Read Biatah Bidayuh MICAH 6 Bible Online

MICAH 6 - Biatah Bidayuh bible

MICAH 6

¹Dingah kayuh adi yŭn TUHAN nyarah Israel. Makat, O TUHAN, ka kidaan kayuh adi yŭn Mai nyarah Israel. Bada darŭd ngga sandah dingah kayuh adi Kaam nang.

²Angān darŭd, angān pinagap-rasan ong adi tan adu adu, dingah kayuh adi TUHAN nang! TUHAN biyŭn kayuh an-I nang pasar daya-I. Ayŭh re nang kayuh adi ngga-I nyarah Israel.

³TUHAN nang, “Daya Ku, ani anŭ adi mbŭh Ku ndai di angān? Munki Aku mbŭh nyusah pimudip ngan? Nam Aku.

⁴ Aku taban angān ngga ruah so Egypt; Aku nyiramat angān so dog piurun; Aku pait Moses, Aaron, ka Miriam bada nguru angān.

⁵ Daya Ku, ingat kayuh adi Raja Balak so Moab bisatur an ndai di angān ka munki Balaam anak Beor nam ayŭh. Ingat kayuh adi jadi di aran so tarun yŭn bibari di Acacia ndŭg Gilgal. Ingat kayuh kayuh anŭ ka angān re rada kayuh adi Aku mbŭh ndai ramŭn an nyiramat angān.”

⁶Ani kayuh adi aku patut taban ka TUHAN, Tapa di shorga, kan aku mandŭg di nyambah Ayŭh? Patut kah aku taban anak sapi adi siabo brega an ku badang ndu sadis ka Ayŭh?

⁷Re munos kah asŭng TUHAN kambŭi aku taban ka yŭn-I siribu biri bait inyo kanā adi dŭh pandai abo? Bisa kah aku jugan anak pinuai ku ndu pinyibayar dosa ku?

⁸Dŭh, TUHAN mbŭh kidaan di ata kayuh adi kana. Kayuh adi-I mite ata ndai inŭh ati: ndai kayuh adi batur, kiren pinyirindu adi dŭh bisa birubah, ka pirapat adŭp buang udip ndi ngga Tapa.

⁹Bijak inŭh daya adi taru di TUHAN. Ayŭh nang di kupo, “Dingah, angān adi tikuruk darŭm kupo![10]

¹⁰Di ramin daya adi arap agi rata adi ngara dapŭd ngga aran adi sarah. Ngara pakai takar adi sarah, kayuh adi Aku tiru.[11]

¹¹Simuki meh Aku re apun daya adi pakai dasin ngga timbang adi sarah?

¹²Angān daya adi kaya pirinda daya adi sirata, ka sopŭrŭg ngan pingadong.

¹³Jadi Aku mbŭh piguru[12] pinyirubuh ngga pinyirusag ngan sabab dosa ngan.

¹⁴Angān re man, pak re dŭh bisoh; sawŭ angān re babŭ sibŭrŭk. Angān re sirapas kayuh, pak angān re dŭh dapŭd bada-i pagŭng. Kayuh adi angān nyikŭn Aku re pirusak darŭm perang.

¹⁵Angān re purun gandom, pak dŭh re ngatŭm buwa-i. Angān re ndai inyo so buwa kanā, pak re dŭh dapŭd pakai-i. Angān re ndai wain, pak re bŭn nok-i.

¹⁶ Kayuh ati re jadi sabab angān tunda suto danding adi arap so Raja Omri ngga anak-i, Raja Ahab. Angān pijuu atur adi ngara mbŭh pimanu, ka anŭ sabab Aku re pirabur angān, ka sopŭrŭg daya re ngamun angān. Daya[13] di barang yŭn re tiru di angān.”[14]