Read Biatah Bidayuh MICAH 2 Bible Online

MICAH 2 - Biatah Bidayuh bible

MICAH 2

¹Munki masam sipŭ-i re yŭn ngara adi singadu dŭh bŭŭs amai bisatur an ndai kayuh arap! Kan-i mbŭh isan isan, ka kambŭi agi pluang, ngara ndai kayuh arap anŭ adi ngara mbŭh bisatur an ndai.

²Kan ngara raan ŭmŭh, ngara sirabut-i; kan ngara raan kuda, ngara tambit-i. Mating adŭ kayuh bait buat-rata adi siramat.

³Ngapŭi meh TUHAN nang, “Aku bisatur an taban pinyirusag bada nyatŭk angān, ka angān dŭh re tungang pirupas adŭp ngan. Angān re dapŭd adŭp ngan dog pinyusah, ka komŭnŭ angān re dŭh tia gambung.

⁴Kan andu anŭ mbŭh mandŭg, daya re pakai dundan ngan ndu suto pinyirusag, ka ngara re nang ragu susah ati pasar kayuh adi angān mbŭh kinyam: Ata mbŭh rabur! TUHAN mbŭh tambit tarun tana ta ka nggen-i di daya adi mbŭh ngarah ata.”[2]

⁵Ngapŭi meh, kan tika adi ngga tarun tana anŭ dog pari ka daya TUHAN, mating so angān re sua dog pirutung tana anŭ.

⁶Daya minyu-binabi di aku ka nang, “Dŭhnyah minyu-binabi di kieh. Dŭhnyah minyu-binabi pasar sopŭrŭg kayuh anŭ. Tapa dŭh re pimangŭh ata.

⁷Kuu pikir daya Israel dog pangu kah?[3] TUHAN mbŭh dŭh sabar kah? Sawŭ kah Ayŭh re ndai kayuh adi mun anŭ? Dŭh kah Ayŭh[4] minyu mandis ngga daya adi ndai kayuh adi batur?”

⁸TUHAN nam, “Angān nyerang daya Ku[5] mun pinganyu. Bara dari mari so yŭn biperang, pikir adŭp ngara siramat di ramin, pak diginŭ angān kajŭn yŭn re naku piraka adi ngara nēn.

⁹Angān pibu dayung dayung daya Ku so ramin adi ngara rindu, ka angān sirapas berkat Ku ndŭg situi tui so anak anak ngara.

¹⁰Makat ka bu meh so ti. Tarun ati mbŭh dŭh tia siramat. Dosa ngan mbŭh taban pinyirabur ka tarun ati.

¹¹“Bara daya ati raan nabi adi gagā kadong ka nipu daya, adi nang, ‘Aku minyu-binabi nang angān re dapŭd raru bagŭ wain ngga nok adi bisā.’

¹²“Pak Aku re nguruk angān, sopŭrŭg ngan daya Israel adi dŭm. Aku re taban angān keya ka biri pari ka darŭm kandang. Keya ka tarun tana kupai adi puno ngga dudu biri, tarun tana ngan re puno dinge bada bara daya.”

¹³Tapa re kuka aran yŭn ngara ka taban ngara pari so tarun tana adi yŭn ngara dog taran. Ngara re nyirubuh tiban tiban-bās kupo ka pirupas adŭp ngara. Raja ngara, adi adŭp TUHAN, re nguru ngara ruah.