Read Biatah Bidayuh PINYIKIANG 6 Bible Online

PINYIKIANG 6 - Biatah Bidayuh bible

PINYIKIANG 6

¹TUHAN pesan Moses

²da nggen atur ati di daya Israel. Tadŭ tadŭ so angān, dari bait dayung, adi bipayu jadi daya nazir buang nitah adŭp-i ka TUHAN

³ an pijo adŭp-i so wain ngga nok adi bisā. Ayŭh dŭh siŭn nok tadŭ masam nok adi dog ndai so anggor bait man buwa anggor puan kah buwa anggor adi pisŭk.

⁴Sitŭkŭd ayŭh babŭ daya nazir, ayŭh dŭh siŭn man tadŭ kayuh adi mandŭg so tŭngŭn anggor, ndŭg ka ruwang ngga kurit anggor dŭh gŭh.

⁵Sitŭkŭd ayŭh di ribo payu daya nazir, ayŭh dŭh siŭn kapŭg ubok-i puan kah bigumbak. Ayŭh mbŭh dog ngabŭt ngga payu anŭ sitian ayŭh mbŭh nitah adŭp-i ka TUHAN, buang kasān ubok-i.

⁶Ubok-i inŭh tandā ayŭh mbŭh nitah adŭp-i ka Tapa, ngapŭi ayŭh dŭhnyah nyembar adŭp-i di nyindŭk tadang, bait-i tadang sama-i, sindŭ-i, jurud dari-i, puan kah jurud dayung-i.

⁸Sitŭkŭd ayŭh daya nazir, ayŭh mbŭh dog nyikudus yŭn TUHAN.

⁹Kambŭi ubok-i adi muko dog nyikudus dog nyembar sabab ayŭh tipia ngapid daya adi gŭgŭh kabŭs, ayŭh dŭh siŭn dŭh an kajŭn ndŭg ju andu mbŭh ripuan ngga-i siŭn nundo ubak-i. Simŭnŭ ayŭh jadi bisig nanyam ka adat.

¹⁰Di andu adi mai ayŭh siŭn taban duwŭh manuk asang puan kah duwŭh manuk tikukur ka yŭn imam di tiban Bari TUHAN.

¹¹Imam siŭn jugan ndi ndu sadis taran dosa ndi ndu sadis badang, ngga pimanu adat pibisig yŭn-i adi mbŭh nyindŭk tadang. Di andu anŭ gŭh ayŭh siŭn pari nyikudus ubok-i

¹²ka pari nitah ka TUHAN tipuh-i jadi daya nazir. Tipuh adi mbŭh ripas dŭh tia dog kira, sabab ubok-i mbŭh dog nyembar. Ndu sadis bayar gati rugi ayŭh siŭn taban ndi anak biri adi ndi sawa umbur-i.

¹³ Kan tipuh payu nazir-i mbŭh ripuan, ayŭh an pimanu adat ati. Ayŭh siŭn di ka tiban Bari TUHAN

¹⁴ka nggen ka TUHAN taruh pŭrŭng dāng adi pidanah: ndi adi ndi sawa anak dari biri yŭn sadis badang, ndi adi ndi sawa anak dayung biri yŭn sadis taran dosa, ka ndi dari biri yŭn sadis bidingan.

¹⁵Ayŭh siŭn jugan gŭh ndu sadis ndi bakur ruti adi dŭh biragi: baru ruti adi tabar adi dog ndai so tibaduk bigaur ngga inyo kanā ka biskit adi dog susen inyo kanā dieh, ngga nambah sadis gandom ngga sadis wain nimun adi mbŭh dog miratak.

¹⁶Imam an nggen sopŭrŭg kayuh anŭ ka TUHAN ka jugan sadis taran dosa ngga sadis badang.

¹⁷Ayŭh an nyadis dari biri anŭ ka TUHAN ndu sadis bidingan, ka jugan-i ngga bakur ruti anŭ; ayŭh an jugan gŭh sadis gandom ka sadis wain.

¹⁸Di rawa tiban Bari TUHAN daya nazir anŭ an gumbak ubok-i ka na-i di apui di yŭn sadis bidingan dog badang.

¹⁹Komŭnŭ, kan kawin dari biri anŭ mbŭh dog tanŭk, imam an tambit-i ka na-i, samah ngga ndi baru ruti adi tabar ngga ndi biskit so bakur anŭ, di tangan daya nazir anŭ.

²⁰Ko anŭ, imam an jugan-i ndu pinganggen adi grua ka TUHAN; kayuh anŭ inŭh pinganggen adi kudus yŭn imam, ngga nambah sudo ngga sape dari biri, adi nanyam ka ukum-adat, mbŭh tah tung imam. Ripas anŭ, daya nazir bisa nok wain anŭ.

²¹ Anŭ inŭh atur-adat yŭn daya daya nazir; pak kambŭi ndi naan daya nazir bijanji an jugan rabis so adi dog miratak payu-i, ayŭh dŭh siŭn dŭh pijadi-i nimun adi ayŭh mbŭh bijanji.

²²TUHAN pesan Moses

²³da kidaan di Aaron ngga di anak anak dari-i da pakai bang pinganang ati ngga nyiberkat daya Israel:

²⁴Isa-i TUHAN nyiberkat angān ka kingat angān;

²⁵Isa-i TUHAN mandis ka masi di angān;

²⁶Isa-i TUHAN kana ngga angān ka nggen di angān damai.

²⁷Ka TUHAN nang, “Kambŭi ngara nyabŭt adŭn Ku ngga nyiberkat daya Israel, Aku re nyiberkat ngara.”