Read Biatah Bidayuh MICAH 1 Bible Online

MICAH 1 - Biatah Bidayuh bible

MICAH 1

¹ Di jaman Jotham, Ahaz, ngga Hezekiah jadi raja Judah, TUHAN nggen pinganang-I ka Micah, adi so kupo Moresheth. TUHAN pinandŭng di Micah sopŭrŭg kayuh ati pasar Samaria ngga Jerusalem.

²Dingah ati, sopŭrŭg bangsa; dingah kayuh ati, sopŭrŭg adi udip di ong! TUHAN Raja re bisaksi rawan angān. Dingah! Ayŭh minyu so yŭn kudus-I di shorga.

³TUHAN anŭ mandŭg so yŭn kudus-I; Ayŭh re mūn ka panu di tibung darŭd darŭd di ong.

⁴Komŭnŭ darŭd darŭd re riris dog punda kaja-I mun dian dog apui; tana darŭd re ruruh ka rubān mun piin aman mūn sandah.

⁵Sopŭrŭg kayuh anŭ re jadi sabab daya Israel mbŭh bidosa ka birawan rawan Tapa. Asi meh adi dapu tanggong di pimudip Israel adi mun anŭ? Adŭp Samaria, adi sindŭ kupo! Asi meh adi dapu tanggong di pimudip Judah adi nyambah tibudo? Adŭp Jerusalem!

⁶Jadi TUHAN nang, “Aku re bada Samaria jadi tugung rakang tibawang di sapa rais, tarun yŭn daya ndai teya anggor. Aku re taran rakang tibawang anŭ ka darŭm rubān, ka re bada pinagap rasan-i tatŭng dog kiris.

⁷Sopŭrŭg tibudo-i re dog pirandŭk bada asur, sopŭrŭg kayuh adi dog nggen di dayung sundar ramin sambah-i re dog pirabur ngga apui, ka sopŭrŭg gayŭn-i re jadi tugung sapok. Samaria dapŭd kayuh kayuh anŭ yŭn adat pinyidamŭn, ka madin bara pinganyu-i re taban-i ngga bu yŭn sundar bari-sambah di tarun bŭkŭn.”

⁸Komŭnŭ Micah nang, “Sabab anŭ aku re ngurid ka muās. Ngga kiren susah ku, aku re panu dŭh bikasut ka dŭh nēn piraka. Aku re nyikaong sak kasong tarun ka sien sak manuk onta.

⁹Tawan Samaria dŭh dapŭd dog nguri, ka Judah re mun anŭ gŭh sangsara; pinyirusag mbŭh ndŭg tiban-bās kupo Jerusalem, di yŭn daya Ku rŭŭ.”

¹⁰Dŭhnyah kidaan di bara pinganyu di Gath nang ata mbŭh dog ngarah; dŭhnyah angān sien. Daya Beth Leaphrah,[1] gurai marik adŭp ngan di dabu ngga kiren adŭp ngan mbŭh mating pingarap tia.

¹¹Angān daya Shaphir, re dog taran pinganyu ka rais tami, sitagor darŭm mangŭh. Ngara adi rŭŭ di Zaanan dŭh birani ruah so kupo ngara. Kan angān dingah daya di kupo Bethezel muās, angān re puan nang diginŭ mating tarun yŭn ngan re dog grindung.

¹²Daya Maroth kajŭn pinurung buang susah, sabab pinyirusag adi TUHAN taban mbŭh sindŭk Jerusalem.

¹³Angān adi rŭŭ di Lachish, ngatur kuda yŭn krita kuda. Angān nanya dosa Israel ka sabab anŭ Jerusalem bidosa.

¹⁴Ka madin, angān daya Judah, nang siramat birakang di kupo Moresheth Gath. Raja raja Israel re dŭh dapŭd pinurung so kupo Achzib.

¹⁵Daya Mareshah, TUHAN re nggen angān ka darŭm tangan pinganyu, adi re sirabut kupo ngan. Bara pinguru Israel re bu ka bisukan di tāng Adullam.

¹⁶Daya Judah, kapŭg ubok ngan ngga ngurid anak anak ngan adi angān raru rindu. Nundo ubak ngan bada mun ubak manuk onta, sabab anak anak ngan re dog taran ka rais tami.