Read Biatah Bidayuh PINYIKIANG 32 Bible Online

PINYIKIANG 32 - Biatah Bidayuh bible

PINYIKIANG 32

¹Tibaran-asar Reuben ngga tibaran-asar Gad biyŭn bagŭ dāng kudip. Kan ngara kiris tarun tana Jazer ngga Gilead raru kana yŭn kudip dāng,

²ngara di ka yŭn Moses, Eleazar, ka pinguru pinguru daya Israel adi bŭkŭn ka nang,

³“Tarun tana adi TUHAN turung bara daya Israel ngisi, mun kupo kupo Ataroth, Dibon, Jazer, Nimrah, Heshbon, Elealeh, Sibmah, Nebo, ka Beon, inŭh tarun tana adi kana yŭn kudip dāng, ka kieh gŭh biyŭn bagŭ dāng kudip.

⁵Turung nggen di kieh tarun tana anŭ ndu utung rata ami, ka dŭhnyah bada kieh mutas Yang Jordan ka rŭŭ dijeh.”

⁶Moses nam, “Angān raan rŭŭ digiti sitadŭn bara daya Israel adi bŭkŭn matak di biperang kah?

⁷Birani angān suba an kijaman daya Israel mutas Yang Jordan di ka tarun tana adi TUHAN mbŭh nggen di ngara?

⁸ Anŭ inŭh kayuh adi bara sama ngan ndai di tika aku pait ngara so Kadesh Barnea da di pirasa tarun tana anŭ.

⁹ Ngara panu jeh ndŭg Rubān Eshcol ka kiris tarun tana anŭ; pak kan ngara pari, ngara kijaman bara daya Israel mŭrŭt tarun tana anŭ adi TUHAN mbŭh nggen di ngara.

¹⁰ TUHAN baji andu anŭ ka rasu bijanji:

¹¹‘Aku bipayu, amai ngara dŭh tŭtŭd di Aku, mating so ngara bara dari adi duwŭh puru sawa umbur-i bait adi tuuh so anŭ adi ruah so Egypt re mŭrŭt tarun tana adi Aku ko bijanji an nggen di Abraham, Isaac, ka Jacob.’

¹²Sopŭrŭg ngara, adŭ-i Caleb anak Jephunneh adi daya Keniz ngga Joshua anak Nun; ngara duwŭh babŭ tŭtŭd di TUHAN.

¹³TUHAN baji di ngara anŭ ka bada ngara bigandon di tarun tana-pajam sitŭkŭd pat puru sawa ndŭg ka turap anŭ adi bada asŭng-I dŭh munos mbŭh abo kabŭs.

¹⁴Ka madin angān mbŭh mun bara sama ngan, turap daya bidosa adi bauh adi re taban baji TUHAN ka daya Israel dinge.

¹⁵Kambŭi angān bara daya Reuben ngga daya Gad dŭh tŭtŭd di Ayŭh madin, Ayŭh re tagan dinge bara daya Israel di tarun tana-pajam, ka angān meh adi re dapu tanggong di pinyirusag adi re nyatŭk ngara.”

¹⁶Ngara tudu Moses ka nang, “Diŭ so kayuh bŭkŭn bada kieh ndai buwang batuh yŭn biri biri ami ka kupo kupo adi bikuta yŭn bara sawŭn ngga anak anak ami.

¹⁷Komŭnŭ kieh re sidia sua matak ngga bara daya Israel adi bŭkŭn di biperang ndŭg ka mbŭh natu ngara dapŭd tana adi re ngara dapu anŭ. Darŭm simŭnŭ, bara anak ngga bara sawŭn ami bisa rŭŭ digiti darŭm kupo kupo adi bikuta, siramat so daya tarun tana ati.

¹⁸Kieh dŭh re mari ndŭg ka sopŭrŭg daya Israel mbŭh batur dapu tarun tana anŭ adi mbŭh dog nitah yŭn ngara.

¹⁹Kieh dŭh re sua dapu tana ngara adi di pah mandi Yang Jordan, amai kieh mbŭh kambat jami utung digiti di timor Yang Jordan.”

²⁰Moses nam, “Kambŭi angān sawŭ re ndai simŭnŭ, madin digiti di sirung jawin TUHAN sidia meh adŭp ngan yŭn matak di biperang.

²¹Sopŭrŭg ngara adi dapŭd biperang an mutas Yang Jordan, ka di ribo kuasa TUHAN ngara siŭn nyerang pinganyu ami ndŭg ka TUHAN mbŭh ngarah ngara

²²ka tambit tarun tana anŭ. Ripas anŭ, angān bisa mari, sabab simŭnŭ angān re pijadi kayuh adi angān patut ndai di sirung jawin TUHAN ka di bara daya Israel adi bŭkŭn. Komŭnŭ TUHAN re natu nang tarun tana ati di tura ka timor Jordan sawŭ mbŭh tung jangān.

²³Pak kambŭi angān dŭh ndai simŭnŭ, ingat meh angān mbŭh bidosa rawan TUHAN. Ingat gŭh, angān re dog ukum amai dosa ngan anŭ.

²⁴Pijog meh kupo kupo ngan samŭn buwang buwang yŭn biri biri ngan, pak ndai anŭ adi angān mbŭh bijanji re ndai!”

²⁵Bara daya Gad ngga bara daya Reuben nang, “Tuan, kieh re ndai nimun adi pesan mai.

²⁶Bara anak sawŭn ami ngga sapi ka biri ami re babŭ digiti di kupo kupo Gilead.

²⁷Pak sopŭrŭg ami mbŭh sidia yŭn re biperang di ribo pritah TUHAN. Kieh re mutas Yang Jordan ka biperang, nimun adi muko mai nang.”

²⁸ Jadi Moses nggen pesan ati di Eleazar, Joshua, ka di bara pinguru Israel adi bŭkŭn:

²⁹“Kambŭi bara daya Gad ngga bara daya Reuben mutas Yang Jordan sidia yŭn re biperang nimun adi mbŭh TUHAN pesan ka kambŭi ngga pinurung ngara angān tungang ngarah ka tambit tarun tana anŭ, nggen di ngara tarun tana Gilead ndu bisaka ngara.

³⁰Pak kambŭi ngara dŭh mutas Yang Jordan ka sua di biperang ngga angān, ngara patut sua kambat utung tana di tarun tana Canaan, nimun angān gŭh.”

³¹Bara daya Gad ngga bara daya Reuben nam, “Tuan, kieh re ndai nimun adi TUHAN mbŭh pesan.

³²Di ribo pritah-I kieh re mutas di ka tarun tana Canaan ka sua biperang, isa kieh bisa babŭ dapu tana ami digiti di timor Jordan.”

³³Jadi Moses nggen di tibaran tibaran-asar Gad ngga Reuben ka sitangah di tibaran-asar Manasseh sopŭrŭg tarun tana adi dog nguasa Sihon raja daya Amor ka Og raja rais Bashan, samŭn kupo kupo ka rais adi maning anŭ.

³⁴Tibaran-asar Gad pari pijog kuta kuta kupo Dibon, Ataroth, Aroer,

³⁵Atroth Shophan, Jazer, Jogbehah,

³⁶Beth Nimrah, ka Beth Haran.

³⁷Tibaran-asar Reuben pari pijog kupo kupo Heshbon, Elealeh, Kiriathaim,

³⁸Nebo, Baal Meon (dŭn ati mbŭh dog nukar), ka Sibmah. Ngara nggen dŭn bauh di kupo kupo adi ngara pari pijog.

³⁹Manak Machir adi anak Manasseh nyerang tarun tana Gilead ka rasu ngisi-i, ka pibu bara daya Amor adi rŭŭ diginŭ.

⁴⁰Jadi Moses nggen tarun tana Gilead di manak Machir, ka ngara rasu rŭŭ diginŭ.

⁴¹Jair, adi so tibaran-asar Manasseh nyerang ka tambit kada anak anak kupo ka kadŭn-i “Anak anak kupo Jair.”

⁴²Nobah nyerang ka sirabut Kenath samŭn anak anak kupo-i, ka kadŭn-i Nobah tunda dŭn adŭp-i.