Read Biatah Bidayuh PINYIKIANG 4 Bible Online

PINYIKIANG 4 - Biatah Bidayuh bible

PINYIKIANG 4

¹TUHAN kidaan di Moses

²da mirang daya Levi adi manak Kohath pakai atur nanyam ka tibaran anak manak ngga rawang,

³ka pibŭrŭt dŭn sopŭrŭg dari adi asah taruh puru ngga rimŭh puru sawa umbur-i adi mbŭh tibirang nyiraja di Bari TUHAN.

⁴Kraja ngara inŭh ngatur kayuh kayuh adi raru kudus.

⁵TUHAN nggen di Moses pinganang sakati: Kan-i mbŭh tika bari bari dog natas, Aaron ngga anak anak dari-i siŭn mŭrŭt Bari TUHAN, kadi tabir di tura ka jawin Pati Simanya ka pakai-i ngga nutu Pati anŭ.

⁶Ngara siŭn nutu-i ngga birurang adi duduh, ka mamad banang adi biru di tunduh-i, ka kasŭk pinawid dieh.

⁷Ngara siŭn mamad banang biru di tunduh mija anŭ yŭn na ruti adi dog jugan ka TUHAN, ka na dieh kada pinggen, makuk makuk kimanyan, makuk makuk adi ngga jugan pinganggen, ka sapang sapang yŭn sadis wain. Ruti an ari agi di tunduh mija anŭ.

⁸Ngara siŭn mamad banang bireh di tunduh sopŭrŭg kayuh anŭ, ka nutu-i ngga birurang adi duduh, ka kasŭk pinawid dieh.

⁹Ngara siŭn tambit banang biru ngga nutu rika prita samŭn prita-i, satip satip, par par samŭn bŭrŭh bŭrŭh inyo kanā.

¹⁰Ngara siŭn mbos-i samŭn sopŭrŭg pingakas-i ngga birurang adi duduh, ka na-i di tunduh raras ngga gŭrŭng.

¹¹Komŭnŭ ngara siŭn mamad banang biru di tunduh mija-sambah mas, ka nutu-i ngga birurang adi duduh ka kasŭk pinawid dieh.

¹²Ngara siŭn tambit sopŭrŭg pingakas adi dog pakai di Yŭn Kudus, mbos-i ngga banang biru, nutu-i ngga birurang adi duduh, ka na-i di tunduh raras ngga gŭrŭng.

¹³Ngara siŭn kadi ŭbŭ ŭbŭ adi pirinyo so tunduh mija-sambah ka mamad banang adi bēng di tunduh-i.

¹⁴Ngara siŭn na di tunduh-i sopŭrŭg pingakas adi dog pakai di tika simayang: tipaku apui, sikait, sanduk, ka sambong. Komŭnŭ ngara siŭn nutu-i ngga birurang adi duduh ka kasŭk pinawid dieh.

¹⁵Kan-i mbŭh tika adi ngga bari dog natas, manak Kohath siŭn mandŭg di gŭrŭng kayuh kayuh kudus anŭ adŭ-i kan Aaron ngga anak anak dari-i muko nutu-i samŭn sopŭrŭg pingakas-i. Manak Kohath dŭh siŭn tama kayuh kudus anŭ; ngara kabŭs rai-i. Anŭ inŭh tah kraja pingandai manak Kohath kan Bari TUHAN dog mindah.

¹⁶Eleazar anak dari imam Aaron dapu tanggong ngatur Bari TUHAN, samŭn inyo yŭn dudu prita, kimanyan, sadis ruwang kayuh, inyo kudus, ka sopŭrŭg kayuh bŭkŭn di Bari TUHAN adi muko dog nyikudus yŭn TUHAN.

¹⁷TUHAN nang di Moses ngga Aaron,

¹⁸“Dŭhnyah tandah manak Kohath

¹⁹kabŭs sitagar mandŭg nyindŭk kayuh kayuh kudus anŭ. Ngga bada kayuh dŭh jadi simŭnŭ, Aaron ngga anak anak dari-i siŭn mŭrŭt ka kidaan di barang naan ngara kraja-i, ka kidaan kayuh adi re barang naan tunduk.

²⁰Pak kambŭi daya Kohath mŭrŭt Bari TUHAN ka kiris bara imam ngatur kayuh kayuh anŭ adi kudus yŭn re mindah, ngara re kabŭs.”

²¹TUHAN kidaan di Moses,

²²da mirang daya Levi adi manak Gershon pakai atur nanyam ka tibaran anak manak ngga rawang,

²³ka pibŭrŭt dŭn sopŭrŭg dari adi asah taruh puru ngga rimŭh puru sawa umbur-i adi mbŭh tibirang nyiraja di Bari TUHAN.

²⁴Ngara inŭh adi tukang gŭrŭng kayuh kayuh ati:

²⁵Bari TUHAN, sindung di tura ka darŭm ngga anŭ di tura ka sapa, anŭ inŭh birurang adi duduh di tunduh-i, tabir yŭn tiban bari,

²⁶tabir tabir ngga taris taris yŭn badag adi maning Bari TUHAN samŭn mija-sambah, tabir yŭn tiban badag, ka sopŭrŭg pingakas adi ngga pijog kayuh kayuh anŭ. Ngara inŭh adi dapu tanggong di sopŭrŭg kraja pingandai adi bigagit ngga kayuh kayuh anŭ.

²⁷Moses ngga Aaron an nakit ingat bada daya Gershon ndai sopŭrŭg kraja anŭ ka taban sopŭrŭg kayuh adi Aaron ngga anak anak dari-i ngatur yŭn ngara.

²⁸Anŭ inŭh tah kraja pingandai manak Gershon di Bari TUHAN; ngara siŭn ndai kraja ngara so pingatur Ithamar anak dari imam Aaron.

²⁹TUHAN kidaan di Moses da mirang daya Levi adi manak Merari pakai atur nanyam ka tibaran anak manak ngga rawang,

³⁰ka pibŭrŭt dŭn sopŭrŭg dari adi asah taruh puru ngga rimŭh puru sawa umbur-i adi mbŭh tibirang nyiraja di Bari TUHAN.

³¹Ngara dapu tanggong tukang gŭrŭng sibukah, parang, tiang, ka bangan bangan Bari TUHAN,

³²ka mŭnŭ gŭh tiang tiang, bangan bangan, pagu pagu ka dudu taris yŭn dog pakai di badag maning Bari TUHAN, ka samŭn sopŭrŭg pingakas adi ngga pijog-i. Barang naan dog nitah kayuh adi-i gŭrŭng.

³³Anŭ inŭh tah kraja pingandai manak Merari di Bari TUHAN; ngara siŭn ndai kraja ngara so pingatur Ithamar anak dari Imam Aaron.

³⁴Ngga tunda pinganang Moses, Aaron ngga bara pinguru daya Israel, mirang taruh tibaran manak Levi, Kohath, Gershon, ka Merari. Ngara ndai simŭnŭ pakai atur nanyam ka tibaran anak manak ngga rawang ka pibŭrŭt dŭn dŭn bara dari adi asah taruh puru ngga rimŭh puru sawa umbŭr-i adi mbŭh tibirang nyiraja di Bari TUHAN. Kiang kudu naan ngara agi simuti: [Manak] — [Kiang Kudu naan Daya] Kohath — 2,750 Gershon — 2,630 Merari — 3,200 Prungun: — 8,580

⁴⁹Barang naan mbŭh dog pibŭrŭt dŭn-i nanyam adi TUHAN muko pesan di Moses; ka ngga pesan TUHAN adi muko dog nggen so Moses, barang naan muko dog nitah pinanggong bait-i di kraja-i puan kah tukang gŭrŭng kayuh.