama ngara patut dog nggen di ngara.

⁸Kidaan di bara daya Israel nang kan daya kabŭs dŭh biyŭn anak dari, anak-i adi dayung siŭn dapu buat rata-i.

⁹Kambŭi ayŭh dŭh biyŭn anak dayung, jurud jurud dari-i siŭn dapu buat rata-i anŭ.

¹⁰Kambŭi ayŭh dŭh biyŭn jurud jurud dari, jurud jurud dari sama-i siŭn dapu buat rata-i anŭ.

¹¹Kambŭi ayŭh dŭh biyŭn jurud jurud dari ka dŭh gŭh biyŭn tua tua ka samba samba adi dari, jurud jurud madis-i adi bŭkŭn adi siabo sindŭk siŭn dapu-i ka siŭn dapu-i keya ka buat-rata adŭp-i. Daya Israel an sita atur ati keya ka atur ukum-adat, nimun Aku, adi TUHAN, mbŭh pesan di kuu.”

¹² TUHAN nang di Moses, “Di maad Darŭd Abarim ka nyirangga so nŭ tarun tana adi Aku re nggen di bara daya Israel.

¹³Ripas kuu kiris-i, kuu re kabŭs nimun kaka mu Aaron,

¹⁴amai so-duwŭh ngan ko rawan pesan Ku di tarun tana-pajam Zin. Di tika sopŭrŭg daya Israel mingungut rawan Aku di Meribah, kuu abah ngaku kuasa Ku adi kudus di sirung jawin ngara.” (Meribah inŭh ndi rubang piin di Kadesh di tarun tana-pajam Zin.)

¹⁵Moses bidua,

¹⁶“TUHAN Tapa, adi atak pimudip, aku mite Kaam tijuan ndi naan daya adi bisa nguru bara daya ati,

¹⁷ ka adi bisa mritah ngara di tika biperang, isa bara daya Israel Mai dŭh keya ka bara biri adi dŭh biyŭn pingingat.”

¹⁸ TUHAN nang di Moses, “Tambit Joshua anak Nun, daya adi pandai ndai kayuh, ka na so-duwŭh tangan mu di tunduh ubak-i.

¹⁹Bada ayŭh mijog di sirung jawin imam Eleazar ka di sirung jawin sopŭrŭg daya Israel, ka diginŭ di sirung jawin sopŭrŭg ngara, kidaan nang ayŭh adi gati kuu.

²⁰Nggen di ayŭh kada kuasa mu, isa sopŭrŭg daya Israel dingah pinganang-i.

²¹ Ayŭh re bisangan di imam Eleazar adi puan pinyiraan Ku pakai urim ngga Thummim.[21] Simŭnŭ inŭh Eleazar re ngatur Joshua ngga sopŭrŭg daya Israel, di tadŭ tadŭ gaya aran pimudip ngara.”

²²Moses ndai nimun TUHAN muko pesan di ayŭh. Ayŭh bada Joshua mijog di sirung jawin imam Eleazar ngga sopŭrŭg daya Israel.

²³ Nimun TUHAN muko pesan, Moses na tangan-i di tunduh ubak Joshua ka kidaan di daya bagŭ nang ayŭh adi re gati adŭp-i.