Read Biatah Bidayuh PINYIKIANG 5 Bible Online

PINYIKIANG 5 - Biatah Bidayuh bible

PINYIKIANG 5

¹TUHAN nang di Moses,

²“Pesan daya Israel da pibu so tarun yŭn bibari barang naan daya adi dog andam kurit adi bisā, puan kah buat-i bijire, ka barang naan daya adi kais amai ko tama tadang.

³Pibu sopŭrŭg ngara adi kais nanyam ka adat, isa ngara dŭh nyembar bari, adi yŭn Aku rŭŭ ngga bara daya Ku.”

⁴Daya daya Israel sawŭ ndai simŭnŭ ka pibu sopŭrŭg ngara so tarun yŭn bibari.

⁵TUHAN nggen di Moses

⁶atur ati yŭn daya Israel. Kan tadŭ tadŭ so angān adi dŭh tŭtŭd di TUHAN ka ndai sarah di daya,

⁷angān dŭh siŭn dŭh an ngaku sarah ngan ka bayar gati rugi ngga sipuno-i, ngga 20 piratus tambah-i, di sianŭ adi yŭn angān ndai sarah.

⁸ Pak kambŭi daya anŭ mbŭh kabŭs ka dŭh biyŭn jurud madis-i adi bisindŭk ngga adŭp-i adi bisa kambat bayar gati rugi, pinyibayar anŭ an dog nggen di TUHAN yŭn imam. Pinyibayar anŭ inŭh ngga nambah dari biri adi dog pakai ngga pimanu adat pibisig yŭn daya adi sarah.

⁹Simŭnŭ gŭh barang pinganggen adi grua adi daya daya Israel jugan ka TUHAN dog dapu imam adi kambat kayuh anŭ.

¹⁰Barang naan imam siŭn dapu pinganggen adi dog nggen di ayŭh.

¹¹TUHAN pesan Moses

¹²bada nggen di daya daya Israel atur ati. Nyamtadar-i dari mise sawŭn-i, nang ayŭh dŭh tŭtŭd ngga adŭp-i ka mbŭh nyibŭŭs ngga dari bŭkŭn. Banŭh-i dŭh puan sawŭ kah dŭh kayuh anŭ, amai kadŭ sawŭn-i mbŭh sukan urah-i, buang gŭh dinge saksi mating, ka dayung anŭ mating gŭh dog nakap darŭm-i ndai urah-i. Puan kah kadŭ banŭh-i mise sawŭn-i, pŭn ka sawŭn-i mating ndai sarah.

¹⁵Sawŭ bait dŭh, daya anŭ an taban sawŭn-i ka yŭn imam. Ayŭh an taban gŭh pinganggen, ndi kilogram tibaduk jeri, pak dŭh na inyo kanā bait kimanyan dieh, amai anŭ mbŭh pinganggen so banŭh adi mise, ngga jiroh sawŭ kah dŭh sawŭn-i ndai sarah.

¹⁶Imam anŭ an taban dayung anŭ ka bada ayŭh mijog di jawin mija-sambah.

¹⁷Ayŭh an ren kada piin kudus ka darŭm makuk tana ka tambit kada dabu so yŭn bidigang di Bari TUHAN ka na-i di piin ngga bada-i pa'it.

¹⁸Komŭnŭ ayŭh siŭn mesak ubok dayung anŭ ka na pinganggen tibaduk anŭ di tangan-i. Di tangan adŭp-i imam anŭ siŭn digŭng makuk piin anŭ adi pa'it adi taban pangu.

¹⁹Komŭnŭ imam anŭ bada dayung anŭ situju di payu adi ayŭh nang sakati: “Kambŭi kuu mating tanggah, pangu adi piin ati taban dŭh re nyatŭk kuu.

²⁰Pak kambŭi kuu agi tanggah,

²¹isa-i TUHAN bada dŭn mu madam di dupan bara daya mu. Isa-i Ayŭh bada buat mu kŭrŭng ka tain mu bakak.

²²Isa-i piin ati mŭrŭt tain mu ka bada-i bakak ka bada buat mu kŭrŭng.” Dayung anŭ siŭn nam, “Aku situju; isa-i TUHAN ndai simŭnŭ.”

²³Komŭnŭ imam siŭn nuris bang pangu anŭ ka ngu turis anŭ darŭm makuk piin anŭ adi pa'it.

²⁴Diŭ so-i bada dayung anŭ nok piin anŭ, adi bisa bada ayŭh sangsara,

²⁵imam an tambit pinganggen tibaduk so tangan dayung anŭ, katuh-i ka jugan-i ka TUHAN, ka pasan-i di mija-sambah.

²⁶Komŭnŭ ayŭh siŭn tambit ndi agŭm so tibaduk anŭ ndu tandā sopŭrŭg-i mbŭh dog jugan ka badang-i di tunduh mija-sambah. Sikasŭn-i, ayŭh bada dayung anŭ nok piin anŭ.

²⁷Kambŭi ayŭh agi tanggah, piin anŭ re bada ayŭh sangsara; tain-i re bakak ka buat-i re kŭrŭng. Dŭn-i re madam di dupan bara daya adŭp-i.

²⁸Pak kambŭi ayŭh dŭh sarah, ayŭh dŭh re sangsara ka re tungang mira biranak.

²⁹Anŭ inŭh ukum-adat yŭn banŭh adi mise, adi pikir sawŭn-i agi tanggah. Dayung anŭ an dog bada mijog di jawin mija-sambah, ka imam an pimanu adat anŭ.

³¹Banŭh dŭh sarah; kambŭi dayung anŭ sarah, ayŭh dŭh siŭn dŭh dapu tanggong di sarah-i.