Read Biatah Bidayuh MICAH 3 Bible Online

MICAH 3 - Biatah Bidayuh bible

MICAH 3

¹Dingah, angān pimritah Israel! Sipatut-i angān mbit bāt pasar pinyitŭnggŭn;

²pak angān tiru di kayuh adi kana ka rindu kayuh adi arap. Angān nganyit daya Ku udip udip ngara ka nyirigat isin so turang ngara.

³Angān man daya Ku. Angān nganyit ngara, mata turang ngara, ka natad ngara mun natad dagin adi re dog na darŭm priok.

⁴Tika-i re mandŭg kan angān re sien bagan TUHAN, pak Ayŭh dŭh re nam angān. Ayŭh dŭh re dingah dua ngan, amai angān mbŭh ndai arap.

⁵Daya Ku dog kadong nabi nabi adi bijanji an nggen damai di daya adi nggen duit di ngara, pak nang perang re mandŭg ka daya adi dŭh ndai simŭnŭ. Di bara nabi anŭ TUHAN nang,

⁶“Bara nabi, pinŭbŭn pimudip ngan mbŭh sindŭk; di angān andu re jadi karŭm. Sabab angān kinanyap daya Ku, angān re dŭh tia kiris kayuh keya ka darŭm pŭmŭh, ka angān re dŭh dapŭd ninjau tadŭ tadŭ kayuh.”

⁷Ngara adi ninjau tipuh adi re, re dog pimangŭh kan kayuh adi ngara nang dŭh jadi bitŭtŭk. Sopŭrŭg ngara re dog pimangŭh sabab TUHAN dŭh nam ngara.

⁸Pak aku, TUHAN ngisi aku ngga roh ka kuasa-I, ka nggen di aku pinyimirati pasar pinyitŭnggŭn ngga pinyipagan an kidaan di daya Israel ani anŭ dosa ngara.

⁹Dingah aku, angān bara pimritah Israel, angān adi tiru di pinyitŭnggŭn ka adi bada kayuh batur jadi kayuh sarah.

¹⁰Angān pijog kupo Tapa, Jerusalem, di tunduh pimŭnŭs pinyiŭ ngga kayuh adi dŭh nanyam ka pinyitŭnggŭn.

¹¹Bara pimritah kupo mritah ngga dapŭd suap, bara imam nggen rati Ukum-adat ngga dapŭd upah, bara nabi kidaan pinandŭng ngga dapŭd duit; ka sopŭrŭg ngara samah nang TUHAN agi ngga ngara. “Ata dŭh re dog nyatŭk pinyirusag,” ngara nang. “TUHAN agi ngga ata.”

¹² Ngapŭi meh, sabab angān, Zion re dog majak mun tana, Jerusalem re jadi tugung rakang tibawang, ka sandah Ramin TUHAN re jadi tuān.