Read Biatah Bidayuh PINYIKIANG 28 Bible Online

PINYIKIANG 28 - Biatah Bidayuh bible

PINYIKIANG 28

¹TUHAN pesan Moses

²da ngajar daya Israel ari jugan sadis pinguman adi pimunos asŭng TUHAN di tipuh adi mbŭh dog miratak.

³Ati inŭh sadis sadis pinguman adi an dog jugan ka TUHAN: yŭn sadis badang adi barang andu, duwŭh anak dari biri adi mbŭh ndi sawa umbur-i, adi pidanah.

⁴Jugan ndi ngga isan isan, ka jugan anŭ ndi ngga singumi andu,

⁵barang pŭrŭng samah ngga 1 kilogram tibaduk adi bigaur ngga 1 lita inyo kanā adi siabo kana.

⁶Anŭ inŭh sadis barang andu adi kubo dog badang, adi sibungas-i dog jugan di Darŭd Sinai ndu sadis pinguman; dagŭn-i pimunos asŭng TUHAN.

⁷Ndu sadis wain samah ngga sibungas biri, ren di mija-sambah 1 lita wain.

⁸Ngga singumi andu jugan anak biri adi numbor duwŭh mun gaya sadis adi isan isan dog jugan, samah ngga sadis wain-i. Anŭ gŭh sadis pinguman adi pimunos asŭng TUHAN.

⁹ Di andu Sabbath jugan duwŭh anak dari biri adi ndi sawa umbur-i ka adi pidanah, 2 kilogram tibaduk bigaur ngga inyo kanā ndu sadis ruwang kayuh, ngga sadis wain.

¹⁰Sadis badang anŭ an dog jugan barang andu Sabbath ngga nambah sadis adi barang andu samah ngga sadis wain.

¹¹Jugan sadis badang ka TUHAN barang puun buran: duwŭh anak dari sapi, ndi dari biri, ju anak dari biri adi ndi sawa umbur-i; sopŭrŭg-i an adi pidanah.

¹²Ndu sadis tibaduk, jugan tibaduk adi bigaur ngga inyo kanā: samah ngga barang dari sapi, 3 kilogram tibaduk; samah ngga dari biri, 4 kilogram tibaduk;

¹³ka samah ngga barang pŭrŭng anak biri, 1 kilogram tibaduk. Sadis sadis badang anŭ inŭh sadis pinguman, ka dagŭn-i pimunos asŭng TUHAN.

¹⁴Sadis wain adi mbŭh dog ngŭtŭ an 2 lita ngga barang pŭrŭng dari sapi; 1 lita sitangah ngga ndi dari biri; 1 lita ngga barang pŭrŭng anak dari biri. Anŭ inŭh atur-adat yŭn sadis badang yŭn andu adi sibungas darŭm barang buran sitŭkŭd sawa.

¹⁵Ngga nambah sadis adi dog jugan barang andu adi samah ngga sadis wain, jugan ndi dari kambing ndu sadis taran dosa.

¹⁶ Gawai Paska adi ngga kibās TUHAN siŭn dog sita ngga andu adi simŭng-pat darŭm sibungas buran.

¹⁷ Ngga andu adi simŭng-rimŭh gawai adat piguru ka sitadŭn ju andu darŭm gawai anŭ, ruti adi dog ndai dŭh ngga ragi adŭ siŭn dog man.

¹⁸Ngga sibungas andu gawai anŭ angān an tikuruk simayang, ka mating kraja siŭn dog ndai.

¹⁹Jugan sadis badang ndu sadis pinguman ka TUHAN: duwŭh dari sapi adi gi-mara, ndi dari biri, ka ju anak dari biri adi mbŭh ndi sawa umbur-i; sopŭrŭg-i an adi pidanah.

²⁰Jugan sadis tibaduk nanyam adi mbŭh dog ngŭtŭ: 3 kilogram tibaduk adi mbŭh dog gaur ngga inyo kanā samah ngga barang pŭrŭng sapi, 2 kilogram tibaduk samah ngga dari biri,

²¹ka 1 kilogram tibaduk samah ngga barang pŭrŭng anak biri.

²²Jugan gŭh 1 dari kambing ndu sadis taran dosa, ka simŭnŭ meh pimanu adat pibisig yŭn daya bagŭ.

²³Jugan sopŭrŭg anŭ ngga nambah sadis badang adi dog ndai barang isan isan.

²⁴Simŭnŭ gŭh, sitian ju andu jugan ka TUHAN sadis pinguman adi dagŭn-i pimunos asŭng-I. Jugan-i ngga nambah sadis badang ngga sadis wain adi ari dog ndai barang isan isan.

²⁵ Tikuruk simayang di andu adi ju, ka dŭhnyah ndai tadŭ mun kraja.

²⁶ Ngga sibungas andu Gawai Pingatŭm, di tika angān jugan sadis gandom bauh ka TUHAN, angān an tikuruk simayang, ka dŭhnyah ndai tadŭ mun kraja.

²⁷Jugan sadis badang adi dagŭn-i pimunos asŭng TUHAN: duwŭh dari sapi adi gi-mara, ndi dari biri, ka ju anak dari biri adi mbŭh ndi sawa umbur-i; sopŭrŭg-i an adi pidanah.

²⁸Jugan sadis tibaduk nanyam adi mbŭh dog ngŭtŭ: 3 kilogram tibaduk adi mbŭh dog gaur ngga inyo kanā samah ngga barang pŭrŭng sapi, 2 kilogram tibaduk samah ngga dari biri,

²⁹ka 1 kilogram tibaduk samah ngga barang pŭrŭng anak biri.

³⁰Jugan gŭh 1 dari kambing ndu sadis taran dosa, ka simŭnŭ meh pimanu adat pibisig yŭn daya bagŭ.

³¹Jugan sopŭrŭg anŭ ngga sadis wain, ngga nambah sadis badang samah ngga sadis ruwang kayuh adi ari dog ndai barang andu.